11-Nov-2026

ବଲାଙ୍ଗିର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକ ମକୁନ୍ଦପୁର ଗ୍ରାମପଞ୍ଚାୟତର ଭୀମଡୁଙ୍ଗୁରୀ ପର୍ଯ୍ୟଟନସ୍ଥଳୀଠାରେ ଚାଲିଥିବା ଦ୍ୱାଦଶ ଭୀମପାହାଡ ମହୋତ୍ସବର ତୃତୀୟସଂଧ୍ୟାରେ କଂସଦରବାର ଓ ସାଂସ୍କୃତିକ କାର୍ଯ୍ୟକ୍ରମରେ ମଞ୍ଚ ଦୁଲୁକିଛି । ଲୋକକଳା,ସଂସ୍କୃତି,ଐତିହ୍ୟ ଓ ପରମ୍ପରାର ପ୍ରତୀକସ୍ୱରୂପ ଭୀମପାହାଡ ମହୋତ୍ସବରେ ଅଞ୍ଚଳବାସୀ ସମ୍ମିଳିତ ହୋଇ ମହୋତ୍ସବକୁ ପାଳନ କରୁଛନ୍ତି । ଭୀମପାହାଡ ମହୋତ୍ସବ କମିଟି,ଗିରିଗୋବର୍ଦ୍ଧନ ପୂଜାକମିଟି ପକ୍ଷରୁ ଆୟୋଜିତ ଏହି ମହୋତ୍ସବରେ ବିଶିଷ୍ଟ କଳାକାର ରବିନ୍ଦ୍ରକୁମାର ସାହୁ ଓ ଟିମଙ୍କର କଂସଦରବାର ଖୁବ ଆକର୍ଷିତ କରୁଛି । 

୨୪ ପ୍ରହରୀ ନାମଯଜ୍ଞ ଓ ନାମସଂକିର୍ତ୍ତନ୍ୟ ଚାଲିଥିବା ବେଳେ କଂସଦରବାର ସହ ସାଂସ୍କୃତିକବିଚିତ୍ରା କାର୍ଯ୍ୟକ୍ରମ ଚାଲୁରହିଛି । ମୀନାବଜାର ସହ କୃଷିମେଳା ହଜାର ହଜାର ଦର୍ଶକଙ୍କ ମନମୋହୁଛି ।
 ଆଜି ତୃତୀୟଦିବସର ଦିନବେଳା ସାମାଜିକ ଅନୁଷ୍ଠାନ ମା ମାହେଶ୍ୱରୀ ସେନା ପକ୍ଷରୁ ଏକ ସ୍ୱେଚ୍ଛାକୃତ ରକ୍ତଦାନ ଶିବିର ଓ ମହାନଦୀ ନେତ୍ରଚିକିତ୍ସାଳୟ,ପଣ୍ଡାପାଲି ପକ୍ଷରୁ ମାଗଣା ଚକ୍ଷୁଚିକିତ୍ସା ଶିବିର ଅନୁଷ୍ଠିତ ହୋଇଯାଇଛି । ବଲାଙ୍ଗୀର ଜିଲ୍ଲା ମୁୁଖ୍ୟଚିକିତ୍ସାଅଧିକାରୀ ତଥା ଜନସ୍ୱାସ୍ଥ୍ୟଅଧିକାରୀ ଡ.ପୁଷ୍ପାଞ୍ଜଳି ମିଶ୍ର ମୁଖ୍ୟଅତିଥି ଭାବରେ ଯୋଗଦେଇ ଏହି ସ୍ୱାସ୍ଥ୍ୟ ଶିବିରକୁ ଉଦଘାଟନ କରିଥିଲେ । ଏଥିରେ ମୋଟ ୩୫ ୟୁନିଟ ରକ୍ତସଂଗ୍ରହ କରାଯାଇଥିବା ବେଳେ ୧୪୦ରୁ ଉର୍ଦ୍ଧ୍ୱଲୋକଙ୍କର ଚକ୍ଷୁପରୀକ୍ଷା କରାଯାଇଥିଲା । ବଲାଙ୍ଗୀର ରକ୍ତଭଣ୍ଡାରର କର୍ମଚାରୀମାନେ ରକ୍ତସଂଗ୍ରହରେ ସହଯୋଗ କରିଥିବା ବେଳେ ମହାନଦୀ ନେତ୍ରଚିକିତ୍ସାଳୟର ଡାକ୍ତରମାନେ ଚକ୍ଷୁ ପରୀକ୍ଷା କରିଥିଲେ । ମାହେଶ୍ୱରୀସେନାର ବଲାଙ୍ଗୀର ଜିଲ୍ଲା ସଭାପତି ମନୋଜ କରନ,ରମାକାନ୍ତ ମେଶ୍ୱା,ସୁରେଶ କମ୍ପ,ଯୁଗଲାଲ ପଧାନ,ଜିତୁ ଚାଉଲିଆ,ପ୍ରଶାନ୍ତ ପଧାନ,ଆନନ୍ଦ ଡାଙ୍ଗ,ଆଜାଦ କଲତା,ସୁନିଳ ପଧାନ,ଅବିନାଶ କମ୍ପ ଓ ଗଜାନନ ପଧାନଙ୍କ ନେତୃତ୍ୱରେ ବହୁସଂଖ୍ୟାରେ ଯୁବକମାନେ ସାମିଲ ହୋଇଥିଲେ । ଏହି କାର୍ଯ୍ୟକ୍ରମରେ ମହୋତ୍ସବ କମିଟିର ଅଧ୍ୟକ୍ଷ ଲକ୍ଷ୍ମଣକୁମାର ମେହେର,ସଭାପତି ପ୍ରମୋଦ ବହିଦାର,ସଂପାଦକ ଗୋବର୍ଦ୍ଧନ ସାହୁ,କୋଷାଧ୍ୟକ୍ଷ ଅଭିମନ୍ୟୁ ମାଝୀ,ଉପଦେଷ୍ଟା ଶୈଳେନ୍ଦ୍ର ସାହୁ, ଦୟାସାଗର ମହାକୁର, ରାଜେଶ ନାଏକ, ନନ୍ଦିକିଶୋର ନାଏକ ପ୍ରମୁଖଙ୍କ ସହିତ ଅନ୍ୟାନ୍ୟ କର୍ମକର୍ତ୍ତାଗଣ ସହଯୋଗ କରିଥିଲେ ।
 ସଂଧ୍ୟାରେ ପ୍ରତିଦିନଭଳି ଭଜନସଂଧ୍ୟା କାର୍ଯ୍ୟକ୍ରମ ପରେ ରବିନ୍ଦ୍ର  ସାହୁ ଓ ସାଥିଙ୍କ ଦ୍ୱାରା କଂସଦରବାର କରାଯାଇଥିଲା । ମହୋତ୍ସବ କମିଟିର ସଭାପତି ପ୍ରମୋଦ ବହିଦାରଙ୍କ ସଭାପତିତ୍ୱ ଓ ଅଧ୍ୟକ୍ଷ ଲକ୍ଷ୍ମଣକୁମାର ମେହେରଙ୍କ ସଂଯୋଜନାରେ ଅନୁଷ୍ଠିତ ସାଂସ୍କୃତିକ ସଭାରେ ତୃତୀୟଦିନରେ ମୁଖ୍ୟଅତିଥି 

ଦେଓଗାଁ ବିଡିଓ  ପ୍ରିୟରଞ୍ଜନ କୁମାର ଓ ବରେଣ୍ୟ ଅତିଥି ସଦର ଏସଡିପିଓ ସରୋଜକୁମାର ଉପାଧ୍ୟକ୍ଷାୟ  ଯୋଗଦେଇଥିଲେ । ଏହି ଅବସରରେ ଦେଓଗାଁ ବିଡିଓ ତଥା କଳାକାର ପ୍ରିୟରଂଜନ କୁମ୍ଭାରଙ୍କୁ ଭୀମପାହାଡ ସମ୍ମାନରେ ସମ୍ମାନୀତ କରାଯାଇଥିଲା । ସାଂସ୍କୃତିକବିବିଚିତ୍ରାରେ ବଲାଙ୍ଗୀରର ସଂଜ୍ୟୋତ କଳାକେନ୍ଦ୍ର,କୋସଲ ଫୋକ ଏକାଡେମୀ, ପୁଇଁତଳାର ଘୁଙ୍ଗୁରୁକଳା ପରିଷଦ,ଜରାସିଂହା ପବ୍ଲିକସ୍କୁଲ ଓ ତୁଷୁରାର ତୋଷାଳୀ ବିଦ୍ୟାମନ୍ଦିରର ଛାତ୍ରଛାତ୍ରୀମାନେ ସାଂସ୍କୃତିକ  କାର୍ଯ୍ୟକ୍ରମ ପରିବେଷଣ କରିଥିଲେ । ହଜାର ହଜାର ଦର୍ଶକଙ୍କ ଭିଡ ଲାଗିରହିଥିବା ଦେଖାଯାଇଥିଲା । ଦେଓଗାଁ ଓ ତୁଷୁରା ପୋଲିସ ମୁତୟନ ହୋଇ ଶାନ୍ତିଶୃଙ୍ଖଳା ରକ୍ଷା କରିଥିଲେ ।