11-May-2025

ବଲାଙ୍ଗିର- ସମାଜ, ସାହିତ୍ୟ ଓ ସାଂସ୍କୃତିକ ଅନୁଷ୍ଠାନ 'ରଚନା'ର ବାର୍ଷିକ ଉତ୍ସବ ସ୍ଥାନୀୟ ସାମ୍ବାଦିକ ଭବନରେ ପାଳିତ ହୋଇଯାଇଛି। 'ରଚନା'ର ସଭାପତି ସନାତନ ଠାକୁରଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରଥମ ଅଧିବେଶନରେ ମୁଖ୍ୟ ଅତିଥି ଭାବରେ ବିଶିଷ୍ଟ ଗାଳ୍ପିକା ଶ୍ରୀମତୀ ଗାୟତ୍ରୀ ସରାଫ ଏବଂ ମୁଖ୍ୟ ବକ୍ତା ଭାବରେ ବିଶିଷ୍ଟ ପ୍ରାବନ୍ଧିକ ଓ ଶିକ୍ଷାବିତ୍ ଡ଼ ଅଭିରାମ ବିଶ୍ୱାଳ ଯୋଗଦେଇ "ସାହିତ୍ୟରେ ସାମାଜିକ ପ୍ରତିବଦ୍ଧତା" ବିଷୟରେ ଭାବଗର୍ଭକ ମତ ରଖିଥିଲେ। ଏହି ଅବସରରେ 'ରଚନା' ଦ୍ୱାରା ପ୍ରକାଶିତ କବି ମୃଗେଶ ବୈଷ୍ଣବ ପାଣିଗ୍ରାହୀଙ୍କ "ଅମାବାସ୍ୟା ଆକାଶରେ ଜହ୍ନ", କବି ରତ୍ନମୟ ତ୍ରିପାଠୀଙ୍କ 

"କହିଥିଲ ବୋଲି" ଏବଂ ଡାକ୍ତର ଜ୍ୟୋତି ସାହୁଙ୍କ "ଅନବଦ୍ୟ" କବିତା ସଂକଳନ ଅତିଥିମାନଙ୍କ ଦ୍ୱାରା ଉନ୍ମୋଚିତ ହୋଇ ଥିଲା। ସଭା ପରିଚାଳନା କରିଥିଲେ 'ରଚନା'ର ସମ୍ପାଦକ ଭାଗୀରଥି ମିଶ୍ର। 

ଦ୍ଵିତୀୟ ଅଧିବେଶନରେ "ଆଧୁନିକତା ପରିପ୍ରେକ୍ଷୀରେ ଆମ ସଂସ୍କୃତି ଓ ପରମ୍ପରା" ଶୀର୍ଷକ ଆଳାପ ଆଲୋଚନାରେ ସଂସ୍କୃତି-ଗବେଷକ ଅଧ୍ୟାପକ ମୋହନ ସାହୁ, ସାହିତ୍ୟିକା ଡାକ୍ତର ମଞ୍ଜୁବାଳା ପଣ୍ଡା ଓ ଅଧ୍ୟାପକ ଡ. ସଦାଶିବ ମଲ୍ଲିକ ଏବଂ ଅନେକ ବୁଦ୍ଧିଜୀବୀ ଅଂଶଗ୍ରହଣ କରିଥିଲେ। କାର୍ଯ୍ୟକ୍ରମର ସଞ୍ଚାଳନା କରିଥିଲେ 'ରଚନା'ର ଉପସଭାପତି କବି ଆନଂଦ ଚନ୍ଦ୍ର ସାହୁ ଏବଂ ଧନ୍ୟବାଦ ଦେଇଥିଲେ ଅଧ୍ୟାପକ ଜୟ କୁମାର ଆଚାର୍ଯ୍ଯ l

ତୃତୀୟ ଅଧିବେଶନରେ କବି ପ୍ରହଲ୍ଲାଦ ଶତପଥିଙ୍କ ସଭାପତିତ୍ବରେ ଅନୁଷ୍ଠିତ "କବିତା ସହ ପ୍ରୀତି ପାଳିବାର ରୀତି" ଶୀର୍ଷକ ସାମାନ୍ୟ କଥନରେ କବି ନବୀନ ବିଶ୍ୱବନ୍ଧୁ ଓ କବି ବନ୍ଦନା ପଟ୍ଟନାୟକ ନିଜର ମତ ଉପସ୍ଥାପନା କରିବା ସହ ସ୍ୱରଚିତ କବିତା ପାଠ କରିଥିଲେ। ଏହାପରେ କବି ସସ୍ମିତା ନେପାକ, କବି ସବିତା  ମହରା ଏବଂ କବି ମଧୁସୂଦନ ନେଗୀଙ୍କ ମନୋଜ୍ଞ ସଂଯୋଜନାରେ ଅନୁଷ୍ଠିତ ବହୁଭାଷୀ କବିତା ଆସରରେ ୬୦ରୁ ଉର୍ଦ୍ଧ୍ବ କବି ସ୍ୱରଚିତ କବିତା ପାଠ କରିଥିଲେ।