20-Sep-2026

ବିନିକା(ହିମାଂଶୁ ଶେଖର ପୁଟେଲ)ସୁବର୍ଣ୍ଣପୁର ଜିଲ୍ଲା ବିନିକା ବ୍ଲକ ବାବୁପାଲି ପଞ୍ଚାୟତ ଅଧୀନ ବାଗଡିଆ ଗାଁରେ ଆଡମ୍ବର ଓ ଭକ୍ତିମୟ ପରିବେଶରେ ପାଳିତ ହୋଇଛି ପବିତ୍ର ବିଶ୍ୱକର୍ମା ପୂଜା। ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଗାଁବାସୀଙ୍କ ପକ୍ଷରୁ ଧୁମଧାମରେ ପୂଜାର ଆୟୋଜନ କରାଯାଇଥିଲା।
ପାରମ୍ପରିକ ରୀତିନୀତି ଓ ବିଧିବିଧାନ ଅନୁସାରେ ପୂଜାର୍ଚ୍ଚନା କରାଯାଇଥିବା ବେଳେ ପୂଜକ ଭାବେ ଲଳିତ ମିଶ୍ର ଓ ପୂଜା କର୍ତ୍ତା ଭାବେ ଗଣେଶ୍ୱର ରାୟ ଦାୟିତ୍ୱ ତୁଲାଇଥିଲେ।
ପୂଜା ଅବସରରେ ପ୍ରତିଦିନ ବିଭିନ୍ନ ମନୋରଞ୍ଜନଧର୍ମୀ ଓ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ତୃତୀୟ ଦିନରେ ଛୋଟ ଛୋଟ ଶିଶୁଙ୍କ ଦ୍ୱାରା ନାଚ, ଗୀତ ଓ ମ୍ୟୁଜିକ୍ ଚେୟାର୍ ଭଳି ବିଭିନ୍ନ କାର୍ଯ୍ୟକ୍ରମ ପରିବେଷଣ କରାଯାଇଥିଲା।
ଏହା ସହିତ ବାଗଡିଆର ମାଁ ବୁଢ଼ୀମାଉଲି କୁଲ୍ଲାପାଟ ମହିଳା ସଂକୀର୍ତ୍ତନ ମଣ୍ଡଳୀ ପକ୍ଷରୁ ମଧ୍ୟ ଭକ୍ତିମୟ କୀର୍ତ୍ତନ ପରିବେଷଣ କରାଯାଇଥିଲା। କୀର୍ତ୍ତନ ଗାୟିକା ସଞ୍ଜୁ ଭୁଏ ଓ ବାୟକ ସରୋଜ ପୋଢ଼ଙ୍କ ନେତୃତ୍ୱରେ କୀର୍ତ୍ତନ ଦଳ ଭକ୍ତିରସରେ ଦର୍ଶକଙ୍କୁ ବାନ୍ଧି ରଖିଥିଲେ।
ଏହି ସାଂସ୍କୃତିକ ଓ ଭକ୍ତିମୟ କାର୍ଯ୍ୟକ୍ରମ ଦେଖିବା ପାଇଁ ଆଖପାଖ ପଡ଼ୋଶୀ ଗାଁରୁ ମଧ୍ୟ ବହୁ ସଂଖ୍ୟାରେ ଲୋକଙ୍କ ସମାଗମ ହୋଇଥିଲା। ଲୋକେ ଶାନ୍ତି ଶୃଙ୍ଖଳାର ସହିତ ନାଚ, ଗୀତ,ମ୍ୟୁଜିକ୍ ଚେୟାର୍ ଓ କୀର୍ତ୍ତନ କାର୍ଯ୍ୟକ୍ରମକୁ ଉପଭୋଗ କରିଥିଲେ।