13-Nov-2025

ବଲାଙ୍ଗୀର(ପ୍ରେରଣା ଖବର): ବହୁବର୍ଷ ହେଲା ବଡବଡିଆ ବାବୁମାନଙ୍କୁ ହାତକରି କୋଟି କୋଟି ଟଙ୍କା ରୋଜଗାର କରି ଥିବା ଅଜିତ ପାତ୍ର ଶେଷରେ ସିବିଆ ଦ୍ୱାରା ଗିରଫ ହୋଇଛି । ତେବେ ରାଜସ୍ଥାନରେ ଏକ ଜିଏସଟି ମାମଲା ରଫାଦଫା କରିବାକୁ ଜଣେ ଏଜେନ୍ସୀଠାରୁ ୧୮ଲକ୍ଷ ଟଙ୍କା ଲାଞ୍ଚ ନେଉ ଥିବା ବେଳେ ସିବିଆଇ ତାକୁ ଗିରଫ କରିଛି । ତାକୁ ଗିରଫ ପରେ ସିବିଆଇ ଟିମ ଦିଲ୍ଲୀ,ଭୁବନେଶ୍ୱର ସମେତ ପାଟଣାଗଡ ର ତାଙ୍କ ପୈତୃକଘରେ ମଧ୍ୟ ଚଢାଉ କରିଛି । ଏକ ୪ଜଣିଆ ଟିମ ଆସି ବୁଧବାର ପାଟଣାଗଡ ଆସି ତାଙ୍କଘରେ ଚଢାଉକରି ଛାନଭିନ କରିଥିଲେ । ତାଙ୍କ ଦିଲ୍ଲୀବାସଭବନରୁ ସାଢେ ୩ କୋଟିର ନଗଦ ନୋଟ ସମେତ ଦେଢକିଲୋ ସୁନା ଓ ଅନେକ ଗୁଡିଏ ପ୍ଲଟର କାଗଜପତ୍ର ଜବତ କରାଯାଇଥିବା ଏକ ବିଶେଷ ସୂତ୍ôରରୁ ଜଣାପଡିଛି । ପାଟଣାଗଡ ଘରୁ ମଧ୍ୟ ଅନେକ ଆପତ୍ତିଜନକ କାଗଜପତ୍ର ଜବତ କରାଯାଇଥିବା ସୂଚନା ମିଳିଛି । ବୁଧବାର ସିବିଆଇ ଟିମ ପହଞ୍ଚି ସ୍ଥାନୀୟ ପୋଲିସକୁ ନେଇ ଅଜିତ ପାତ୍ରର ଘରେ ଚଢାଉ କରିଥିଲା । ପ୍ରକାଶ ଯେ, ଅଜିତ ପାଟଣାଗଡର ଏକ ସାଧାରଣ ବ୍ୟବସାୟୀ ପରିବାରର ହୋଇଥିବା ବେଳେ ପାଠପଢାପରେ ଗାଡିଭଡା ଲଗାଇ ଚଳୁଥିଲା । ପରେ କିଛି କିଛି ଠିକାକାମ କରିଥିଲା । କିନ୍ତୁ ଭୁବନେଶ୍ୱର ଯାଇ ସେଠାରେ କିଛି ଦୁର୍ନିତୀଗ୍ରସ୍ତ ଅଧିକାରୀ ତଥା ଦେହଲୋଭୀ ଅଧିକାରୀଙ୍କୁ କୌଶଳକରି ହାତ କରି ତାର ନେଟୱାର୍କ ଚଳାଇଲା । ଭୁବନେଶ୍ୱରରେ ବିଜେଡି ଶାସନ ସମୟରେ ଅନେକ ବଡବଡ ଅଧିକାରୀଙ୍କ ସହିତ ତାର ସମ୍ପର୍କ ବଢିଥିଲା ଓ ସେଥିରୁ ସେ ମଧ୍ୟସ୍ଥି କରି ବହୁତ ଟଙ୍କା ରୋଜଗାର କରିଥିଲା । କଟକ ଜିଲ୍ଲାରେ ଏକ ବିବାଦୀୟ ମାମଲାରେ ଫସି ଥରେ ଜେଲକୁ ଗଲାପରେ ସେ ତାର ନେଟୱାର୍କ ଦିଲ୍ଲୀ ଆଡକୁ ବଢାଇଥିଲା । ସେଠାରେ ବହୁତ ବଡବଡ ଅଧିକାରୀଙ୍କ ପ୍ରୋତ୍ସାହନରେ ଏବେ କୋଟି କୋଟି ଟଙ୍କାର ମାଲିକ ହୋଇ ଯାଇଛି ଅଜିତ । ଗତ ୨୦୨୪ରେ ପାଟଣାଗଡରେ ତାର ମାଆଙ୍କ ଶ୍ରାଦ୍ଧଘରେ ଓଡିଶା ସମେତ ଛତିଶଗଡ ରାଜ୍ୟର ଅନେକ ପୋଲିସ ଅଧିକାରୀ ଆସି ଯୋଗଦେଇଥିଲେ । ଯାହାକୁ ନେଇ ପାଟଣାଗଡରେ ଚର୍ଚ୍ଚାର ବିଷୟ ହୋଇଥିଲା । ଅଜିତ ବିଭିନ୍ନ ବିଭାଗ ପକ୍ଷରୁ ହେଉଥିବା ଚଢାଉ ତଥା ଯାଞ୍ଚରେ ମଧ୍ୟସ୍ଥି ସାଜି ରଫାଦଫା କରାଇ ଟଙ୍କା ରୋଜଗାର କରୁଥିଲା । ଏବେ ସେହି ଧନ୍ଦାରେ ସିବିଆଇ ତାକୁ ଧରି ବାନ୍ଧିଛି ଓ ଛାନଭିନ ଚଳାଇଛି । ତା ସହିତ ତାର ଜଣେ ସହଯୋଗୀ ମଧ୍ୟ ଗିରଫ ହୋଇଛି । ଶୁଣାଯାଉଛି ଓଡିଶାର ଏସଆଇ ନିଯୁକ୍ତି କେଳେଙ୍କାରୀରେ ଗିରଫ ହୋଇଥିବା ଶଙ୍କର ପୃଷ୍ଟି ସହିତ ମଧ୍ୟ ଅଜିତର ସମ୍ପର୍କ ରହିଛି । ଶଙ୍କର ପୃଷ୍ଟି କ୍ରାଇମବ୍ରଞ୍ଚର ତଦନ୍ତ ବେଳେ ପୂର୍ବ ସରକାର ଅମଳରେ ହଜାରେ କୋଟିର ଡିଲ ବିଷୟରେ ସୂଚନା ଦେଇଥିଲା । ଏଥିରେ କୁଆଡେ ଅଜିତ ପାତ୍ର ମଧ୍ୟ ରହିଛି । ତେଣୁ ଅଲୁଖୋଳୁ ମହାଦେବ ବାହାରିଲା ଭଳି ସିବିଆର ଏହି ଚଢାଉ ପରେ ଅନେକ ରହସ୍ୟ ଫିଟିବ ବୋଲି ଆଲୋଚନା ହେଉଛି । ତେବେ ଓଡିଶାର କେଉଁ କେଉଁ ଦେହଲୋଭୀ ତଥା ଦୁର୍ନୀତିଗ୍ରସ୍ତ ଅଧିକାରୀ ଅଜିତ ଲିଙ୍କରେ ରହିଛନ୍ତି ତାହାର ମଧ୍ୟ ସବିଶେଷ ତଥ୍ୟ ଖୋଲତାଡ ପରେ ଜଣାପଡିବ ବୋଲି ଚର୍ଚ୍ଚା ଯୋର ଧରିଛି ।