21-Mar-2025

ଡେଲାଙ୍ଗ(ଦିଲ୍ଲୀପ କୁମାର ଧାଉଡ଼ିଆ): ଓଡ଼ିଆ ଅସ୍ମିତା ଓ ଓଡ଼ିଆ ଖାଦ୍ୟ ପରମ୍ପରାର ଏକ ବୈଶ୍ବିକ ରୂପ 'ବିଶ୍ବ ପଖାଳ ଦିବସ'। ଆହା ଜୀବନ ଧନ ମୋ ପଖାଳ କଂସା' ସ୍ୱରୂପ ବିଶ୍ୱ ପଖାଳ ଦିବସ-୨୦୨୫ ମହାସମାରୋହରେ ବିଜୟ ମଣ୍ଡପ, ରାମଚନ୍ଦ୍ରପୁର, ଡେଲାଙ୍ଗ ଠାରେ ନିଖିଳ ଓଡିଶା ଉପଭୋକ୍ତ ସୁରକ୍ଷା ମହାସଂଘ ଏହି ଦିବସଟି ଗୁରୁବାର ପାଳନ  କରିଛି l କୃଷକ ନେତା ତଥା ପ୍ରାକ୍ତନ ଜିଲ୍ଲାପରିଷଦ ସଦସ୍ୟ ଅଶୋକ ପ୍ରଧାନଙ୍କ ଅଧ୍ୟକ୍ଷତା ଅନୁଷ୍ଠିତ ଏହି ପଖାଳ ସଭାରେ ମୁଖ୍ୟଅତିଥି ଭାବେ ପୁରୀ -ନିମାପଡା କେନ୍ଦ୍ର ସମବାୟ ବ୍ୟାଙ୍କ ଜିଲ୍ଲା ସଭାପତି କିଶୋର ଚନ୍ଦ୍ର ଛୋଟରାୟ, ସମ୍ମାନିତ ଅତିଥି ରୂପେ ନାରୀ ନେତ୍ରୀ ନିରୁପମା ପାତ୍ର, ବରିଷ୍ଠ ସାମ୍ବାଦିକ ତଥା ମହାସଂଘ ର ଉପଦେଷ୍ଟା ପ୍ରସନ୍ନ ତ୍ରିପାଠୀ, ଯୁବ ସଂଗଠକ ବିଶ୍ବରଞ୍ଜନ ବଳବନ୍ତରାୟ, ପ୍ରକାଶ ଧଳ, ଆର୍ତ୍ତବନ୍ଧୁ ସାମନ୍ତରାୟ, ପ୍ରକାଶ ଚନ୍ଦ୍ର ସାମଲ, ବିରଜା ପ୍ରସାଦ ପଟ୍ଟନାୟକ ପ୍ରମୁଖ ଯୋଗ ଦେଇଥିଲେ ! ଉପଭୋକ୍ତା ମହାସଂଘର ରାଜ୍ୟ ସଭାପତି ଚିତ୍ରସେନ ନିଶଙ୍କ ସ୍ୱାଗତ ଭାଷଣ ଦେବା ସହ ଅତିଥି ପରିଚୟ ପ୍ରଦାନ କରିଥିବେଳେ ମହାସଂଘର ସଂଯୋଜକ ପ୍ରଦୀପ କୁମାର ନାୟକ ମଞ୍ଚ ପରିଚାଳନା କରିଥିଲେ l ଭୃଷଙ୍ଗାପତ୍ର-ଦହି-ଛୁଙ୍କା-ପଖାଳ ସହ ପାରମ୍ପରିକ ବଡ଼ିଚୁରା, କୋଶଳା ଶାଗ ରାଇ, ଆଳୁ-ବାଇଗଣ ଭର୍ତା, ଭେଣ୍ଡି ଭଜା, ସଜନା ଛୁଇଁ ଭଜା, ଆଳୁ-କଲରା ଭଜା, ଚଟଣୀ ଖଟା, ସୋରା ସୋରା କାକୁଡ଼ି-ପିଆଜ ସହ ମିଟିକାଳି, ଚିଙ୍ଗୁଡ଼ିର କଡ଼ା ଭଜାର ମହକରେ ପଖାଳ ଦିବସଟି ମହକି ଗଲା ବେଳେ ତୋରାଣି-ଛଣା-ନିଶ ଚର୍ଚ୍ଚା ପରିବେଶକୁ ଓଡ଼ିଆ ଭାବରେ ଉଷ୍ଣ କରିଥିଲା। କାର୍ଯ୍ୟକ୍ରମର ଅନ୍ୟତମ ଆକର୍ଷଣ ଥିଲା ପଖାଳକୁ ନେଇ ଅତିଥିମାନଙ୍କ ଚର୍ଚ୍ଚା ! କାର୍ଯ୍ୟକ୍ରମଟି ଅଞ୍ଚଳବାସୀଙ୍କ ପାଇଁ ପ୍ରେରଣାପ୍ରଦ ଓ ଦୃଷ୍ଟାନ୍ତମୂଳକ ହେବ ବୋଲି ଅତିଥିମାନେ ମତାମତ ରଖିଥିଲେ।ଏଥିରେ ଦୁଇ ଶହରୁ ଉର୍ଦ୍ଧ୍ୱ ମହାସଂଘର ବିଭିନ୍ନ ଜିଲ୍ଲର କର୍ମକର୍ତ୍ତା, ଗଣମାଧ୍ୟମ ପ୍ରତିନିଧି,  ବୁଦ୍ଧିଜୀବୀ, ସମାଜସେବୀ, କୃଷକ, ଉପଭୋକ୍ତା ମାନେ ସାମିଲି  ହୋଇ ଥିଲେ l ଶେଷରେ ଶିକ୍ଷକ ଅଭୟ ଚରଣ ସାହୁ ଧନ୍ୟବାଦ ଅର୍ପଣ କରିଥିଲେ l