30-Dec-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) ବହୁ ଅଭିଯୋଗ , କଟକଣା ଓ ବିବାଦୀୟ ଘଟଣାପରେ ବି ବଲାଙ୍ଗୀର ଜିଲ୍ଲାରେ ବେଆଇନ୍ ଦାଦନଶ୍ରମିକ ଚାଲାଣ ଅବ୍ୟାହତ ରହିଛି । ବିଡମ୍ବନା ଯେ ଏଥିରେ ପ୍ରତିବନ୍ଧକ ସାଜିଛନ୍ତି ଶ୍ରମ ବିଭାଗର ଅଧିକାରୀ ।  ଜିଲ୍ଲାର  ଶ୍ରମବିଭାଗ ପକ୍ଷରୁ ଶ୍ରମିକ ଚାଲାଣ ନିମନ୍ତେ ବିଧିବଦ୍ଧ ଭାବେ ଲାଇସେନ୍ସ ପାଇଥିବା ଶ୍ରମିକ ଠିକାଦାର ବା ସର୍ଦ୍ଦାରମାନେ ବାହାରକୁ କାମ ପାଇଁ ଯିବାକୁ ଚାହୁଁଥିବା ଶ୍ରମିକଙ୍କର ମୁଭ୍ ମେଣ୍ଟ ଅର୍ଡର ପାଇଁ ଦୀର୍ଘ ୭୦ / ୮୦ କିମି ଜିଲ୍ଲା ଶ୍ରମ ଅଧିକାରୀଙ୍କ ଅଫିସ୍ କୁ ମାସାଧିକକାଳ ଧାଇଁ ଧାଇଁ ନିରାଶ ହୋଇପଡୁଛନ୍ତି । ଅପରପକ୍ଷେ ସେହି ଠିକାଦାରଙ୍କ ଠାରୁ ଚୁକ୍ତିବଦ୍ଧ ହୋଇ ଅଗ୍ରୀମ ଟଙ୍କା ନେଇଥିବା ଶ୍ରମିକମାନେ ଅନ୍ୟ ବେଆଇନ ସର୍ଦ୍ଦାରମାନଙ୍କ କ ବ୍ ଜା କୁ ପଳାଇଯାଉଥିବାରୁ ଜିଲ୍ଲାରେ ବେଆଇନ୍ ଦାଦନଶ୍ରମିକ ଚାଲାଣ ବୃଦ୍ଧି ପାଉଥିବା ଜଣାପଡିଛି । ଏ ସମ୍ପର୍କରେ ବଲାଙ୍ଗୀର ଜିଲ୍ଲା ଶ୍ରମ ଅଧିକାରୀଙ୍କୁ ପଚାରିବାରୁ ସେ ଆଜି ମୁଁ ଅମୁକ ମିଟିଂରେ ଅଛି ' , 'କାଲି ଫିଲ୍ଡକୁ ଯାଇଥିଲି ' , ଆଉ କେବେ ' ଗୋଟିଏ ଜରୁରୀ କାମରେ ବ୍ୟସ୍ତ ରହିଗଲି ' ଇତ୍ୟାଦି ସଫେଇ ଦେଉଛନ୍ତି । କିନ୍ତୁ  ସର୍ଦ୍ଦାରମାନଙ୍କଠାରୁ ଉତ୍କୋଚ ନେବାକୁ ସେ ଏପରି ଫନ୍ଦିଫିକର କରୁଥିବା ଅଭିଯୋଗ କରାଯାଉଛି । ଯଦିଓ ଉକ୍ତ ଅଧିକାରୀ ଏଭଳି ଅଭିଯୋଗକୁ ଅସ୍ବୀକାର କରନ୍ତି । ତେବେ ଜିଲ୍ଲାର ଦୂରଦୂରାନ୍ତରରୁ ମୁଭ୍ ମେଣ୍ଟ ଅର୍ଡର ବା କୌଣସି ସରକାରୀ କାଗଜପତ୍ର କାମ ପାଇଁ ଆସୁଥିବା ଶ୍ରମିକଠିକାଦାର ବା ଅନ୍ୟବ୍ୟକ୍ତିବିଶେଷଙ୍କ ପାଇଁ ଜିଲ୍ଲା ଶ୍ରମ ଅଧିକାରୀ ତାଙ୍କ ଅଫିସ୍ ର ଅନ୍ୟ କୌଣସି ଅଧସ୍ତନ କର୍ମଚାରୀଙ୍କୁ ଏହି ଦାୟିତ୍ୱ ଦେବାକୁ ଅନୁରୋଧ କରାଯାଉଛି ।

ଉଲ୍ଲେଖଯୋଗ୍ୟ ଯେ , ବଲାଙ୍ଗୀର ଜିଲ୍ଲା ଶ୍ରମ ଅଧିକାରୀଙ୍କ କାର୍ଯ୍ୟାଳୟ ବନାମ ବଲାଙ୍ଗୀର ଯୁଗ୍ମ ଶ୍ରମ କମିଶନରଙ୍କ ଅଫିସ୍ ଟି ବହୁଦିନରୁ ଲାଞ୍ଚଖୁଞ୍ଚ ମାମଲାରେ ବଦନାମ ହୋଇଯାଇଛି । ଗତବର୍ଷ ଏହି ଅଫିସ୍ ର ଜଣେ କିରାଣୀ ଓ ଜଣେ ଯୁଗ୍ମ ଶ୍ରମ କମିଶନରଙ୍କୁ ଭିଜିଲାନ୍ସ ଧରିଥିଲା । ଜିଲ୍ଲାରୁ ପ୍ରତିବର୍ଷ ପ୍ରକୃତରେ କେତେ ଶ୍ରମିକ ବାହାରକୁ ଯାଆନ୍ତି , ତାହାର ସଠିକ୍ ତଥ୍ୟ ସରକାରଙ୍କୁ ପ୍ରଦାନ କରାଯାଉ ନଥିବା ସହିତ ଦାଦନଶ୍ରମିକ ଶୋଷଣ ବା ନିର୍ଯାତନା କି ରାଜ୍ୟବାହାରେ ଦାଦନଶ୍ରମିକଙ୍କ ମୃତ୍ୟୁ ଇତ୍ୟାଦି ମାମଲାର ସଠିକ୍ ତଦନ୍ତ କ୍ଷେତ୍ରରେ ଅବହେଳା କରାଯାଇଆସୁଥିବା ବହୁ ଅଭିଯୋଗ ପ୍ରକାଶ ପାଇ ଆସୁଛି । ଏହି ଅଫିସ୍ ର କର୍ମଚାରୀମାନେ ମଧ୍ୟ ଅଭିଯୋଗମୁକ୍ତ ନୁହଁନ୍ତି । ବେଆଇନ୍ ଦାଦନଶ୍ରମିକ ଚାଲାଣକୁ ରୋକିବା ଦିଗରେ ଏହି ଅଫିସ୍ ଓ ଅଧିକାରୀଙ୍କ କାର୍ଯ୍ୟକଳାପ ସନ୍ତୋଷଜନକ ନୁହେଁ । ବଲାଙ୍ଗୀର ଜିଲ୍ଲାରେ ପୁଲିସ୍ ଓ ଶ୍ରମଅଧିକାରୀଙ୍କ ବିରୋଧରେ ବଟି ଖାଉଥିବା ସହ ନିକଟରେ କଣ୍ଟାବାଞ୍ଜିରେ କେତେକ ଆନ୍ଧ୍ର ଦାଦନସେଠଙ୍କ ଠାରୁ ଲକ୍ଷ ଲକ୍ଷ ଟଙ୍କା ହଡପ କରି ଜଣେ ଡିଏସପି ନିଲମ୍ଵିତ ହୋଇଥିବା ଘଟଣା ଘଟିଛି । ଏଣୁ ସରକାର ଏଥିପ୍ରତି ଦୃଷ୍ଟିଦେବାକୁ ଜନସାଧାରଣଙ୍କ ପକ୍ଷରୁ ଦାବି ହୁଏ ।