13-Dec-2020

ଭୁବନେଶ୍ୱର,(ଶୁଭାଶିଷ ନାୟକ) :ଓଡିଶାରୁ ରାୟଗଡା ଜିଲ୍ଲାରୁ,କୋରାପୁଟ ଜିଲ୍ଲା ତଥା ବଲାଙ୍ଗୀର ଜିଲ୍ଲା ରୁ ଅବାଧରେ ବାହାର ରାଜ୍ୟକୁ ରତ୍ନପଥର ଚୋରା ଚାଲାଣ କରାଯାଉଛି । ଦୀର୍ଘ ବର୍ଷ ଧରି ମାଫିଆମାନେ ଏହି କାରବାର ଚଳାଇଥିଲେ ମଧ୍ୟ ଏଥିରେ ଲଗାମ ଲାଗି ପାରିନାହିଁ । ସୋମବାର କ୍ରାଇମବ୍ରାଞ୍ଚ ଏସଟିଏଫ ରାୟଗଡା ସହରରୁ ଅମ୍ବାଦଲା ଥାନା ଅଧୀନ ବିଜାବନ୍ଦାଳି ଗ୍ରାମର ଜିତେନ୍ଦ୍ର କୁମାର ବେହେରାଙ୍କ ନିକଟରୁ ପ୍ରାୟ ୨୦ ପ୍ରକାର ରତ୍ନପଥର (୧୫୧କେ. ଜି) ଜବତ କରିବା ପରେ ଏହା ପଦରେ ପଡିଛି । ଜିଲାରେ ବନ୍ଦ ହୋଇଥିବା ରତ୍ନ ଖଣିଗୁଡିକରୁ ମାଫିଆମାନେ ବିପୁଳ ପରିମାଣର ରତ୍ନପଥର ଲୁଟି ନେଉଥିବାବେଳେ ଓଡ଼ିଶା ଖଣି ନିଗମ ଓ ପ୍ରଶାସନ ଚୁପ ବସିଥିବା ନେଇ ଜିଲ୍ଲାରେ ଅସନ୍ତୋଷ ବଢୁଛି । ବଲାଙ୍ଗୀର ଜିଲ୍ଲାର କଣ୍ଟାବାଞ୍ଜି ଅଧିନସ୍ଥ ତୁରେକେଲା ଅଞ୍ଚଳ ର ସୁର୍ମା  ଖଦାନ ଅଞ୍ଚଳ ରୁ ସଂଗୃହିତ ମୂଲ୍ୟବାନ ରତ୍ନପଥର ଦୀର୍ଘ ଦିନ ଧରି ଚାଲି ଆସୁଛି ।

ସେହିପରି ରାୟଗଡା 
ଜିଲ୍ଲାର ବିସମକଟକ ବ୍ଲକ ପାଇକ ଡାକୁଲୁଗୁଡାରେ ଟିବା ବୈଦୁର୍ଯ୍ୟ ଖଣିରୁ ପ୍ରତିଦିନ ରତ୍ନପଥର ଖୋଲାଯାଇ ବିଭିନ୍ନ ସ୍ଥାନକୁ ଚୋରାଚାଲାଣ ହୋଇଛି । ଜିଲ୍ଲାର ବିଭିନ୍ନ ରତ୍ନପଥର ଖଣି ଅଞ୍ଚଳରେ ମାଫିଆମାନେ ଆଡ୍ଡା ଜମାଇ ସ୍ଥାନୀୟ ଲୋକଙ୍କ ସହାୟତାରେ ରତ୍ନପଥର ଖୋଳୁଥିବା ଅଭିଯୋଗ ହୋଇଛି । ଏହା ବ୍ୟତୀତ ବିସମକଟକ ବ୍ଳକ ଅନ୍ତର୍ଗତ ରାସପଲ୍ଲା,ମିନୁଗୁଡା ବ୍ଳକର ଦହିଖାଲ ଏବଂ ରାୟଗଡ଼ାର ଇରୁକୁଠାରେ ମଧ୍ୟ ରତ୍ନପଥର ଖଣି ରହିଥିବା କୁହାଯାଇଛି । କିନ୍ତୁ ଏସବୁ ଖଣି ବିଷୟରେ ଖଣି ନିଗମ ନିକଟରେ କୌଣସି ସୂଚନା ନାହିଁ ।

    ରାୟଗଡା ଜିଲ୍ଲା ବିସମକଟକ ବ୍ଳକ ପାଇକପଡ଼ା ଓ କଲଗୁଡା ଗ୍ରାମରେ ୨ଟି କ୍ୟାଟ୍ସ ସାଇଜ ରତ୍ନପଥର ଖଣି ରହିଥିବା ବେଳେ କୋରାପୁଟ ସ୍ଥିତ ଖଣି ବିଜୟ ଗୁପ୍ତା ନାମକ ବ୍ୟକ୍ତିଙ୍କୁ ଲିଜରେ ଦିଆଯାଇଛି । କିନ୍ତୁ ଏପର୍ଯ୍ୟନ୍ତ ଏଠାରୁ ରତ୍ନପଥର ଉତ୍ତୋଳନ ନିମନ୍ତେ ପରିବେଶ ମଞ୍ଜୁରୀ, ମାଇନିଂ ପ୍ଲାନ ଆଦି ବିଭିନ୍ନ ପ୍ରାଥମିକ  କାଗଜପତ୍ର ହୋଇ ନ ଥିବା ସେ କହିଛନ୍ତି । କିନ୍ତୁ ଅଭିଭକ୍ତ କୋରାପୁଟ ଜିଲ୍ଲାରେ ରତ୍ନପଥର ଖଣିରୁ ବେଆଇନ ଚାଲାଣ ନେଇ ତାଙ୍କୁ ପଚାରିବାକୁ ସେ ଏହାକୁ ଅସ୍ବୀକାର କରିଛନ୍ତି । 

ଉଲ୍ଲେଖଯୋଗ୍ୟ ୧୨ବର୍ଷ ତଳେ ରାୟଗଡା ଜିଲ୍ଲାର ଡାକୁଲୁଗୁଡା ପାହାଡରେ ରତ୍ନପଥର ଖଣି ସନ୍ଧାନ ମିଳିଛି  । ସେତେବେଳେ ଖଣି ନିଗମ ପକ୍ଷରୁ ଉକ୍ତ ସ୍ଥାନରେ ଖନନ କରାଯିବା ପାଇଁ ଉଦ୍ୟମ ଆରମ୍ଭ ହୋଇଥିଲା । କିନ୍ତୁ ସରକାର ଏହାକୁ ହାତକୁ ନ ନେବା ଯୋଗୁ ଖଣି ମାଫିଆମାନେ ଏହାର ଫାଇଦା ନେଲେ । ୨୦୧୮ ରେ ଏଠାରୁ ଦଲାଲମାନେ ସ୍ଥାନୀୟ ଲୋକଙ୍କ ସହାୟତାରେ ପ୍ରାୟ ୧୫୦-୨୦୦ଫୁଟ୍ ଗଭୀରରେ ଖଣି ଖୋଲିଥିଲେ । ଏହା ଜାଣିବା ପରେ ଗୁଣପୁର ଉପଜିଲ୍ଲାପାଳଙ୍କ ନୋଟିସ ଅନୁଯାୟୀ ବିସମକଟକ ତହସିଲଦାର ଏବଂ ମୁନିଗୁଡା ପୋଲିସ ପକ୍ଷରୁ ଖଣି ଅଞ୍ଚଳରେ ୧୪୪ ଧାରା ଜାରି କରାଯାଇଥିଲା । ପୋଲିସର କଡା ନଜରରେ ଖଣି ଅଞ୍ଚଳ ରହିଥିଲା । କିନ୍ତୁ କୌଣସି ଅପ୍ରୀତିକର ପରିସ୍ଥିତି ଦେଖା ନ ଦେବାରୁ ୨ମାସ ପରେ କଟକଣା ହଟିଥିଲା ।
୨୦୧୯ରେ ଓଏମସି ଏବଂ ପରିବେଶ ବିଭାଗ ପକ୍ଷରୁ ଏଠାରେ  ଜନଶୁଣାଣୀ କରାଯାଇ ଖଣି ଖନନ ପାଇଁ ଲୋକଙ୍କ ମତାମତ ଲୋଡ଼ାଯାଇଥିଲା । ପ୍ରଶାସନ ପକ୍ଷରୁ ଖଣି ଚାରିପଟେ ତାରବାଡ଼ ଦିଆଯାଇଥିଲା । ଲୋକେ ମଧ୍ୟ ଖଣି ଖନନ ହେଲେ ସ୍ଥାନୀୟ ବାସିନ୍ଦା ରୋଜଗାର ପାଇବା ସହ ଅଞ୍ଚଳର ବିକାଶ ହେବ ବୋଲି ଆଶା ବାନ୍ଧିଥିଲା । ହେଲେ ଏ ପର୍ଯ୍ୟନ୍ତ କାମ ଆରମ୍ଭ ହେଲାନାହିଁ । କୌଣସି କାମ ନ ହେବାରୁ ଏବେ ଏହି ଅଞ୍ଚଳ ରତ୍ନପଥର ମାଫିଆଙ୍କ ପାଇଁ ଭୂସ୍ବର୍ଗ ପାଲଟିଛି । ଏହି ଖଣିରେ ଉତ୍କୃଷ୍ଟ ଧରଣର ରତ୍ନପଥର ବହାରୁଥିବାରୁ ଦେଶର ବିଭିନ୍ନ ଅଞ୍ଚଳର ବ୍ୟବସାୟୀ ସ୍ଥାନୀୟ ଲୋକଙ୍କ ସହାୟତାରେ ରତ୍ନପଥର ଲୁଟି ନେଉଥିବା ଡାକୁଲୁଗୁଡା ଗ୍ରାମର ବୁଦ୍ଧିଜୀବୀ ପ୍ରଶାନ୍ତ କୁମାର କହିଛନ୍ତି । 
ସୂଚନାନୁଯାୟୀ ଯଦି ଖଣି ଖନନ ପାଇଁ ପରିବେଶ ମଞ୍ଜୁରୀ, ମଇନିଂ ପ୍ଲାନ ଏବଂ ଅନ୍ୟ କାଗଜପତ୍ର ହୋଇନାହିଁ,ତେବେ ୨୦୧୯ରେ କିପରି ପଲ୍ଲିସଭା  କରାଯାଇଥିଲା ତାହାକୁ ନେଇ ପ୍ରଶ୍ନ ଉଠିଛି । ଅନ୍ୟପକ୍ଷରେ ବେଆଇନ ରତ୍ନପଥର ଚାଲାଣ ହେଉଥିଲେ ମଧ୍ୟ ସ୍ଥାନୀୟ ପ୍ରଶାସନ ଏବଂ ପୋଲିସ ପକ୍ଷରୁ ସେପରି କଡା ଯାଞ୍ଚ କରାଯାଉ ନ ଥିବାରୁ ମାଫିଆମାନେ ବେଧଡକ ଚୋରାଚାଲାଣ କରୁଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । ଏହି ରତ୍ନପଥର ଖଣି ମାଧ୍ୟମରେ ସରକାରଙ୍କ ବିପୁଳ ପରିମାଣରେ ରାଜସ୍ୱ ଆଦାୟ ହୋଇପାରିବ । କିନ୍ତୁ  ବହୁ ଲୁକ୍କାୟିତ ଖଣି ସରକାର ହାତକୁ ନ ଯିବା ଖଣିନିଗମ ଅଜଣା ଭଳି ରହିବା ଯୋଗୁ ବିପୁଳ ରାଜ୍ୟର ରାଜସ୍ୱ ହାନି ଘଟୁଛି  ।
ଏ ଦିଗରେ ପ୍ରଶାସନର ବେଖାତିର କାହିଁକି ବୋଲି ଅଞ୍ଚଳର ବୁଦ୍ଧିଜୀବୀଙ୍କ ମଧ୍ୟରେ ପ୍ରଶ୍ନବାଚୀ ସୃଷ୍ଟି କରିଛି । ଅନ୍ୟପକ୍ଷରେ ରତ୍ନପଥର ଲୁଟ ବିଷୟରେ ସ୍ଥାନୀୟ ତହସିଲଦାର ଶୁଭେନ୍ଧୁ କୁମାର ଜେନାଙ୍କୁ ପଚାରିବାରୁ ସେ କହିଛନ୍ତି,ଜନଶୁଣାଣୀ ପରେ ଖଣି ନିଗମ ପକ୍ଷରୁ କୌଣସି ପଦକ୍ଷେପ ନିଆଯାଇନାହିଁ । ସେହିପରି ରତ୍ନପଥର ଚୋରାଚାଲାଣ ନେଇ ତାଙ୍କ ନିକଟରେ କୌଣସି ଅଭିଯୋଗ ନ ଥିବା ସେ କହିଛନ୍ତି ।