26-May-2024

ବଲାଙ୍ଗିର(ପ୍ରେରଣା ଖବର) ଯୁକ୍ତ ଦୁଇ ବିଜ୍ଞାନ ପରୀକ୍ଷାରେ ପଶ୍ଚିମ ଓଡିଶାରେ ପୁଣି ବାଜିମାରିଲା ବଲାଙ୍ଗିର ସ୍ଥିତ ଯୁବୋଦୟ ଉଚ୍ଚ ମାଧ୍ୟମିକ ବିଦ୍ୟାଳୟ । ସମଗ୍ର ଓଡିଶାରେ ଶତ ପ୍ରତିଶତ ପାସ ହାର ରଖିଥିବା ମାତ୍ର କିଛି ଶିକ୍ଷାନୁଷ୍ଠାନ ମଧ୍ୟରେ ଯୁବୋଦୟ ସ୍ଥାନ ପାଇଛି । ଏହି ଶିକ୍ଷାନୁଷ୍ଠାନର ୧୩ ଜଣ ଛାତ୍ରଛାତ୍ରୀ ୯୦%ରୁ ଅଧିକ ମାର୍କ ରଖିପାରିଛନ୍ତି ଯାହାକି ସମଗ୍ର ପଶ୍ଚିମ ଓଡିଶାରେ ସର୍ବାଧିକ। ଯୁବୋଦୟରୁ ୪୮୫ ରେଗୁଲାର ଛାତ୍ରଛାତ୍ରୀ ପରୀକ୍ଷା ଦେଇଥିବା ବେଳେ ୪୭୩ ଜଣ ଛାତ୍ରଛାତ୍ରୀ ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇଥିବାବେଳେ ମାତ୍ର ୧୩ ଜଣ ଛାତ୍ରଛାତ୍ରୀ ଦ୍ୱିତୀୟ ଶ୍ରେଣୀରେ ଉତ୍ତୀର୍ଣ୍ଣ ହୋଇଛନ୍ତି । ଏହି ଶିକ୍ଷାନୁଷ୍ଠାନରୁ ସର୍ବାଧିକ ପାଞ୍ଚଜଣ ଛାତ୍ରଛାତ୍ରୀ ରାଜ୍ୟସ୍ତରରେ ପ୍ରଥମ ଦଶ ର‌୍ୟାଙ୍କ୍ ମଧ୍ୟରେ ରହିପାରିଛନ୍ତି । ସେମାନେ ହେଲେ ପ୍ରଜ୍ଞା ପରିମିତା ପଧାନ (୫୬୦), ରଚିତ କୁମାର ପଧାନ (୫୬୦), ଆୟୁଷ ମେହେର (୫୫୭), ପ୍ରଜ୍ଞା ପଣ୍ଡା (୫୫୭) ଓ ସ୍ୱପ୍ନିଲ କୁମାର ସାହୁ (୫୫୭) । ଅନ୍ୟମାନଙ୍କ ମଧ୍ୟରେ ସୋନୁ ସାହୁ (୫୫୦), ଶୁଭମ ଅଂଶୁମାନ ପୁଟେଲ (୫୪୪), ଭାରତୀ ରଥ (୫୪୨), ନିକିତା ସ୍ୱାଇଁ (୫୪୦), ଭୂୟସୀ ସାହୁ (୫୪୦), ରୁଚିସ୍ମିତା ପଧାନ (୫୪୦), ଶ୍ରୀତମ କୁମାର ପଣ୍ଡା (୫୪୦) ଓ ଆୟୁଷ୍ମାନ ଭୋଇ (୫୪୦) ୯୦%ରୁ ଅଧିକ ମାର୍କ ରଖିଥିବାର କୃତିତ୍ୱ ହାସଲ କରିଛନ୍ତି । ୮୦ ଜଣ ଛାତ୍ରଛାତ୍ରୀ ୫୦୦ରୁ ଅଧିକ ମାର୍କ ରଖିବାର ଗୌରବ ଲାଭ କରିଛନ୍ତି । ଆୟୁଷ୍ମାନ ଭୋଇ, ପ୍ରଜ୍ଞା ପରିମିତା ପଧାନ, ମଞ୍ଜିତ ପଧାନ, ଆୟୁଷ ମେହେର, ଓମ୍ ପ୍ରକାଶ ସାହା, ଭୂୟସୀ ସାହୁ ଓ ପ୍ରଜ୍ଞା ପଣ୍ଡା, ସୁନୀଲ କୁମାର ସାହୁ ପଦାର୍ଥ ବିଜ୍ଞାନରେ ୧୦୦ ପ୍ରତିଶତ ମାର୍କ ରଖିଥିବା ବେଳେ ମଞ୍ଜିତ ପଧାନ, ପ୍ରଜ୍ଞା ପରିମିତା ପଧାନ ଓ ଆୟୁଷ୍ମାନ ଭୋଇ ରସାୟନ ବିଜ୍ଞାନରେ ଏବଂ  ସ୍ୱପ୍ନିଲ କୁମାର ସାହୁ ଗଣିତରେ ମଧ୍ୟ ୧୦୦ ପ୍ରତିଶତ ମାର୍କ ରଖିଛନ୍ତି । ପ୍ରଜ୍ଞା ପରିମିତା ପଧାନ ପଦାର୍ଥ ବିଜ୍ଞାନ, ରସାୟନ ବିଜ୍ଞାନ, ପ୍ରାଣୀ ବିଜ୍ଞାନ ଓ ଉଭିଦ ବିଜ୍ଞାନରେ ୧୦୦ ପ୍ରତିଶତ ମାର୍କ ରଖି ଏକ ବିରଳ କୃତିତ୍ୱ ହାସଲ କରିଛନ୍ତି ।
    ପ୍ରକାଶ ଥାଉକି ଏହି ଶିକ୍ଷାନୁଷ୍ଠାନର ୪୨ ଜଣ ଛାତ୍ରଛାତ୍ରୀ ଜେଇଇ ମେନ୍ ପରୀକ୍ଷାରେ ୯୦ ପରସେଟାଇଲରୁ ଅଧିକ ମାର୍କ ରଖି ଆଇ ଆଇ ଟି ତଥା ଏନ ଆଇ ଆଇ ଟି ଭଳି ସୁନାମଧନ୍ୟ ଶିକ୍ଷାନୁଷ୍ଠାନମାନଙ୍କରେ ବୈଷୟିକ ଶିକ୍ଷାଗ୍ରହଣ କରିବାର ଆଶାକୁ ଉଜ୍ଜୀବିତ ରଖିଛନ୍ତି । ଚଳିତବର୍ଷ ମେଡିକାଲ ପ୍ରବେଶିକା ପରୀକ୍ଷାରେ ମଧ୍ୟ ପ୍ରାୟ ୧୨ ଜଣ ଛାତ୍ରଛାତ୍ରୀ ପ୍ରଥମ ଥରରେ ଏମସ୍ ତଥା ସରକାରୀ ମେଡିକାଲ କଲେଜରେ ଅଧ୍ୟୟନ କରିବାକୁ ଆଶାୟୀ ଅଛନ୍ତି ।