03-Jun-2025

ବଲାଙ୍ଗୀର(ପ୍ରେରଣାଖବର): ବଲାଙ୍ଗୀର ସହର କିଛିଦିନ ଶାନ୍ତ ରହିବା ପରେ ଏବେ ପାର୍ବଣଋତୁରେ ପୁଣିଥରେ ଅଶାନ୍ତ ହେଉଛି । ଅପରାଧିଗୋଷ୍ଠୀ ମଧ୍ୟରେ ଗ୍ୟାଙ୍ଗୱାର ହେବାର ଆଶଂକା କରାଯାଇଛି । ଅପରାଧିଗୋଷ୍ଠୀ ନିଜ ନିଜର ପତିଆରା ଜାହିର କରିବାକୁ ବିଭିନ୍ନ ସମୟରେ ପ୍ରତିପକ୍ଷ ଗୋଷ୍ଠୀଙ୍କୁ ଆକ୍ରମଣ କରୁଛନ୍ତି । ସେଥିପାଇଁ ସହରରେ ଭୟର ବାତାବରଣ ଦେଖାଦେଇଛି । ଗତ ରବିବାର ସଂଧ୍ୟାରେ ଶିତୋଷ ସ୍ୱାଇଁ ଓରଫ ସିଲୁ ସ୍ୱାଇଁଙ୍କୁ କିଛି ଯୁବକ ଆକ୍ରମଣ କରି ହତ୍ୟାଉଦ୍ୟମ କରିଥିବା ଅଭିଯୋଗ ହୋଇଛି । ସିଲୁ ଗତ କିଛିମାସ ହେଲା ଏକ ସଂଗୀନମାମଲାରେ ଜେଲରେ ଥିଲା । ଜାମିନରେ ଆସିଲା ପରେ ପୁଣି ସହରରେ ଉତ୍ପାତ କରୁଛି ବୋଲି ଅଭିଯୋଗ ହେଉଛି । ରବିବାର ସଂଧ୍ୟାରେ ତାର ନିଜର ଗୋଷ୍ଠୀ ମଧ୍ୟରେ ଫାଟହୋଇ ଆକ୍ରମଣ ହୋଇଥିଲା । ଗତ କିଛିମାସ ତଳେ ସତ୍ୟନାରାୟଣପଡା ଲକ୍ଷ୍ମୀଯୋରପୋଲ ଉପରେ ହୋଇଥିବା ଏକ ଦୁର୍ଘଟଣାଜନିତ ମୃତ୍ୟୁ ଘଟଣାକୁ ନେଇ ସିଲୁକୁ ଦାୟୀକରି ଆକ୍ରମଣ ହୋଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । କୁଆଡେ ସିଲୁ ମୃତକଙ୍କ ସହିତ ପୋଲଉପରେ ଟ୍ରକକୁ ଅଟକାଇ ଚାନ୍ଦା ଆଦାୟ କରୁଥିଲା । ଡ୍ରାଇଭର ଏମାନଙ୍କୁ ଧକ୍କାଦେଇ ଗାଡିକୁ ନେଇ ଥାନାକୁ ପଳାଇଥିଲା । ସେହି ଧକ୍କାରେ ଜଣେ ଯୁବକ ମୃତ୍ୟୁବରଣ କରିଥିଲା । କିନ୍ତୁ ଉକ୍ତ ଘଟଣାରେ ସିଲୁ ହିଁ ଯୁବକଜଣକୁ ଡାକିନେଇଥିବା ମୃତକର ପରିବାର ଅଭିଯୋଗ କରୁଛନ୍ତି । ଜେଲରୁ ଫେରିବା ପରେ ସେହିପରିବାରର ଜଣେ ଯୁବକକୁ ସିଲୁ କୁଆଡେ ଭୁଜାଲିରେ ଆକ୍ରମଣ କରିବାକୁ ଯାଇଥିବା ବେଳେ ସେହି ଯୁବକର ସାଙ୍ଗମାନେ ମିଶି ସିତୁକୁ ଆକ୍ରମଣ କରି ସେ ଧରିଥିବା ଭୁଜାଲିରେ ତାକୁ ଆକ୍ରମଣ କରି ଗୁରୁତର କରିଦେଇଛନ୍ତି । ସେପଟେ ଆହତ ହୋଇ ସିଲୁ ଭୀମଭୋଇ ମେଡିକାଲ କଲେଜରେ ଭର୍ତ୍ତିହୋଇ ଚିିକିତ୍ସିତ ହେବା ବେଳେ ପୋଲିସକୁ ଚକମା ଦେଇ କୁଆଡେ ଫେରାର ହୋଇଯାଇଛି । ଲକ୍ଷ୍ମୀନଗରପଡାର ଦିଲିପ ସ୍ୱାଇଁଙ୍କ ପୁଅ ସିତୋଷ ସ୍ୱାଇଁ ଓରଫ ସିତୁ ନାମରେ ପୂର୍ବରୁ ଅନେକଗୁଡିଏ ମାମଲା ରହିଛି ବୋଲି ଜଣାପଡିଛି । ଗତ ୨୦୨୦ ମସିହାରୁ ଆଜି ପର୍ଯ୍ୟନ୍ତ  ସିତୁ ନାମରେ ପ୍ରାୟ ୧୦ଟି ମାମଲା କୋର୍ଟରେ ବିଚାରାଧିନ ରହିଛି । ଟାଉନଥାନାରେ କେସନମ୍ବର-୬୬୪/୨୦୧୯,୨୩୯/୨୦୨୦,୩୮୮/୨୦୨୦,୯୧/୨୦୨୧,୫୪୧/୨୦୨୧,୪୫/୨୦୨୨,୨୫୯/୨୦୨୨,୯୩୩/୨୦୨୪,ପୁଇଁତଳା ଥାନାରେ କେସନମ୍ବର-୨୬୦/୨୦୨୨ ଓ ସଦରଥାନାରେ କେସ ନମ୍ବର-୪୫୮/୨୦୨୩ରେ ମାମଲା ରହିଛି । ଏକ ଅପରାଧିଗୋଷ୍ଠୀକୁ ସେ ପରିଚାଳିତ କରୁଥିବା ସହରକୁ ଅଶାନ୍ତ କରୁଥିବା ମଧ୍ୟ ଅଭିଯୋଗ ରହିଛି । ବିଭିନ୍ନ ସମୟରେ ସେ ଅପରାଧିଗୋଷ୍ଠୀ ଧରି ଡକାୟତି କରିବା,ଆକ୍ରମଣ କରି ହତ୍ୟାଉଦ୍ୟମ କରିବା ଇତ୍ୟାଦି ସଂଗୀନ ମାମଲା ତା ନାମରେ ରହିଛି । ଏବେ ତାକୁ ଆକ୍ରମଣ ପରେ ଆହତ ହୋଇ କୁଆଡେ ବୁଲୁଛି । ପୁଣି ଥରେ ତାର ଗ୍ୟାଙ୍ଗକୁ ସଂଗଠିତ କରି ଅପରଗୋଷ୍ଠୀ ସହିତ ଗ୍ୟାଙ୍ଗୱାର ହେବାର ମଧ୍ୟ ଆଶଂକା କରାଯାଉଛି । ଅପରଗୋଷ୍ଠୀ ମଧ୍ୟ ବଲାଙ୍ଗୀର ସହରର ଜଣାଶୁଣା ଅପରାଧିଗୋଷ୍ଠୀ ବୋଲି ସୂଚନା ମିଳିଛି । ତେଣୁ ପୋଲିସ ବେଳହୁଁ ପଦକ୍ଷେପ ନନେଲେ ସହରରେ ଅପରାଧିକ କାର୍ଯ୍ୟକଳାପ ବଢିବ ବୋଲି ଜନସାଧାରଣ ଆଶଂକା କରୁଛନ୍ତି । ତେବେ ଏନେଇ ସଦର ଏସଡିପିଓ ସରୋଜ ଉପାଧ୍ୟାୟଙ୍କୁ ପଚାରିବାରୁ ଅପରାଧିଗୋଷ୍ଠୀଙ୍କୁ ଦମନ କରିବାକୁ ପୋଲିସ ପଦକ୍ଷେପ ଆରମ୍ଭ ହୋଇଛି ବୋଲି କହିଛନ୍ତି ।