08-Nov-2026

ବଲାଙ୍ଗିର/ଟିଟିଲାଗଡ଼(ପ୍ରେରଣା ଖବର): ସୁନ୍ଦରଗଡ଼ ଜିଲ୍ଲା କୋଇଡ଼ା ବ୍ଲକ୍ ଅନ୍ତର୍ଗତ ବି. ଝାରବେଡ଼ା ଗ୍ରାମର ନିରୀହ ଆଦିବାସୀ ପାତୁ ମୁଣ୍ଡାଙ୍କ ଉପରେ ଗତ ନଭେମ୍ବର ୧ ତାରିଖରେ ଘଟିଥିବା କଥିତ ମରଣାନ୍ତକ ଆକ୍ରମଣ ଘଟଣାକୁ ଜିଲ୍ଲା ଆଦିବାସୀ କଲ୍ୟାଣ ସଂଘ, ବଲାଙ୍ଗିର ପକ୍ଷରୁ ତୀବ୍ର ନିନ୍ଦା କରାଯାଇଛି। ବିହାର ଓ ଝାଡ଼ଖଣ୍ଡରୁ ଆସିଥିବା ତଥାକଥିତ ଗୋ-ରକ୍ଷକଙ୍କ ଦ୍ୱାରା ଏହି ଆକ୍ରମଣ ହୋଇଥିବା ଅଭିଯୋଗକୁ ନେଇ ଆଦିବାସୀ ସମାଜରେ ଗଭୀର ଉଦବେଗ ପ୍ରକାଶ ପାଇଛି। ସଂଘ ପକ୍ଷରୁ 

ଆଦିବାସୀଙ୍କ ଜୀବନ, ସମ୍ମାନ ଓ ସାମ୍ବିଧାନିକ ଅଧିକାରର ସୁରକ୍ଷା ପାଇଁ କଠୋର ପଦକ୍ଷେପ ନେଉ ପ୍ରଶାସନ

କୁହାଯାଇଛି ଯେ, ଗୋ-ସୁରକ୍ଷା ଅଥବା ଅନ୍ୟ କୌଣସି ଉଦ୍ଦେଶ୍ୟର ଆଳରେ ଆଇନକୁ ନିଜ ହାତକୁ ନେଇ ନିରୀହ ନାଗରିକଙ୍କ ଉପରେ ଆକ୍ରମଣ କରିବା ଏକ ଗୁରୁତର ଅପରାଧ। ଏଭଳି ଘଟଣା ଗଣତାନ୍ତ୍ରିକ ମୂଲ୍ୟବୋଧ, ଆଇନର ଶାସନ, ମାନବିକ ମର୍ଯ୍ୟାଦା ଓ ସାମ୍ବିଧାନିକ ଅଧିକାର ପ୍ରତି ଏକ ଗୁରୁତର ଆହ୍ୱାନ। 

ଏହି ପରିପ୍ରେକ୍ଷୀରେ ଘଟଣାର ନିରପେକ୍ଷ, ସ୍ୱଚ୍ଛ ଓ ସମୟବଦ୍ଧ ତଦନ୍ତ କରି ସମସ୍ତ ଅଭିଯୁକ୍ତଙ୍କୁ ତୁରନ୍ତ ଗିରଫ କରିବା ସହ ସେମାନଙ୍କ ବିରୋଧରେ ଭାରତୀୟ ନ୍ୟାୟ ସଂହିତା ଏବଂ ତଦନ୍ତରେ ପ୍ରଯୁଜ୍ୟ ହେଲେ ଅନୁସୂଚିତ ଜାତି ଓ ଅନୁସୂଚିତ ଜନଜାତି (ଅତ୍ୟାଚାର ନିବାରଣ) ଆଇନ, ୧୯୮୯ ଅନୁଯାୟୀ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସଂଘ ଦାବି କରିଛି।
ଏଥିସହିତ ଆହତ ପାତୁ ମୁଣ୍ଡାଙ୍କୁ ସରକାରୀ ଖର୍ଚ୍ଚରେ ଉନ୍ନତ ଓ ନିଃଶୁଳ୍କ ଚିକିତ୍ସା, ତାଙ୍କର ଓ ପରିବାରର ସୁରକ୍ଷା, ଉପଯୁକ୍ତ ଆର୍ଥିକ କ୍ଷତିପୂରଣ ଏବଂ ଆବଶ୍ୟକ ପୁନର୍ବାସ ସହାୟତା ଯୋଗାଇଦେବାକୁ ଦାବି କରାଯାଇଛି। ଏଭଳି ଘଟଣାର ପୁନରାବୃତ୍ତି ରୋକିବା ପାଇଁ ସୁନ୍ଦରଗଡ଼ ଜିଲ୍ଲା ପ୍ରଶାସନ ଓ ପୁଲିସ ପକ୍ଷରୁ ସ୍ୱତନ୍ତ୍ର ସୁରକ୍ଷାମୂଳକ ପଦକ୍ଷେପ ଗ୍ରହଣ କରାଯିବା ଆବଶ୍ୟକ ବୋଲି ସଂଘ ମତପ୍ରକାଶ କରିଛି।
ଆଦିବାସୀଙ୍କ ସରଳତା, ଅସହାୟତା ଓ ଆର୍ଥିକ ଦୁର୍ବଳତାର ସୁଯୋଗ ନେଇ ସେମାନଙ୍କ ଉପରେ ହିଂସା ଓ ଅତ୍ୟାଚାରକୁ କୌଣସି ପରିସ୍ଥିତିରେ ବରଦାସ୍ତ କରାଯିବ ନାହିଁ। ଆଦିବାସୀଙ୍କ ଜୀବନ, ଜୀବିକା, ସମ୍ମାନ, ସ୍ୱାଭିମାନ ଓ ସାମ୍ବିଧାନିକ ଅଧିକାରର ସୁରକ୍ଷା ନିଶ୍ଚିତ କରିବା ସରକାର ଓ ପ୍ରଶାସନର ପ୍ରାଥମିକ କର୍ତ୍ତବ୍ୟ ବୋଲି ସଂଘ ଦୃଢ଼ ମତବ୍ୟକ୍ତ କରିଛି।
ଏହି ଘଟଣାର ତୀବ୍ର ନିନ୍ଦା କରିବା ସହ ଅଭିଯୁକ୍ତଙ୍କ ବିରୋଧରେ ଦୃଷ୍ଟାନ୍ତମୂଳକ ଆଇନଗତ କାର୍ଯ୍ୟାନୁଷ୍ଠାନ

ଏବଂ ପୀଡ଼ିତଙ୍କୁ ତୁରନ୍ତ ନ୍ୟାୟ ପ୍ରଦାନ ପାଇଁ ଜିଲ୍ଲା ଆଦିବାସୀ କଲ୍ୟାଣ ସଂଘର ସଭାପତି ପଦ୍ମନ ପ୍ରଧାନୀ, ସାଧାରଣ ସମ୍ପାଦକ ହେମେନ୍ଦ୍ର ନାଥ ହାଁସଦା, ସଂଗଠନ ସମ୍ପାଦକ ଥବିର ପୂଜାରୀ, ଉପସଭାପତି ଇନ୍ଦ୍ରମଣି ମାଝି, କାର୍ଯ୍ୟକାରୀ ସଭାପତି ଶ୍ରୀମତୀ ବନଳତା ମାଝି, ନଗର ସଭାପତି ନିତ୍ୟାନନ୍ଦ ମାଝି, ବ୍ଲକ୍ ସଭାପତି ମନରଞ୍ଜନ ଭୋଇ, ରାଜୀବ କୁଅଁର, ସନ୍ତୋଷ ପୁଟା, ଚୌବନ କିଶୋର ମାଝି, ରସିକ ଧରୁଆ, ଭୁବନେଶ୍ୱର କୁଅଁର, ସୁରଥ ଧରୁଆ, ଦଶରଥ ଛତ୍ରିଆ, ବଳଦେବ ଭୋଇ, ପାଳେଶ୍ୱର ଭୋଇ, ଆଦିବାସୀ ନେତା ବିକ୍ରମ ଭୋଇ, ରାମଚନ୍ଦ୍ର ମୁର୍ମୁ, ସାରଥୀ ବାଗ, ରାମ ଶବର, ଅମର ସିଂ ମାଝି, ଶ୍ରୀମତୀ ଲକ୍ଷ୍ମୀ ଶବର ଓ ଶୁଭ ଛତ୍ରିଆ ପ୍ରମୁଖ ମିଳିତ ଭାବେ ଦାବି ଜଣାଇଛନ୍ତି l