15-Apr-2021

ଝାରସୁଗୁଡା(ପ୍ରେରଣା ଖବର ବ୍ୟୁରୋ) କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଉଥିବା ବେଳେ ଝାରସୁଗୁଡା ଜିଲ୍ଲା ଛତିଶଗଡ଼ ସୀମା ଉପରେ ତୀକ୍ଷ୍ଣ ନଜର ରଖିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି । ଛତିଶଗଡ ପଟୁ ସଂକ୍ରମଣର ଭୟ ଥିବାରୁ ପଶ୍ଚିମ ଓଡିଶାର ଜିଲ୍ଲାଗୁଡିକ ନିଜ ସୀମା ସିଲ୍ କରିଛନ୍ତି । ପଡୋଶୀ ରାଜ୍ୟମାନଙ୍କରେ ବଢୁଥିବା କରୋନା ସ୍ଥିତି ଉଦବେଗଜନକ ରହିଥିବା କାରଣରୁ ସୀମାନ୍ତରେ କଡା ସୁରକ୍ଷା ବ୍ୟବସ୍ଥା କରିବାକୁ କହିଛନ୍ତି। ଛତିଶଗଡ଼ରେ ହୁ ହୁ ହୋଇ ବଢୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ କଡା ନିଷ୍ପତ୍ତି ଗ୍ରହଣ କରାଯାଇଛି ।

ସେହିପରି ସୀମାନ୍ତରେ ଅସ୍ଥାୟୀ ଆଶ୍ରୟସ୍ଥଳୀ କରାଯାଇ ୨୪ ଘଣ୍ଟା ପହରା ଦିଆଯିବା ସହ ସୀମାନ୍ତରେ ସ୍ଥିତି ଉପରେ ଜିଲ୍ଲା ପ୍ରଶାସନ ନଜର ରଖିଛି।  ପଡୋଶୀ ରାଜ୍ୟମାନଙ୍କରୁ ଆସୁଥିବା ପ୍ରତ୍ୟେକ ବ୍ୟକ୍ତିଙ୍କ ଆରଟି-ପିସିଆର ରିପୋର୍ଟକୁ ବାଧ୍ୟତାମୂଳକ କରାଯାଇଥିବା ବେଳେ କନକତୋରା ସୀମାନ୍ତ ଦେଇ ଯେଉଁ ବ୍ୟକ୍ତି ଓଡିଶା ଭିତରକୁ ପ୍ରବେଶ କରିବେ ସେମାନଙ୍କ କୋଭିଡ଼ ପରୀକ୍ଷା କରାଯାଇ ପ୍ରବେଶ ଅନୁମତି ପ୍ରଦାନ କରାଯିବ ବୋଲି  ଝାରସୁଗୁଡା ଜିଲ୍ଲା ପ୍ରଶାସନ ସଫେଇ ଦେଉଥିବା ବେଳେ ଓଡିଶା-ଛତିଶଗଡ଼ ସୀମାନ୍ତରେ ବିଭିନ୍ନ ଗଳାବାଟ ଦେଇ ଅବାଧରେ ଓଡିଶା ଭିତରକୁ ଲୋକେ ଯିବା ଆସିବା କରୁଛନ୍ତି ବୋଲି ଅଭିଯୋଗ କରିଛନ୍ତି ସ୍ଥାନୀୟ ଲୋକେ  ।

ଝାରସୁଗୁଡା ଜିଲ୍ଲା ପ୍ରଶାସନ ପକ୍ଷରୁ ଛତିଶଗଡକୁ ସୀମାରେ ଥିବା ୩ଟି ରାସ୍ତାକୁ ସିଲ୍ କରିଥିବା ବେଳେ କନକତୋରାଠାରେ  ବର୍ଡ଼ର ଚେକ୍ ପଏଣ୍ଟ ଖୋଲାଯାଇଛି । ଛତିଶଗଡ଼ରୁ ଆସୁଥିବା ସମସ୍ତ ଯାତ୍ରୀଙ୍କ ପଞ୍ଜୀକରଣ କରାଯିବା ସହିତ ସେମାନଙ୍କର ଥର୍ମାଲ ସ୍କ୍ରିନିଂ କରାଯାଉଛି । ଯାତ୍ରୀମାନେ ନିଜର ଆରଟିପିସିଆର ନେଗେଟିଭ ରିପୋର୍ଟ କିମ୍ବା ୨ ଡୋଜ୍ କୋଭିଡ୍ ଟିକା ନେଇଥିବା ପ୍ରମାଣ ପତ୍ର ବର୍ଡର ଚେକ୍ ପଏଣ୍ଟ ନିକଟରେ ଜମା କରିବେ । ନଚେତ୍ ସେମାନଙ୍କୁ ସଂଗରୋଧ କେନ୍ଦ୍ରରେ ୭ ଦିନ ପାଇଁ ରଖାଯିବାର ବ୍ୟବସ୍ଥା କରାଯାଇଛି ବୋଲି ଝାରସୁଗୁଡା ଏସପି କହିଛନ୍ତି । ଏହା ସହିତ ଛତିଶଗଡ଼କୁ ସଂଯୋଗ କରୁଥିବା ଲରା ଛକ ଓ ବାଉଁସେନପାଲି ଛକରେ ପୋଲିସ ରାସ୍ତା ବନ୍ଦ କରି କଡାକଡି ଚେକିଂ କରୁଛି ।