08-May-2025

(ଡୋଲେଶ୍ୱର ବାଗ)
 ନୂଆପଡା ଜିଲ୍ଲା ପୋଲିସ ପକ୍ଷ ରୁ ନିଶା ମୁକ୍ତ ଅଭିଯାନ "ଶୁଦ୍ଧି" ଆରମ୍ଭ ହୋଇଅଛି। ଜିଲ୍ଲା ଆରକ୍ଷୀ ଅଧିକ୍ଷକ ଜି. ଆର. ରାଘବେନ୍ଦ୍ରଙ୍କ ନିର୍ଦ୍ଦେଶକ୍ରମେ  ଜୋଙ୍କ ଥାନା ପୁଲିସ ଅବୈଧ ନିଶା କାରବାର ରେ ସଂପୃକ୍ତ ୩ ଜଣ ଅଭିଯୁକ୍ତଙ୍କୁ ଗିରଫ କରିଥିବାବେଳେ ବିପୁଳ ପରିମାଣର ନିଶା ଔଷଧ ଜବତ କରିଛି । ଏସ୍ ପି  ରାଘବେନ୍ଦ୍ର ଏକ ସାମ୍ବାଦିକ ସମ୍ମିଳନୀରେ ଏହି ବିଷୟରେ ବିସ୍ତୃତ ସୂଚନା ଦେଇଛନ୍ତି ।ଅଭିଯୁକ୍ତମାନେ ହେଲେ ଖରିଆର ରୋଡର ୧୩ ନମ୍ବର ୱାର୍ଡର ଅତାର ମହମ୍ମଦ(୫୫), ସୋହେଲ ମହମ୍ମଦ(୨୩)  ଶାହରୁଖ ଖାନ (୩୨) ।ଏମାନଙ୍କଠାରୁ ୨ଗୋଟି ମୋବାଇଲ ସହ ନିଶା ଯୁକ୍ତ ୬୨୨ଟି ପେଣ୍ଟାଜୋସିନ ଲାକ୍ଟେଟ  ଇଞ୍ଜେକସନ ଜବତ କରାଯାଇଛି । ସୂଚନା ଯୋଗ୍ୟ ଯେ ଗତ ମାସ ୧୩ ତାରିଖଠାରୁ ନୂଆପଡା ଏସପିଙ୍କ ନିର୍ଦ୍ଦେଶକ୍ରମେ  ଜିଲ୍ଲା ବ୍ୟାପି ଅପରେସନ "ଶୁଦ୍ଧି "  ଅବୈଧ ନିଶା କାରବାର ଉପରେ ଚଢାଉ କରି ବେଆଇନ ଡ୍ରଗ୍ ସ୍, ମଦ, ଗଞ୍ଜେଇ, କଫ୍ ଶିରପ ଆଦି ପୋଲିସ୍ ଜବତ କରୁଛି । ବିଶ୍ୱାସନିୟ ସୂତ୍ରରୁ ଖବର ପାଇ ଜୋଙ୍କ ଥାନା ପୁଲିସ ମଙ୍ଗଳବାର ବିଳମ୍ବିତ ରାତ୍ରିରେ ଖରିଆରରୋଡ ସହରର ଓ୍ବାର୍ଡ ନମ୍ବର ୧୩ରେ ଅତାର ମହମ୍ମଦଙ୍କ ଘର ଉପରେ ଅତର୍କିତ ଚଢାଉ କରିଥିଲା । ସେଠାରୁ ଉପରୋକ୍ତ ନିଷିଦ୍ଧ ଇନଜେକ୍ସନ ସବୁ  ଜବତ କରାଯାଇଅଛି।