06-Sep-2026

ବଲାଙ୍ଗୀର: ପାଟଣା ଷ୍ଟେଟ ସମୟରେ ବାଲାଙ୍ଗୀରରେ ଏକ ହାଇକୋର୍ଟ କାର୍ଯ୍ୟକରୁଥିଲା। ୧୯୪୦ ମସିହା ସେପ୍ଟେମ୍ବର ୬ ତାରିଖରେ ଏହି କୋର୍ଟ ପ୍ରତିଷ୍ଠା ହୋଇ ପାଟଣା ଷ୍ଟେଟ ର ଜନସାଧାରଣ ଙ୍କୁ ନ୍ୟାୟ ପ୍ରଦାନରେ ଏକ ପ୍ରମୁଖ ଭୂମିକା ଗ୍ରହଣ କରି ଆସୁଥିଲା। ତେବେ ସମୟ କ୍ରମେ ଏହି ହାଇକୋର୍ଟ କଟକ କୁ ସ୍ଥାନାନ୍ତରଣ କରାଯଇଥିଲା। ଆଜି ଏହି ପାଟଣା ହାଇକୋର୍ଟ ପ୍ରତିଷ୍ଠା ଦିବସ ର ୮୬ବର୍ଷ ପୂର୍ତ୍ତି ଅବସରରେ ବାଲାଙ୍ଗୀରରେ ଏକ ଭବ୍ୟ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।

ବଲାଙ୍ଗୀର ଜିଲା ଓକିଲ ସଂଘ ପକ୍ଷରୁ ଏହି ଐତିହାସିକ ଦିନ କୁ ମନେ ପକାଇବା ପାଇଁ  ହାଇକୋର୍ଟ ଜ୍ୟୋତିଯାତ୍ରା କାର୍ଯ୍ୟକ୍ରମ ଅନୁଷ୍ଠିତ ହୋଇଛି।  ବଲାଙ୍ଗୀରରେ ହାଇକୋର୍ଟ ସ୍ଥାୟୀ ବେଞ୍ଚ ପ୍ରତିଷ୍ଠା  ପରି ଏକ ନ୍ୟାର୍ଯ୍ୟ ଦାବି କୁ ନେଇ  ହାଇକୋର୍ଟ ଜ୍ୟୋତିଯାତ୍ରା ସହର ପରିକ୍ରମା କରିଥିଲା । ବଲାଙ୍ଗୀର ଜିଲ୍ଲା ଓକିଲ ସଂଘର ଶତାଧିକ ସଭ୍ୟ, ସଚେତନ ନାଗରିକ ଓ ବୁଦ୍ଧିଜୀବୀ ଏହି ଜ୍ୟୋତି ଯାତ୍ରା ରେ ସାମିଲ ହୋଇଥିଲେ। ପ୍ରଥମେ ମାଁ ପାଟଣେଶ୍ବରୀ ମନ୍ଦିରରେ ପୂଜାର୍ଚ୍ଚନା କରାଯାଇଥିଲା।  ବରିଷ୍ଠ ଆଇନଜୀବୀ ଅମରେନ୍ଦ୍ର ମିଶ୍ର ଜ୍ୟୋତି ମଶାଲ ଧରି ପରିକ୍ରମା କାର୍ଯ୍ୟକ୍ରମର ଶୁଭାରମ୍ଭ କରିଥିଲେ।ଏହି ଶୋଭାଯାତ୍ରାରେ ଜିଲା ଓକିଲ ସଂଘ ସଭାପତି ବାସୁଦେବ ରଥ, ସମ୍ପାଦକ ଅସିତ ଷଡ଼ଙ୍ଗୀ, ଉପସଭାପତି ଚିନ୍ମୟ ମିଶ୍ର, ବରିଷ୍ଠ ଓକିଲ ଭବାନୀ ଶଙ୍କର ଶତପଥୀ, ଡ. ଶ୍ରୀକର ମିଶ୍ର, ସରୋଜ ଗୁପ୍ତା, ରବିନାରାୟଣ ବହିଦାର, ପ୍ରମୋଦ ତ୍ରିପାଠୀ, ଜୟରାମ ମିଶ୍ର, ସୁମିତ ଖୁଆସ, ମାଧବ ପୁରୋହିତ,  ରତନ ମହାରଣା, ଦୀପ୍ତି ଶର୍ମା, ଦେବେନ୍ଦ୍ର ପାଣିଗ୍ରାହୀ, ସୁଧାଂଶୁ ଶେଖର ଦେଓ, ସଞ୍ଜୟ ପଟେଲ, ଦେବାଶିଷ ବିଶ୍ବାଳ, ସନ୍ତୋଷ ପାଢ଼ୀ, ଅଶୋକ ରାଉତ, ଉମାକାନ୍ତ ସାହୁ, ଅର୍ଜୁନ ମୁଗ୍ରୀ ଙ୍କ  ସମେତ ବିଭିନ୍ନ ସଂଗଠନରୁ ପ୍ରକାଶ ନେପାକ, ଭଗବାନ ବଗର୍ତ୍ତୀ, ନଗର କଂଗ୍ରେସ ସଭାପତି ବୁଲୁ ଦାନୀ ଓ ଅନ୍ୟମାନେ ଉପସ୍ଥିତ ଥିଲେ।  ଜ୍ୟୋତି ଯାତ୍ରା ପାଟଣେଶ୍ୱରୀ ମନ୍ଦିରରୁ ବାହାରି ସମଲେଶ୍ୱରୀ ମନ୍ଦିର ଦେଇ ଜିଲ୍ଳାପାଳଙ୍କ କାର୍ଯ୍ୟାଳୟ ସାମ୍ନାରେ ପହଞ୍ଚିଥିଲା। ବଲାଙ୍ଗୀର କଚେରି ଛକଠାରେ ଶୋଭାଯାତ୍ରା ପହଞ୍ଚିବା ପରେ ସେଠାରେ ଓକିଲ ମାନଙ୍କ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଥିଲା । ସେଠାରେ ପୂର୍ବତନ ମନ୍ତ୍ରୀ ନରସିଂହ ମିଶ୍ର ଯୋଗଦେଇ ଓକିଲମାନଙ୍କୁ ଉତ୍ସାହିତ କରିଥିଲେ। ଶୋଭାଯାତ୍ରା ସହର ପରିକ୍ରମା କରି

ସିଭିଲ କୋର୍ଟରେ ପହଞ୍ଚିଥିଲା।

  ସୂଚନାଯୋଗ୍ୟ ଯେ, ଗତ କିଛି ଦିନ ତଳେ ରାଜ୍ୟ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହ ଦେଓ ମଧ୍ୟ ବଲାଙ୍ଗୀରରେ ହାଇକୋର୍ଟ ଵେଞ୍ଚ ସ୍ଥାପନ ଦାବିର ଯଥାର୍ଥତାକୁ ଦୋହରାଇଥିଲେ। ପାଲ କମିଶନ ଓ ଯଶବନ୍ତ କମିଶନ ର ରିପୋର୍ଟ ଅନୁସାରେ ବାଲାଙ୍ଗୀରରେ ହାଇକୋର୍ଟ ଵେଞ୍ଚ ସ୍ଥାପନ ର ଯୁକ୍ତି ରହିଥିବା ବେଳେ ରାଜ୍ୟରେ ଚାଲିଥିବା ଡବଲ ଇଂଜିନ ସରକାର ଏହି ଦାବି ପୂରଣ ଦିଗରେ ତତ୍ପରତା ପ୍ରକାଶ କରିବାକୁ ବଲାଙ୍ଗୀର ଜିଲ୍ଲା ଓକିଲ ସଂଘର ସଭାପତି ବାସୁଦେବ ରଥ ନିବେଦନ କରିଛନ୍ତି।