03-Jun-2026

ବଲାଙ୍ଗୀର(ପ୍ରେରଣା ଖବର): ସ୍ମାର୍ଟ ମିଟର ଆଳରେ ଗ୍ରାହକ ମାନଙ୍କୁ ଲୁଟୁଛି ବିଦ୍ୟୁତ ବିଭାଗ । ପ୍ରତିଦିନ ଘଂଟା ଘଂଟା ବିଦ୍ୟୁତ କାଟ ଯୋଗୁଁ ସାଧାରଣ ଲୋକେ ଅତିଷ୍ଟ ହୋଇ ପଡିଥିବା ବେଳେ ଉପଭୋକ୍ତାଙ୍କ ଠାରୁ ପୂରୁଣା ବିଦ୍ୟୁତ ବକେୟା ବିଲ୍ ଆଦାୟ କରାଯାଉଛି । ଏହା ସହ ବିଭିନ୍ନ କାରଣ ଦର୍ଶାଇ ବିଦ୍ୟୁତ ଫାଇନ୍ ଆଦାୟ କରାଯାଉଛି। ତେବେ ରାଜ୍ୟରେ  ଶାସନ କରୁଥିବା ଡବଲ ଇଂଜିନ୍ ସରକାରଙ୍କ ଅପାରଗତା ଯୋଗୁଁ ବିଦ୍ୟୁତ ଉପଭୋକ୍ତା ମାନେ ଆଜି ବିଦ୍ୟୁତ ସମସ୍ୟାକୁ ନେଇ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏପରି କିଛି ପ୍ରସଙ୍ଗକୁ ନେଇ ଆଜି ପାଟଣାଗଡ଼ ବିଜୁ ଜନତା ଦଳ ତରଫରୁ ନିଜର ୭ଦଫା ଦାବି ନେଇ ମହାମହିମ ରାଜ୍ୟପାଳଙ୍କ ଉଦ୍ଦେଶ୍ୟରେ ପାଟଣାଗଡ଼ ବିଦ୍ୟୁତ ବିଭାଗ ଏସ୍‌ଡିଓ ଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି । ପାଟଣାଗଡ଼ର ପୂର୍ବତନ ବିଧାୟକ ତଥା ବିଜେଡି ଜିଲ୍ଲା ସଭାପତି ସାରୋଜ ମେହେରଙ୍କ ନେତୃତ୍ୱରେ ଶତାଧିକ ବିଜେଡି କର୍ମୀ ଓ କର୍ମକର୍ତ୍ତା ତଥା ବିଭିନ୍ନ ସଂଗଠନର ସଭ୍ୟ ମାନେ ଏକ ରେଲିରେ ବାହାରି  ପାଟଣାଗଡ଼ ବିଦ୍ୟୁତ ଅଫିସ ଘେରାଓ କରିଥିଲେ । ୨ଠ୨୪ ନିର୍ବାଚନ ପୂର୍ବରୁ ବିଜେପି ସରକାର ନିଜର ନିର୍ବାଚନ ଇସ୍ତାହାରରେ ପ୍ରତ୍ୟେକ ଉପଭୋକ୍ତାଙ୍କୁ ୩ଠଠୟୁନିଟ୍ ବିଦ୍ୟୁତ ବିଲ୍ ମାଗଣାରେ ଦିଆଯିବ ବୋଲି ପ୍ରତିଶୃତି ଦେଇଥିଲେ । ଆଜି ରାଜ୍ୟରେ ଡବଲ ଇଂଜିନ୍ ସରକାର ଲୋକଙ୍କୁ  ପ୍ରତିଶୃତି ନାଁ ରେ କେବଳ ପ୍ରତାରଣା ଦେଇଛି ବୋଲି ବିଜେଡି ଅଭିଯୋଗ କରିଛି । ଖୋଦ ଉପମୁଖ୍ୟମନ୍ତ୍ରୀ ତଥା ଶକ୍ତି ମନ୍ତ୍ରୀଙ୍କ ନିର୍ବାଚନ ମଣ୍ଡଳୀରେ ଯଦି ଏପରି ଅଭାବନୀୟ ଚିତ୍ର ଦେଖିବାକୁ ମିଳିଛି, ତେବେ ରାଜ୍ୟରେ ବିଦ୍ୟୁତ ଉପଭୋକ୍ତା ମାନେ କେଉଁ ପରିସ୍ଥିତିରେ ଥିବା ତାହାକୁ ନେଇ ପ୍ରଶ୍ନ ଉଠାଇଛନ୍ତି ପାଟଣାଗଡ଼ର ପୂର୍ବତନ ବିଧାୟକ ସରୋଜ ମେହେର । ଆଜି ଶତାଧିକ ବିଜେଡି କର୍ମୀ ହାତରେ ପ୍ଲାକାର୍ଡ ଧରି ବିଭିନ୍ନ ସରକାରୀ ବିରୋଧୀ ସ୍ଲୋଗାନ ଦେଇ ପାଟଣାଗଡ଼ ବିଜେଡି କାର୍ଯ୍ୟାଳୟ ଠାରୁ ବିଦ୍ୟୁତ ବିଭାଗ କାର୍ଯ୍ୟଳୟ ପର୍ଯ୍ୟନ୍ତ ଏକ ବିଶାଳ ରେଲି ବାହାରିଥିଲା । କେ.ବି ସିଂହଦେଓ ମୁର୍ଦ୍ଦାବାଦ , କେ.ବି ସିଂହଦେଓ ହାଏ ହାଏ ନାରା ଦେଇ ବିଜେଡି କର୍ମୀ ମାନେ ବାହାରି ଥିଲେ। ଆନ୍ଦୋଳନକାରୀ ମାନେ ଉପମୁଖ୍ୟମନ୍ତ୍ରୀ ତଥା ପାଟଣାଗଡ଼ ବିଧାୟକ କନକବର୍ଦ୍ଧନ ସିଂଦେଓଙ୍କ କୁଶପୁତ୍ତଳିକା ଦାହ କରିଥିଲେ। ବିଦ୍ୟୁତ ବିଭାଗ ସ୍ମାର୍ଟ ମିଟର ପ୍ରଦଳନ ତରୁନ୍ତ ବନ୍ଦ କରିବା ସହ ଚାଷୀ ମାନଙ୍କୁ ସଂପୂର୍ଣ୍ଣ ମାଗଣା ବିଦ୍ୟୁତ ବିଲ୍ ପ୍ରଦାନ କରିବା ଏବଂ ପୂରୁଣା ବକେୟା ବିଲ୍ ଥିଲେ ମଧ୍ୟ ନୂତନ ବିଦ୍ୟୁତ ସଂଯୋଗ କରାଯିବା ପାଇଁ ପାଟଣାଗଡ଼ ବିଜେଡି ପକ୍ଷରୁ ଦାବି କରାଯାଇଛି । ଆଗାମୀ ଦିନରେ ପାଟଣାଗଡ଼ ବିଦ୍ୟୁତ ବିଭାଗ ଉପଭୋକ୍ତା ମାନଙ୍କ ସାମୂହିକ ସ୍ୱାର୍ଥକୁ ଦୃଷ୍ଟିରେ ରଖି ଏହି ଦାବି ସବୁ ପୂରଣ ନକଲେ  ବିଜେଡି ଆନ୍ଦୋଳନକୁ ଆହୁରି ତୀବ୍ରତର କରିବ ବୋଲି ଚେତାବନୀ ଦେଇଛି ।