18-Mar-2021

  ନୟାଗଡ଼ (ପ୍ରଦୀପ କୁମାର ପଣ୍ଡା): ଶୁଖିଲା ପଡିଛି ନଦୀ | ଗ୍ରାମବାସୀଙ୍କ ମନରେ ଭୟ ଖରାଦିନେ ମିଳିନପାରେ ପିଇବାକୁ ପାଣି | ପାଇପ ଫାଟି ଅପଚୟ  ହେଉଛି ପାନୀୟ ଜଳ ତେଣୁ ବୁଦ୍ଧିଯିବି ମହଲରେ ଜୋର ଧରିଲାଣି ଚର୍ଚ୍ଚା କି ସରପଞ୍ଚ ଙ୍କୁ ଜଣାଇବା ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନେଉନାହିଁ ସ୍ଥାନୀୟ ପ୍ରଶାସନ | ପଞ୍ଚାୟତ ବାସୀ ଙ୍କ ଅଭିଯୋଗ ଯେ ସରପଞ୍ଚ ଭାବେ ରଙ୍ଗବତୀ ମୁଦୁଲି ନିର୍ବାଚିତ ହୋଇଥିବା ବେଳେ ପଞ୍ଚାୟତ କାର୍ଯ୍ୟାଳୟ ରେ ମିଳୁନାହିଁ ତାଙ୍କ ଦର୍ଶନ | କୌଣସି ଅଭିଯୋଗ ନେଇ ଯିବାବେଳେ ତାଙ୍କ ପ୍ରତିନିଧି ତଥା ପୁତ୍ର ଙ୍କୁ ଭେଟି ଅଭିଯୋଗ କଲାପରେ ମଧ୍ୟ ହେଉନାହିଁ କୌଣସି ସମାଧାନ | ଏହିଭଳି ଘଟଣା ଦୃଷ୍ଟିଗୋଚର ହୋଇଛି ଖଣ୍ଡପଡା ନିର୍ବାଚନ ମଣ୍ଡଳୀ ର କୁମ୍ଭାରପଡ଼ା ଗ୍ରାମପଞ୍ଚାୟତ ରେ | ଏହି ଗ୍ରାମପଂଚାୟତ ର କୁମ୍ଭାରପଡ଼ା ଗ୍ରାମରେ ପ୍ରାୟ ୨ହଜାର ରୁ ଉର୍ଦ୍ଧ ଲୋକ ବସବାସ କରୁଥିବା ବେଳେ ବିଶୁଦ୍ଧ ପାନୀୟ ଜଳ ଯୋଗାଣ ରେ ଅସନ୍ତୁଷ୍ଟ ଗ୍ରାମବାସୀ | କୁମ୍ଭାରପଡ଼ା ର ନିକଟରେ କୁଆଁରିଆ ନଦୀ ପଠାରେ ଏକ ବୋରିଙ୍ଗ ଖୋଳାଯାଇ କୁମ୍ଭାରପଡ଼ା ଏବଂ ଢୋଲମରା ଗ୍ରାମକୁ ପାନୀୟ ଜଳ ଯୋଗାଣ କରାଯାଉଛି | ସ୍ଥାନୀୟ ପ୍ରଶାସନ ର ଅବହେଳା ହେତୁ ଯୋଗାଣ ପାଇପ ବିଭିନ୍ନ ଜାଗାରେ ଫାଟି ଯାଇଥିବା ବେଳେ ଷ୍ଟାଣ୍ଡ ପୋଷ୍ଟ ଗୁଡିକ ବିଭିନ୍ନ ଜାଗାରେ ଅଚଳାବସ୍ଥାରେ ପଡିରହିଥିବା ଦେଖିବାକୁ ମିଳିଛି | ଏପରିକି କେତେକ ଷ୍ଟାଣ୍ଡ ପୋଷ୍ଟ ରେ ଟ୍ୟାପ ନଥିବାରୁ ଜଳ ଅପଚୟ ହେଉଛି | କୁମ୍ଭାରପଡ଼ା ର ମଙ୍ଗଳା ମନ୍ଦିର ନିକଟରେ ପାଇପ ଫାଟି ଯାଇଥିବାରୁ ନିକଟରେ ଥିବା ସାହି ଭିତରେ କୃତିମ ବନ୍ୟାଜଳ ଲହରୀ ମାରିବାର ଭ୍ରମ ସୃଷ୍ଟି ହେଉଛି | ସେହି ସାହିବାସିନ୍ଦା ସରପଞ୍ଚ ଙ୍କ ପ୍ରତିନିଧି ଙ୍କୁ ଦୀର୍ଘ ଦଶଦିନ ହେଲା ଅବଗତ କରି ଥିବା ବେଳେ ଏ ପର୍ଯ୍ୟନ୍ତ କୌଣସି ସମାଧାନ ହୋଇନଥିବାରୁ ସେମାନେ ଗଣମାଧ୍ୟମ ର ସାହାଯ୍ୟ ଲୋଡିଛନ୍ତି | ଆଜି ପର୍ଯ୍ୟନ୍ତ କେବେବି ବ୍ଲିଚିଙ୍ଗ ବାସନା ପାନୀୟ ଜଳ ରେ ଅନୁଭବ କରିନଥିବା ଜନସାଧାରଣ ଙ୍କ ଅଭିଯୋଗରୁ ସ୍ପଷ୍ଟ ବାରିହେଉଛି ଯେ ସ୍ଥାନୀୟ ପ୍ରଶାସନ ଗ୍ରାମାଞ୍ଚଳରେ ଜନସାଧାରଣ ଙ୍କୁ  କେତେ ମାତ୍ରା ରେ ନିରୋଗୀ ଜୀବନଯାପନ କରିବାରେ ସାହାଯ୍ୟ କରୁଛି | ତେଣୁ ଖରାଦିନେ ପାଣି ଟିକେ ପାଇଁ ଅସୁବିଧା ର ସମ୍ମୁଖୀନ ହେବା ପୂର୍ବରୁ ବ୍ଳକ ତଥା ଜିଲ୍ଲା ପ୍ରଶାସନ ଏହି ଘଟଣା ର ଉପଯୁକ୍ତ ତଦନ୍ତ କରିବା ସହିତ ଦୃଢ କାର୍ଯ୍ୟାନୁଷ୍ଠାନ ନେବାକୁ ଗ୍ରାମବାସୀ ଦାବି କରିଛନ୍ତି |