18-Mar-2021

ବରଗଡ଼,(ମୁକୁନ୍ଦ ଦାସ): ବରଗଡ଼ ସ୍ଥିତ ବିକାଶ ଉଚ୍ଚ ମାଧ୍ୟମିକ ବିଦ୍ୟାଳୟ ର ସିଏଚ୍‌ଏସ୍‌ଇ ଯୁକ୍ତ ଦୁଇ ଦ୍ୱିତୀୟ ବର୍ଷ ବିଜ୍ଞାନ ଛାତ୍ର ଶ୍ରୀମାନ୍ ସନାତନ ସତନାମୀ ଚଳିତ ବର୍ଷ ଅନୁଷ୍ଠିତ ସର୍ବ ଭାରତୀୟ କେଭିପିୱାଇ ପରୀକ୍ଷାରେ ୧୨୦ ର‌୍ୟାଙ୍କ୍ (ଏସ୍‌.ସି. ବର୍ଗ) ନିଜର ପ୍ରଥମ ପ୍ରୟାସରେ ଉତ୍‌ତୀର୍ଣ୍ଣ ହେବାର କୃତିତ୍ୱ ଅର୍ଜନ କରିଛନ୍ତି ବୋଲି ବିକାଶ ଗ୍ରୁପ୍‌ର ଏକ୍‌ଜିକ୍ୟୁଟିଭ୍ ଡାଇରେକ୍ଟର ଶ୍ରୀଯୁକ୍ତ ଡି.ନାଗେଶ୍ୱର ରାଓ ସୂଚନା ଦେଇଛନ୍ତି । “ଗରିବ ମେଧାବୀ ଛାତ୍ରଛାତ୍ରୀଙ୍କ ପାଇଁ ଉଦ୍ଦିଷ୍ଟ ବିକାଶ ର ସ୍ୱତନ୍ତ୍ର ପ୍ରୋତ୍ସାହନ ଯୋଜନା ମାଧ୍ୟମରେ ଏଡ୍‌ମିଶନ୍ ନେଇ ସେ ସଫଳତା ପାଇଛନ୍ତି, ଯାହାକି ମୋ ପାଇଁ ତଥା ବିକାଶ ପାଇଁ ଖୁସିର ବିଷୟ । ଏହା ପୂର୍ବରୁ ଅନେକ ଗରିବ ମେଧାବୀ ଛାତ୍ରଛାତ୍ରୀ ଏହି ଯୋଜନା ମାଧ୍ୟମରେ ସଫଳତା ପାଇ ଆସୁଛନ୍ତି” ବୋଲି କହି ବିକାଶ ଗ୍ରୁପ୍ ର ଚେୟାର୍‌ମେନ୍ ଶ୍ରୀ ଡି.ମୂରଲୀ କ୍ରୀଷ୍ଣା ନିଜର ଆତ୍ମସନ୍ତୋଷ ପ୍ରକାଶ କରିଛନ୍ତି । ଏହି ସଫଳତା ସନାତନଙ୍କ କଠିନ ପରିଶ୍ରମ ଓ ବିକାଶ ଏଣ୍ଟ୍ରାନ୍ସ୍ ଏକାଡେମୀ ର ସ୍ୱତନ୍ତ୍ର କାର୍ଯ୍ୟକ୍ରମର ଫଳ ବୋଲି ବିକାଶ ଗ୍ରୁପ୍‌ର ମ୍ୟାନେଜିଂ ଡାଇରେକ୍ଟର ଶ୍ରୀଯୁକ୍ତ ଜି.ଭାସ୍କର ରାଓ କହିଛନ୍ତି । ବିଗତ ୫ବର୍ଷ ଧରି କେଭିପିୱାଇ ରେ ବିକାଶ ର ଛାତ୍ରଛାତ୍ରୀମାନେ ସଫଳତା ଅର୍ଜନ କରୁଛନ୍ତି ବୋଲି ବିକାଶ ଏଣ୍ଟ୍ରାନ୍ସ୍ ଏକାଡେମୀ, ବରଗଡ଼ ଶାଖା ତରଫରୁ ବିକାଶ ସ୍କୁଲ୍ ଉପାଧ୍ୟକ୍ଷ ଶ୍ରୀ ଚିତରଞ୍ଜନ ପତି ପ୍ରକାଶ କରିଛନ୍ତି । ସନାତନ ବରଗଡ଼ ଜିଲ୍ଲା ଅମ୍ବାଭୋନା ବ୍ଲକ୍ ଅନ୍ତର୍ଗତ କପାଶିରା ଗ୍ରାମର ଏକ ନିମ୍ନ-ମଧ୍ୟବିତ୍‌ତ ପରିବାରର ଶ୍ରୀ ଭାଗିରଥୀ ସତନାମୀ ଓ ଶ୍ରୀମତୀ ସୁଶୀଲା ସତନାମୀ ଙ୍କ ସୂପୁତ୍ର ଅଟନ୍ତି । ଯୁକ୍ତ ଦୁଇ ବିଜ୍ଞାନ ପାଠ ପଢ଼ା ସାଙ୍ଗରେ ବିକାଶ ଏଣ୍ଟ୍ରାନ୍ସ୍ ଏକାଡେମୀରେ ପ୍ରତିଯୋଗିତାମୂଳକ ପରୀକ୍ଷାଗୁଡ଼ିକ ପାଇଁ ମଧ୍ୟ ପ୍ରସ୍ତୁତି ଜାରିରଖିଛନ୍ତି । ଏହା ସହିତ ଚଳିତ ବର୍ଷ ଜେଇଇ ମେନ୍ ପରୀକ୍ଷାରେ ୯୮.୦୬ ପର୍ସେଣ୍ଟାଇଲ୍ ସହ ସନାତନ ଉତ୍‌ତୀର୍ଣ୍ଣ ହୋଇଛନ୍ତି ତଥା ଆଗାମୀ ଦିନରେ ହେବାକୁ ଥିବା ନିଟ୍ ପରୀକ୍ଷାରେ ମଧ୍ୟ ସର୍ବ ଭାରତୀୟ ସ୍ତରରେ ଭଲ ର‌୍ୟାଙ୍କ୍ ରେ ଉତ୍‌ତୀର୍ଣ୍ଣ ହୋଇ ସୁନାମଧନ୍ୟ ଏମ୍‌ସ୍ ରେ ସିଟ୍ ପାଇବା ନିଶ୍ଚିତ ବୋଲି ବିକାଶ ଉଚ୍ଚ ମାଧ୍ୟମିକ ବିଦ୍ୟାଳୟ ର ଅଧ୍ୟକ୍ଷ ଶ୍ରୀ ମୂରାରୀ ପ୍ରସାଦ ସାହୁ ଦୃଢ଼ୋକ୍ତି ପ୍ରକାଶ କରିଛନ୍ତି । ଏହି ସଫଳତା ପାଇଁ ଡାଇରେକ୍ଟର ଏକାଡେମିକ୍ସ୍ ଶ୍ରୀ ଜି.ରାମକ୍ରୀଷ୍ଣା, ଡାଇରେକ୍ଟର ଡ.ସମରେନ୍ଦ୍ର ନାଥ ପଣ୍ଡା, ବିକାଶ ଆବାସିକ ବିଦ୍ୟାଳୟର ଅଧ୍ୟକ୍ଷ ଶ୍ରୀ ଶିଶିର ପ୍ରସାଦ ରାଉଳ ତଥା ସମସ୍ତ କର୍ମକର୍ତା ବୃନ୍ଦ ସନାତନଙ୍କୁ ଉଜ୍ଜ୍ୱଳ ଭବିଷ୍ୟତ କାମନା କରିବା ସହ ହାର୍ଦ୍ଦିକ ଅଭିନନ୍ଦନ ଜ୍ଞାପନ କରିଛନ୍ତି ।