10-Nov-2026

ଦେବୋତ୍ତର ବିଭାଗର ନିଷ୍ପତ୍ତିକୁ ନେଇ ଚର୍ଚ୍ଚା, ଫଟୋଚିତ୍ର ସ୍ଥାପନ କରି ପୂଜା ଆୟୋଜନକୁ ନେଇ ଜନସାଧାରଣଙ୍କ ମଧ୍ୟରେ ଦ୍ୱନ୍ଦ୍ୱ
ବଲାଙ୍ଗୀର: ବଲାଙ୍ଗୀରର ଆରାଧ୍ୟ ଦେବୀ ମା' ପାଟଣେଶ୍ୱରୀଙ୍କ ପୀଠକୁ ନେଇ ଗତ କିଛିଦିନ ଧରି ଚାଲିଥିବା ବିବାଦ ମଧ୍ୟରେ ଗୋପାଳଜୀ ମନ୍ଦିର ପରିସରରେ ଦକ୍ଷିଣ କାଳୀ ପୂଜା ଆରମ୍ଭ ହୋଇଛି। ମା' ପାଟଣେଶ୍ୱରୀଙ୍କ ବିଗ୍ରହ ପ୍ରତିଷ୍ଠା ଓ ପୂଜାପାଠକୁ ନେଇ ଉପୁଜିଥିବା ବିବାଦ ପରେ ଏହି ପୂଜା ଆୟୋଜନକୁ ନେଇ ଏବେ ସହରରେ ବିଭିନ୍ନ ଚର୍ଚ୍ଚା ଜୋର ଧରିଛି।
ସୂଚନା ଅନୁଯାୟୀ, ପାଟଣେଶ୍ୱରୀ ମନ୍ଦିରର ପୂଜକ ମହେନ୍ଦ୍ର କୁମାର ଦିଶ୍ରୀଙ୍କୁ ପୂଜାକାର୍ଯ୍ୟରୁ ବାଦ୍ ଦିଆଯିବା ପରେ ଦେବୋତ୍ତର ବିଭାଗ ପକ୍ଷରୁ ତାଙ୍କୁ ଗୋପାଳଜୀ ମନ୍ଦିରରେ ପୂଜାକାର୍ଯ୍ୟ କରିବାକୁ ସୁଯୋଗ ଦିଆଯାଇଥିବା କୁହାଯାଉଛି। ଏହାପରେ ଗୋପାଳଜୀ ମନ୍ଦିର ପରିସରରେ ମା' ପାଟଣେଶ୍ୱରୀଙ୍କ ଫଟୋଚିତ୍ର ସ୍ଥାପନ କରାଯାଇ ଦକ୍ଷିଣ କାଳୀ ପୂଜା ଆରମ୍ଭ ହୋଇଛି।
ତେବେ ଏଠାରେ ଏକ ବଡ଼ ପ୍ରଶ୍ନ ଉଠୁଛି। ଯେଉଁମାନେ ପୂର୍ବରୁ ପାଟଣେଶ୍ୱରୀ ମନ୍ଦିରରେ ବିଗ୍ରହ ପ୍ରତିଷ୍ଠାକୁ ନେଇ ଆପତ୍ତି ଉଠାଇଥିଲେ, ସେମାନେ ଏବେ ଗୋପାଳଜୀ ମନ୍ଦିରରେ ମା'ଙ୍କ ଫଟୋଚିତ୍ର ସ୍ଥାପନ କରି ପୂଜା କରୁଥିବା ଘଟଣାକୁ କିପରି ଦେଖାଯିବ? ଏହାକୁ ନେଇ ଦେବୋତ୍ତର ବିଭାଗ କ'ଣ ମତ ରଖିବ, ତାହା ଏବେ ଆଲୋଚନାର ବିଷୟ ପାଲଟିଛି।
ଏହି ପ୍ରସଙ୍ଗରେ ଜନସାଧାରଣଙ୍କ ମଧ୍ୟରେ ମଧ୍ୟ ବିଭିନ୍ନ ମତ ପ୍ରକାଶ ପାଉଛି। ତେବେ ମା'ଙ୍କ ପୂଜା ଓ ଧାର୍ମିକ ଭାବନାକୁ କୌଣସି ପରିସ୍ଥିତିରେ ବାଧାପ୍ରାପ୍ତ କରାଯିବା ଉଚିତ୍ ନୁହେଁ ବୋଲି ଅନେକ ଶ୍ରଦ୍ଧାଳୁ ମତ ରଖିଛନ୍ତି।
ଅନ୍ୟପକ୍ଷରେ, ଗୋପାଳଜୀ ମନ୍ଦିରରେ ଦକ୍ଷିଣ କାଳୀ ପୂଜା ଶ୍ରଦ୍ଧା ଓ ଭକ୍ତିର ସହ ଚାଲିଥିବା ବେଳେ ଶ୍ରଦ୍ଧାଳୁଙ୍କ ଭିଡ଼ ମଧ୍ୟ ଜମୁଛି। ପୂଜାର ନୀତିକାନ୍ତି ସୁଚାରୁରୂପେ ଚାଲିଥିବା ପୂଜକ ମହେନ୍ଦ୍ର କୁମାର ଦିଶ୍ରୀ ପ୍ରକାଶ କରିଛନ୍ତି।
ଆଗାମୀ ଦିନରେ ଆହୁରି ଧୁମ୍‌ଧାମ୍‌ରେ କାଳୀ ପୂଜା ଆୟୋଜନ କରାଯିବ ବୋଲି ସେ କହିଛନ୍ତି। ତାଙ୍କ ମତରେ, କାଳୀ ପୂଜା ତିନିଦିନ ଧରି ହେବାର ପରମ୍ପରା ରହିଥିବା ବେଳେ ଏଥର ମାତ୍ର ଗୋଟିଏ ଦିନ ପୂଜା କରି ବନ୍ଦ କରାଯାଇଥିବା ଘଟଣା ମଧ୍ୟ ଆଲୋଚନାର ବିଷୟ ହୋଇଛି।
ବର୍ତ୍ତମାନ ଗୋପାଳଜୀ ମନ୍ଦିର ପରିସର ମନ୍ତ୍ରଧ୍ୱନି ଓ ପୂଜାର୍ଚ୍ଚନାରେ ମୁଖରିତ ହେଉଥିବା ବେଳେ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହେଉଥିବା ଦେଖାଯାଉଛି।
ତେବେ ଏହି ସମଗ୍ର ଘଟଣାରେ ଦେବୋତ୍ତର ବିଭାଗର ଆଭିମୁଖ୍ୟ କ'ଣ ରହିବ? ପାଟଣେଶ୍ୱରୀ ପୀଠକୁ ନେଇ ଉପୁଜିଥିବା ବିବାଦର ସମାଧାନ କେବେ ହେବ? ଏହା ଉପରେ ଏବେ ସମସ୍ତଙ୍କ ନଜର।