02-Oct-2026

ଟିଟିଲାଗଡ଼(ପ୍ରେରଣା ଖବର)-  ଗାନ୍ଧୀ ଜୟନ୍ତୀ ଅବସରରେ ଟିଟିଲାଗଡ଼କୁ ପରିଷ୍କାର, ସବୁଜ ଓ ସୁସ୍ଥ ସହର ଭାବେ ଗଢ଼ି ତୋଳିବା ଉଦ୍ଦେଶ୍ୟରେ ଶ୍ରୀ ଦାଦୀଜୀ ମନ୍ଦିର ଟ୍ରଷ୍ଟ ପ୍ରଭାବତୀ ପବ୍ଲିକ୍ ସ୍କୁଲ୍ ପକ୍ଷରୁ ‘ଗ୍ରୀନ ଟିଟିଲାଗଡ଼–କ୍ଲିନ୍ ଟିଟିଲାଗଡ଼’ ଅଭିଯାନ ଅନୁଷ୍ଠିତ ହୋଇଯାଇଛି। ୨ ଅକ୍ଟୋବର  ଶୁକ୍ରବାର ସକାଳ ୮ଟାରୁ ଏହି ଅଭିଯାନ ଆରମ୍ଭ ହୋଇ ରେଳ ଷ୍ଟେସନରେ ପହଞ୍ଚିଥିଲା। ଟିଟିଲାଗଡ଼ ରେଲୱେ ଷ୍ଟେସନ ଠାରେ ଏହାର ଉଦ୍‌ଘାଟନ ସମାରୋହରେ ମୁଖ୍ୟ ଅତିଥି ଭାବେ ଟିଟିଲାଗଡ ବିଧାୟକ ଶ୍ରୀଯୁକ୍ତ ନବୀନ ଜୈନ, ସମ୍ମାନୀତ ଅତିଥି ଭାବେ ଉପ ଜିଲ୍ଲାପାଳ ଶ୍ରୀଯୁକ୍ତ ପଦ୍ମନାଭ ସାମନ୍ତରାୟ, ପୌର ପରିଷଦର ନିର୍ବାହୀ ଅଧିକାରୀ ଶ୍ରୀଯୁକ୍ତ ଚନ୍ଦନ ଶତପଥି, ଏସଡିପିଓ ଶ୍ରୀଯୁକ୍ତ ଯଶୋବନ୍ତ ନାରାୟଣ ପ୍ରଧାନୀ, ସ୍କୁଲ ଟ୍ରଷ୍ଟି ଶ୍ରୀମତି ଶ୍ୟାମା ଦେବୀ ଅଗ୍ରୱାଲ, ସ୍କୁଲ ଅଧ୍ୟକ୍ଷା ଡ୍ ସୁନନ୍ଦା ଜତି, ସ୍କୁଲ ଉପାଧ୍ୟକ୍ଷା ଶ୍ରୀଯୁକ୍ତ ପିତାମ୍ବର ଶର୍ମା, ଅବସରପ୍ରାପ୍ତ ପ୍ରଧାନ ଶିକ୍ଷୟତ୍ରୀ ଶ୍ରୀମତି ସ୍ନିଗ୍ଧା ମହାନ୍ତି ରୋଟାରି କ୍ଲବ ସଭାପତି ଶ୍ରୀମତି ସାରଦା ରାଓ ମଞ୍ଚାସୀନ ହୋଇଥିଲେ। ତାପରେ  ଅତିଥିଙ୍କ ଦ୍ଵାରା ସ୍ବଛତା ଉପରେ ନିଜର ବକ୍ତବ୍ୟ ପ୍ରଦାନ କରିଥିଲେ। ସ୍କୁଲ ଛାତ୍ର ଛାତ୍ରୀଙ୍କ ଦ୍ଵାରା ସ୍ବଛତାକୁ ନେଇ ଏକ ନାଟକ ପରିବେଷଣ କରାଯାଇଥିଲା। ଏହି ଅବସରରେ ବିଧାୟକ ଶ୍ରୀଯୁକ୍ତ ନବୀନ ଜୈନ ସମସ୍ତଙ୍କୁ ସ୍ବଛତାର ସଂକଳ୍ପ ଗ୍ରହଣ କରାଇବା ସହ ସହରକୁ ସଫା ସୁତୁରା ରଖିବାକୁ ଆହ୍ୱାନ ଦେଇଥିଲେ। ଏହାପରେ ସମସ୍ତ ଅତିଥି ମାନେ ସ୍କୁଲ ଛାତ୍ର ଛାତ୍ରୀଙ୍କ ସହ ମିଶି ସଫେଇ ଅଭିଯାନ ଆରମ୍ଭ କରିଥିଲେ।ଏହି କାର୍ଯ୍ୟକ୍ରମରେ ବିଦ୍ୟାଳୟର ଛାତ୍ରଛାତ୍ରୀ, ଶିକ୍ଷକ-ଶିକ୍ଷୟିତ୍ରୀ ଓ ସ୍ଥାନୀୟ ସମାଜର ସଦସ୍ୟମାନେ ଏଥିରେ ସକ୍ରିୟ ଭାବେ ସାମିଲ ହୋଇଥିଲେ । ସହରରେ ପରିଷ୍କାର ପରିଚ୍ଛନ୍ନତା ବଜାୟ ରଖିବା, ପରିବେଶ ସୁରକ୍ଷା ପ୍ରତି ଲୋକଙ୍କ ଦାୟିତ୍ୱବୋଧ ବୃଦ୍ଧି କରିବା ଏବଂ ନାଗରିକ ସଚେତନତା ସୃଷ୍ଟି କରିବା ଏହି ଅଭିଯାନର ମୁଖ୍ୟ ଲକ୍ଷ୍ୟ ବୋଲି ବିଦ୍ୟାଳୟର ଅଧ୍ୟକ୍ଷା ଡ ସୁନନ୍ଦା ଜଟି କହିବା ସହ ସ୍ୱଚ୍ଛତା କାର୍ଯ୍ୟ, ବର୍ଜ୍ୟବସ୍ତୁ ସଂଗ୍ରହ, ପରିବହନ ଓ ଏହାର ସଠିକ୍ ନିଷ୍କାସନ ପାଇଁ ସମ୍ପୃକ୍ତ ପ୍ରଶାସନିକ ଓ ନାଗରିକ କର୍ତ୍ତୃପକ୍ଷଙ୍କ ସହଯୋଗ ଓ ସମନ୍ୱୟ ଲୋଡ଼ାଯାଇଥିଲା।

ବିଦ୍ୟାଳୟର ଅଧ୍ୟକ୍ଷା ଡ. ସୁନନ୍ଦା ଜାତି ଏହି ଅଭିଯାନକୁ ସଫଳ କରାଇଥିବାରୁ ସମସ୍ତଙ୍କୁ ଧନ୍ୟବାଦ୍ ଜ୍ଞାପନ କରିଛନ୍ତି। ଏହି କାର୍ଯ୍ୟକ୍ରମକୁ ପରିଚାଳନା କରାଇବାରେ ଧରିତ୍ରୀ ମହାନ୍ତି, ଧବଳେଶ୍ବର ଦଳବେହେରା, ଇପ୍ସିତା ମିଶ୍ର, ବନମାଳି ପଣ୍ଡା, ପ୍ରମୋଦ କୁମାର ପାଲ ସହଯୋଗ କରିଥିଲେ।