16-Apr-2021

କଣ୍ଟାବାଞ୍ଜି (ପ୍ରେରଣା ଖବର) :ତୁରେକେଲା ବ୍ଳକ ଅନ୍ତର୍ଗତ ଚଟୁଅନକା ଗ୍ରାମ ପଞ୍ଚାୟତର ଚଟୁଅନକା ସ୍ଥିତ କ୍ଳବ ଗୃହରେ କରୋନା ଟିକାକରଣ ଆରମ୍ଭ ହୋଇଯାଇଛି।କରୋନା ଟିକା ନେଲେ ଲୋକମାନେ ମରିଯିବା, ପାର୍ଶ୍ଵ ପ୍ରତିକ୍ରିୟା ଦେଖାଯାଉଥିବାର ସୋସିଆଲ ମିଡ଼ିଆ, ଓ ଲୋକ ଗୁଜବରେ ଲୋକମାନେ ଭୟଭୀତ ହୋଇ ଟିକା ନେବାକୁ ଆଗଭର ହୋଇନଥିଲେ।ପ୍ରକୃତିବନ୍ଧୁ ତଥା ଜୁନିଅର ରେଡକ୍ରସ ପରାମର୍ଶଦାତା ମାଝିପଡା ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷକ ବିରଞ୍ଚି ନାରାୟଣ ଦାଶଙ୍କ ପ୍ରଚେଷ୍ଟାରେ ଶ୍ରୀମତୀ ନମିତା ମିଶ୍ର, ଆଶାକର୍ମୀ ସୂର୍ଯ୍ୟକାନ୍ତୀ ମାଝୀ, ଜେମାମଣି କଲେତ,ଅଙ୍ଗନବାଡ଼ି କର୍ମୀ ସଙ୍ଗୀତା ବଏ, ଶିକ୍ଷକ କିଶୋର ବରିହା, ଦେବକୀ ତାଣ୍ଡି, ଥମିର ଛତ୍ରିଆ ଲୋକମାନଙ୍କୁ ବୁଝେଇବା ସହିତ ଟିକାକରଣ ର ଉପକାରିତା ଉପରେ ଆଲୋକପାତ କରିଥିଲେ।ସର୍ବ ପ୍ରଥମେ ଶ୍ରୀ ବିରଞ୍ଚି ନାରାୟଣ ଦାଶ ଲୋକ ମାନଙ୍କୁ ବିଶ୍ୱାସ ଭାଜନ କରିବା ପାଇଁ ଟିକା ନେଇଥିଲେ।ତାପରେ ସମାଜସେବୀ ଥମିର ଛତ୍ରିଆ ଟିକା ନେଇଥିଲେ।ତାଙ୍କ ପରେ ପରେ ଅନ୍ୟ ମାନେ ଟିକା ଗ୍ରହଣ କରିଥିଲେ।ଟିକାକରଣ ପାଇଁ ବାସୁଦେବ ରଣା, ପ୍ରହଲ୍ଲାଦ ସାହୁ, କୈବଲ୍ୟ ପନିକା,ରଞ୍ଜିତ ସାହୁ ଆଦି ତୁରେକେଲା ଡାକ୍ତରଖାନାରୁ ଆସିଥିଲେ। ସର୍ବପ୍ରଥମେ ଟିକା ନେବାକୁ

ଆସୁଥିବା ବ୍ୟକ୍ତି ମାନଙ୍କର ଆଣ୍ଟିଜେନ ପରୀକ୍ଷା କରାଯାଇ ୪୦ରୁ ଉର୍ଦ୍ଧ୍ବ ବ୍ୟକ୍ତିଙ୍କୁ ଟିକା ଦିଆ ଯାଇଥିଲା।ଜୁନିଅର ରେଡକ୍ରସ ପରାମର୍ଶଦାତା ଶ୍ରୀ ଦାଶ ଉପସ୍ଥିତ ସମସ୍ତଙ୍କୁ ମାସ୍କ ବଣ୍ଟନ କରିବା ସହିତ ସେନିଟାଇଜର ଦ୍ଵାରା ହାତ ଧୋଇଵାକୁ ପରାମର୍ଶ ଦେଇଥିଲେ।