18-Mar-2021

ଟିଟିଲାଗଡ଼ (ପ୍ରେରଣା ଖବର) ::ବଲାଙ୍ଗୀର ଜିଲ୍ଲାର ଟିଟିଲାଗଡ ଉପଖଣ୍ଡ ୱାର୍ଡ ନଂ-୦୬ ନିବାସୀ ରାମଚନ୍ଦ୍ର କର ନାମକ ଜଣେ ୫୫ ବର୍ଷୀୟ ବ୍ୟକ୍ତି ମାନସିକ ରୋଗ ରେ ଗତ ଦୁଇ ବର୍ଷ ରୁ ଅଧିକ ସମୟ ଧରି ଜିଲ୍ଲା ସ୍ୱାସ୍ଥ୍ୟ ବିଭାଗ ପକ୍ଷରୁ ଚିକିତ୍ସିତ ହେଉଛନ୍ତି । ହେଲେ ପରିତାପର ବିଷୟ ଏହା ଯେ,ମାନସିକ ରୋଗାକ୍ରାନ୍ତ ଶ୍ରୀ କର ଙ୍କ ୫୫ ବର୍ଷୀୟ ଜଣେ ସ୍ତ୍ରୀ ଛଡା ଆଉ କେହି ସାହା, ଭରସା ନ ଥିବା ବେଳେ ପରିବାର ରେ ଅନ୍ୟକେହି ରୋଜଗାର କ୍ଷମ ନାହାନ୍ତି । ପୂର୍ବରୁ ଶ୍ରୀ କର ପଡୋଶୀ ରାଜ୍ୟ ଛତିଶଗଡ଼ ର ରାୟପୁର ରୁ ପନି, ପରିବା ଆଣି ଟିଟିଲାଗଡ ରେ ବିକ୍ରି କରି ନିଜ ଗୁଜୁରାଣ ମେଣ୍ଟାଉ ଥିଲେ । ଗତ ଦୁଇ ବର୍ଷ ରୁ ଅଧିକ ସେ ଏହି ମାନସିକ ରୋଗ ରେ ଆକ୍ରାନ୍ତ ହୋଇ ଯିବାରୁ ଆଉ ରୋଜଗାର କରି ନ ପାରି ଶଯ୍ୟାଶାୟୀ ଭାବେ ପଡିରହିଛନ୍ତି । ଏକ ମାତ୍ର ସ୍ତ୍ରୀ ଧାର, କରଜ କରି ଘର ସବୁ ଜିନିଷ ପତ୍ର ବିକ୍ରି କରି ଦୂରଦୂରାନ୍ତ କୁ ନେଇ ଚିକିତ୍ସା କରିଥିଲେ ସୁଦ୍ଧା କିଛି ସୁଫଳ ପାଇପାରି ନାହାନ୍ତି । ଏପରି କି ବର୍ତ୍ତମାନ ତାଙ୍କ ଶରୀର ଅବସ୍ଥା ଯାହା ତାକୁ ଦୃଷ୍ଟି ରେ ରଖି ତୁରନ୍ତ ଇ,ଟି,ସି(ଇଲେକ୍ଟ୍ରିକ ଟ୍ରିଟମେଂଟ ସିଷ୍ଟମ) ବ୍ୟବସ୍ଥା ରେ ତୁରନ୍ତ ଚିକିତ୍ସା ଆବଶ୍ୟକ । ବଲାଙ୍ଗୀର ଜିଲ୍ଲା ମାନସିକ ଚିକିତ୍ସା ବିଭାଗ ମୁଖ୍ୟ ଅଧିକାରୀ ଶ୍ରୀ ଆଶୀର୍ବାଦ ଶତପଥୀ ଏହି ପ୍ରକ୍ରିୟା ସରକାରୀ ଭାବେ ଓଡ଼ିଶାର କୌଣସି ସ୍ଥାନରେ ଉପଲବ୍ଧ ନ ଥିବା ଯୋଗୁଁ ତାଙ୍କୁ କୌଣସି ଏକ ଘରୋଇ ଡାକ୍ତରଖାନାରେ ଚିକିତ୍ସା କରିବା ପରାମର୍ଶ ଦେଇଛନ୍ତି । ହେଲେ ଉକ୍ତ ଚିକିତ୍ସା ନିମନ୍ତେ ଆବଶ୍ୟକୀୟ ଖର୍ଚ୍ଚ ପାଇଁ ଶ୍ରୀ କର ଓ ତାଙ୍କ ସ୍ତ୍ରୀ ବଲାଙ୍ଗୀର ଜିଲ୍ଲାପାଳ ଙ୍କ ନିକଟରେ ଗୁହାରି କରିଥିଲେ । ଆବେଦନ ଅନୁଯାୟୀ ସରକାରୀ ରେଡ଼କ୍ରସ ପାଣ୍ଠି ଅବା ଅନ୍ୟ କେଉଁ ସୂତ୍ରରୁ ଆବଶ୍ୟକୀୟ ଅର୍ଥ ଯୋଗାଇ ଦେବା ବଦଳରେ ଚିକିତ୍ସା ହୋଇ ପାରେ ଉକ୍ତ ବିଲ ଓ କାଗଜପତ୍ର ଦାଖଲ କଲେ ସେ ଟଙ୍କା ଦେବେ କହି ଫେରାଇ ଦେଇଥିବା ଅଭିଯୋଗ ହୋଇଛି । ଏବେ ଟଙ୍କା ଅଭାବରୁ ସେମାନେ ଅକଥନୀୟ ଦୁର୍ଦ୍ଦଶା ରେ କାଳ କାଟୁଥିବା ବେଳେ ଏ ନେଇ ସ୍ଥାନୀୟ ପ୍ରଶାସନ ତରଫରୁ ତୁରନ୍ତ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରି ଶ୍ରୀ କର ଙ୍କୁ ସହାୟତା ଯୋଗାଇଦେବାକୁ ବିଭିନ୍ନ ଅନୁଷ୍ଠାନ ତରଫରୁ ଦାବି ହେଉଛି।