-+91-9937148622 |
prerana_bgr@rediffmail.com |
Thursday 18th April 2024 |
R.N.I. Regd No. ODIODI/2010/46693
Breaking News
07-May-2022
ବଲାଙ୍ଗୀର:(ମଳୟ ମିଶ୍ରଙ୍କ ରିପୋର୍ଟ): ଗତ ଏପ୍ରିଲ ୨୨ ତାରିଖରେ ରାଗିଂ ଯୋଗୁଁ ମେଡିକାଲ କଲେଜ ହଷ୍ଟେଲର ୫ମ ମହଲାରୁ ପଡି ମୃତ ହରିଆଣାର ପ୍ରଥମ ବର୍ଷର ଡାକ୍ତରୀ ଛାତ୍ର ନିଶାନ୍ତ କୁମାରଙ୍କ ତାଙ୍କ ବନ୍ଧୁଙ୍କ ସହ କରିଥିବା ଚାଟିଂର ଆଉଏକ ଚାଞ୍ଚଲ୍ୟକର ତଥ୍ୟ ପ୍ରକାଶ ପାଇଛି । ଏଥିରେ କଲେଜର ସିନିଅର ଛାତ୍ରଙ୍କ ସହିତ ରାଗିଂରେ ଅଧ୍ୟାପକମାନେ ବି ସାମିଲ୍ ରହୁଥିବା ଏବଂ କଲେଜରେ ଯୌନ ନିର୍ଯାତନା ମଧ୍ୟ ଦିଆଯାଉଥିବା ଉଲ୍ଲେଖ ରହିଛି । ପିତା ପ୍ରଫେସର କ୍ରୀଷ୍ଣ କୁମାର ବଲାଙ୍ଗୀର ଏସ୍ ପିଙ୍କୁ ଏ ସମ୍ପର୍କରେ ଅବଗତ କରିବା ସହିତ ସେମାନଙ୍କୁ ଚିହ୍ନଟ କରି ଉପଯୁକ୍ତ ଦଣ୍ଡବିଧାନ ନିମନ୍ତେ ଅନୁରୋଧ କରିଛନ୍ତି । ଏସ୍ ପି ନୀତିନ କୁଶଳକର ଏହା ତଦନ୍ତର ପରିସରଭୁକ୍ତ ହେବ ବୋଲି କହିଥିବା ପ୍ରକାଶ ।
ଏହି ଖବର ଗଣମାଧ୍ୟମରେ ପ୍ରକାଶ ପାଇବାପରେ ଚଳିତବର୍ଷ ଜଣେ ସ୍ଥାନୀୟ ଡାକ୍ତରୀଛାତ୍ରୀ ନିରୁପମା ନନ୍ଦଙ୍କର ହୋଇଥିବା ରହସ୍ୟମୟ ମୃତ୍ୟୁ ଘଟଣାର କାରଣ ଅଦ୍ୟାବଧି ସ୍ପଷ୍ଟ ହୋଇପାରି ନଥିବାବେଳେ , ଏହା ମଧ୍ୟ ଏହିପରି ରାଗିଂ ଯୋଗୁଁ ହୋଇଥାଇପାରେ ବୋଲି କେତେକ ଅନୁସୂଚିତଜାତିର ନେତା ଓ ବୁଦ୍ଧିଜୀବୀ ଏହାକୁ ସୋସିଆଲ୍ ମିଡିଆରେ ଭାଇରାଲ୍ କରି ମୁଖ୍ୟମନ୍ତ୍ରୀଙ୍କ ସମେତ ମୁଖ୍ୟ ଶାସନ ସଚିବ, ଡିଜିପି, ଜାତୀୟ ମାନବାଧିକାର କମିଶନ, ଜାତୀୟ ଅନୁସୂଚିତ ଜାତି କମିଶନ ଓ ଅନ୍ୟାନ୍ୟ କର୍ତ୍ତୃପକ୍ଷଙ୍କ ଦୃଷ୍ଟିଆକର୍ଷଣ କରିଥିବା ଦେଖାଯାଇଛି ।
ତେଣୁ ମୃତଛାତ୍ର ନିଶାନ୍ତଙ୍କ ମୃତଦେହକୁ ବିନା ପୁଲିସରେ ସ୍ଥାନାନ୍ତରିତ କରିବା, ତାଙ୍କ ପକେଟ୍ ଅଣ୍ଡାଳିବା, ପୋଷ୍ଟମର୍ଟମ୍ ହାଉସ୍ ରେ ସାମ୍ବାଦିକଙ୍କ ସମ୍ମୁଖରେ ପୁଲିସ ସହ ମିଶି ତାଙ୍କ ବାପମାଆଙ୍କୁ ଏକୋଣ ସେକୋଣ କୁ ନେଇ ଘଣ୍ଟାଏ କାଳ ଫୁସୁଲାଫୁସୁଲି କରୁଥିବା ଇତ୍ୟାଦିରେ ସକ୍ରିୟ ଜଣେ ମେଡିକାଲ କଲେଜ ଅଧ୍ୟାପକଙ୍କ ଭୂମିକା ସନ୍ଦେହର ପରିସରକୁ ଆସିଥିବା ଚର୍ଚ୍ଚା ହେଉଛି । ଆରପଟେ କଲେଜର ମହିଳାଡିନ୍ ଶେଷପର୍ଯ୍ୟନ୍ତ କଲେଜରେ ରାଗିଂ ଅଭିଯୋଗକୁ ଅସ୍ବୀକାର କରିଆସୁଛନ୍ତି ! ତେବେ ଏହି ମେଡିକାଲ କଲେଜରେ ଏକବର୍ଷ ମଧ୍ୟରେ ଦୁଇଟି ଛାତ୍ରଛାତ୍ରୀଙ୍କର ଅକାଳ ମୃତ୍ୟୁର କାରଣ ରାଗିଂ ବୋଲି ଅଭିଯୋଗ କରାଯାଉଥିବା ସହ ନିଶାନ୍ତଙ୍କ ମୃତ୍ୟୁର ଦୁଇସପ୍ତାହ ପରେ ମଧ୍ୟ ଅଦ୍ୟାବଧି କାହାରିକୁ ଅଭିଯୁକ୍ତ ଠାବ ନକରିବା, ପୁଲିସ୍ ତଦନ୍ତ ପ୍ରତି ଲୋକଙ୍କର ଭ୍ରୂକୁଞ୍ଚନ ସୃଷ୍ଟି କରିଛି ।