17-Aug-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ ):  ଗତ ୫ ତାରିଖ ଦିନ ଅପରାହ୍ନ ପ୍ରାୟ ୪ଟା ବେଳେ ପାଟଣାଗଡ ମୁଖ୍ୟ ରାସ୍ତାରେ ଥିବା ' ଅମୃତ କଳସ ' ସୁନାଅଳଙ୍କାର ଦୋକାନରେ ସଶସ୍ତ୍ର ଡକାୟତମାନେ ଦୋକାନମାଲିକ ପାଟଣାଗଡ ରାମପୁରର ମୁକେଶ ଜୈନଙ୍କୁ ପିସ୍ତଲ୍ ମୁନରେ ପ୍ରାୟ ଦେଢ କେଜିରୁ ଅଧିକ ସୁନାଅଳଙ୍କାର ଓ ୪୨ ହଜାର ଟଙ୍କା ଲୁଟିନେଇ ଦୋକାନମାଲିଙ୍କୁ ରକ୍ତାକ୍ତ ଆହତ କରି ଜନଗହଳ ରାସ୍ତାରେ ଦୁଇଟି ବାଇକ୍ ରେ ଫେରାର୍ ହୋଇଯାଇଥିଲେ । ଏହି ଘଟଣାରେ ଚାରିଆଡେ ଚାଞ୍ଚଲ୍ଯ ଖେଳିଯିବା ସହିତ ଥାନାଠାରୁ ମାତ୍ର ଦୁଇଶହ ମିଟର ଦୂରରେ ଥିବା ଏହି ଘଟଣାସ୍ଥଳରେ ଏଭଳି ସ୍ପଷ୍ଟଦିବାଲୋକର ସଶସ୍ତ୍ରଲୁଟ୍ ପୁଲିସ୍ ପାଇଁ ଚାଲେଞ୍ଜ୍ ସୃଷ୍ଟି କରିଥିବା ସହ ପୁଲିସ୍ କୁ ତୀବ୍ର ସମାଲୋଚନା କରାଯାଇ ବଣିକ ସଂଘ ସମେତ ବିଭିନ୍ନ ସଂଗଠନ ପକ୍ଷରୁ ବଲାଙ୍ଗୀର ଏସ୍ ପି ଙ୍କୁ ଅଭିଯୋଗ କରାଯାଇଥିଲା । ତେବେ ଆଜି ପାଟଣାଗଡ ବଣିକ ସଂଘ ପକ୍ଷରୁ ପାଟଣାଗଡ ବନ୍ଦ ଡାକରା ଦିଆଯିବାର ଥିଲାବେଳେ , ପୂର୍ବରୁ ଅଟକ ରଖାଯାଇ ଜେରା ଚାଲିଥିବା ଏହି ମାମଲାର ୪ ଜଣ ସ୍ଥାନୀୟ ଡକାୟତି ଅଭିଯୁକ୍ତଙ୍କୁ ପୁଲିସ୍ ଗିରଫ କରି କୋର୍ଟଚାଲାଣ କରିଛି । ସେମାନେ ହେଲେ , ରାମପୁରର ଆବାଜ ମେହେର ( ୩୪ ) , ପାଟଣାଗଡ ଥାନା ସମଲେସର ଗ୍ରାମର ଡାକ୍ତର ବଗର୍ତ୍ତୀ  (୩୭ ) , ବରଗଡ ଜିଲ୍ଲା ବିଜେପୁର ଥାନା ବାଦିପାଲିର ଚନ୍ଦ୍ରମଣୀ ମେହେର ( ୨୪ ) , ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ଥାନା ଖୁଟପାଲି ଗ୍ରାମର ଅଲେଖ ବଢେଇ (୨୮ ) । ସେମାନଙ୍କଠାରୁ ଡକାୟତିରେ ବ୍ୟବହୃତ କୁହାଯାଉଥିବା ଏକ ପଲସର୍ ବାଇକ୍ , ଏକ ଦେଶୀ ପିସ୍ତଲ୍ ସହ ୨ଟି ଜୀବନ୍ତ ଗୁଳି , ୪୨ ହଜାର ୫୦୦ ଟଙ୍କା ଓ  ଦୋକାନର ଜଣେ ମହିଳା କର୍ମଚାରୀଙ୍କଠାରୁ ଲୁଟି ନେଇଥିବା ଏକ ସାମସଙ୍ଗ୍ ମୋବାଇଲ୍ ଫୋନ୍ ପୁଲିସ୍ ଜବତ କରିଥିବା ପ୍ରକାଶ । ଏହି ମାମଲାର ମୁଖ୍ୟ ସମେତ ଅନ୍ୟ ୪ ଜଣ ରାଜ୍ୟବାହାରର ଡକାୟତ ସମସ୍ତ ସୁନା ନେଇ ରାଜ୍ୟ ବାହାରକୁ ପଳାଇଯାଇଥିବା ପୁଲିସ୍ କହିଛି । ଦୋକାନମାଲିକଙ୍କଠାରୁ ଡକାୟତମାନେ ଲୁଟିନେଇଥିବା ଆଉ ଏକ ମୋବାଇଲ୍ ଟିକୁ କିଛିଦୂରରେ ସରସ୍ବତୀ ଶିଶୁ ମନ୍ଦିର ପାଖରେ ଫିଙ୍ଗିଦେଇଥିବାରୁ ପୁଲିସ୍ ତାହା ପାଇ ମାଲିକଙ୍କୁ ଫେରାଇ ଦେଇଥିବା ପ୍ରକାଶ ।

ଏହି ୪ ଜଣ ଗିରଫ ଅଭିଯୁକ୍ତମାନଙ୍କ ବିରୁଦ୍ଧରେ ବିଭିନ୍ନ ଥାନାରେ ପୂର୍ବରୁ ଏକାଧିକ ଏଭଳି ମାମଲା ରହିଛି ଓ ସେମାନେ ବିଭିନ୍ନ ମାମଲାରେ ଜଡିତ ରହିଆସିଥିବା ଦାଗୀ ବୋଲି କୁହାଯାଉଛି । ଏହି ଗିରଫଦାରୀରେ ପୁଲିସ୍ କୁ ପ୍ରଶଂସା କରାଯାଇଥିବାବେଳେ , କେତେକ ମହଲରେ ଭିନ୍ନ ଆଲୋଚନା ମଧ୍ୟ ଶୁଣାଯାଉଛି । ତେବେ ଘଟଣାର ମାତ୍ର ଦଶ / ବାର ଦିନ ମଧ୍ୟରେ ଏହି ଚାଞ୍ଚଲ୍ୟକର ଡକାୟତି ଘଟଣା ସହିତ ଖପ୍ରାଖୋଲ ରାସ୍ତାଲୁଟ୍ ଘଟଣାର ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିଥିବାର ସମସ୍ତ ଶ୍ରେୟ ବଲାଙ୍ଗୀର ଏସ ପି ନୀତିନ୍ କୁଶଳେକରଙ୍କ ପ୍ରତ୍ୟେକ୍ଷ ତତ୍ତ୍ବାବଧାନରେ ପାଟଣାଗଡ ଉପଖଣ୍ଡ ପୁଲିସ୍ ଅଧିକାରୀ ଜ୍ୟୋତିର୍ମୟ ଭୁକ୍ତାଙ୍କ ସମେତ ପାଟଣାଗଡ ଥାନାଧିକାରୀ ଅନନ୍ତ ପ୍ରଧାନ , ଖପ୍ରାଖୋଲ ଥାନାଧିକାରୀ ରମାକାନ୍ତ ସାହୁଙ୍କ ସମେତ ଅନ୍ୟାନ୍ୟ ପୁଲିସ୍ କର୍ମଚାରୀଙ୍କର  । ସମାଲୋଚନା କରାଯାଇଆସୁଥିବା ପୁଲିସ୍ ର ଭାବମୂର୍ତ୍ତି ଏତଦ୍ଦ୍ବାରା ଉଜ୍ଜଳ ହୋଇପାରିଛି ।

ପାଟଣାଗଡର ଏହି ସ୍ପଷ୍ଟଦିବାଲୋକର ଦୁଃସାହସିକ ସଂଗଠିତ ସଶସ୍ତ୍ର ଡକାୟତି ବଲାଙ୍ଗୀର ଜିଲ୍ଲାର ହର୍ଡାଟାଲ୍ ଗ୍ରାମର ଏହାପୂର୍ବରୁ ବହୁ ସିରିଜ୍ ଲୁଟ୍ ଓ ଡକାୟତିର ସର୍ଦ୍ଦାର ଆନ୍ତଃରାଜ୍ୟ ଡକାୟତ ଅମିତ ଦାଶ ବୋଲି ଲୋକମୁଖରେ ଚର୍ଚ୍ଚା ହେଉଛି । କିଛିବର୍ଷ ତଳେ ଏହି ଦୁର୍ଦ୍ଦାନ୍ତ ଯୁବଡକାୟତ ଜଣକ ଏକ ଦଳ ଗଢି ବଲାଙ୍ଗୀରର ବିଭିନ୍ନ ଘରେ ଓ ସ୍ଥାନରେ ଡକାୟତି କରିବା ସହିତ ପାଟଣାଗଡ ପେଟ୍ରୋଲ ପମ୍ପ ଲୁଟ୍ , ବଲାଙ୍ଗୀର ବ୍ଲକ୍ ନିକଟସ୍ଥ ଜଣକ ଘର ଓ ପୁଇଁତଳା ବ୍ଲକ୍ ନିକଟସ୍ଥ ଜଣେ ଶିକ୍ଷକଙ୍କ ଘରୁ ସଶସ୍ତ୍ର ଲୁଟ୍ ଆଦି ମାମଲାରେ ସାମିଲ୍ ହୋଇ  ଗିରଫ ମଧ୍ୟ ହୋଇଥିଲା ।  ସେ କିଛିଦିନ ପାଟଣାଗଡର ରାମଜୀପଡା , ନିକଟସ୍ଥ ଗଙ୍ଗାସାଗର ଓ କଣ୍ଟାବାଞ୍ଜି ସହରରେ ରହୁଥିଲା । ସେ ମଧ୍ୟ ଏହାପୂର୍ବରୁ ତରଭା ତାଲପଦର ଏକ ଖଳାରୁ ସଦରଥାନା ପୁଲିସ୍ ଦ୍ବାରା ଧରା ପଡି ଗିରଫ ହୋଇଥିଲା । ଓଡିଶା ସମେତ ଓଡିଶା ବାହାରେ ତାହାର ଅନେକ ମାମଲାରେ ସେ ଜଡିତ ରହିଥିବା ପୂର୍ବରୁ ପ୍ରକାଶ । ତେଣୁ ପାଟଣାଗଡ ଅଞ୍ଚଳରେ ଭଲଭାବେ ପରିଚିତ ଏହି କୁଖ୍ୟାତ ଡକାୟତ ଏତେଦିନ ପରେ ପୁଣି ସ୍ଥାନୀୟ ଅପରାଧୀମାନଙ୍କୁ ସଂଗଠିତ କରି ଏହା ଘଟାଇଥିବା ଆଶଙ୍କାକୁ ଏଡାଇ ଦିଆଯାଇ ପାରୁନାହିଁ । ତେବେ ଦେଖାଯାଉ , ଏହି ବିପୁଳ ସୁନାଅଳଙ୍କାର ଲୁଟ୍ ମାମଲାରେ ପାଟଣାଗଡ ବନାମ ବଲାଙ୍ଗୀର ପୁଲିସ୍ ସେହି ମାଲ୍ ମତାକୁ ଜବତ କରିବା ସହ କେତେଦୂର ଅସଲ ଡକାୟତଙ୍କୁ ଗିରଫ କରିବାରେ ସମର୍ଥ ହେଉଛି  !