02-Jun-2026

ବଲାଙ୍ଗୀର(ପ୍ରେରଣା ଖବର)-ଆଜି ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓ ସ୍ଥାନୀୟ ସର୍କିଟହାଉସଠାରେ ବିଭିନ୍ନ ବିଭାଗୀୟଅଧିକାରୀଙ୍କୁ ଡାକି ଆଲୋଚନା କରିବା ସହିତ ଉନ୍ନୟନକାମର ସମୀକ୍ଷା କରିଛନ୍ତି। ତେବେ ବଲାଙ୍ଗୀର ସହରରେ ଦେଖାଦେଇଥିବା ଜଳସଂକଟ ଦୂରକରିବା ଓ ଗ୍ରାମାଞ୍ଚଳରେ ପାନୀୟଜଳର ସୁବ୍ୟବସ୍ଥା କରିବା ପାଇଁ ପିଏଚବିଭାଗ ଓ ଆରଡବ୍ଲୁଏସଏସ ବିଭାଗକୁ ନିର୍ଦ୍ଦେଶ ଦେଇଛନ୍ତି । ବିଧାୟକ କଳିକେଶ ବଲାଙ୍ଗୀର ପୌରାଧ୍ୟକ୍ଷା ଲିକା ସାଙ୍କୁ ନେଇ ପ୍ରଥମେ ବଲାଙ୍ଗୀର ସହରରେ ଦେଖା ଦେଉଥିବା ବିଦ୍ୟୁତସମସ୍ୟା ନେଇ ବିଦ୍ୟୁତବିଭାଗର ଅଧିକ୍ଷଣ ଯନ୍ତ୍ରୀଙ୍କ ସହ ଆଲୋଚନା କରିଥିଲେ। ବଲାଙ୍ଗୀର ସହରକୁ ସଠିକ ପରିମାଣରେ ବିଦ୍ୟୁତ ଯୋଗାଣ ହେଉଥିବା ବେଳେ କିଛିସ୍ଥାନରେ ଦୁର୍ବଳ ଭିତ୍ତିଭୂମୀ କାରଣରୁ ସମସ୍ୟା ରହିଥିବା ଅଧିକ୍ଷଣଯନ୍ତ୍ର ସ୍ୱୀକାର କରିଥିଲେ। ଅନେକ ସ୍ଥାନରେ ନୂତନ ଟ୍ରାନ୍ସଫର୍ମର ଓ କେବୁଲିଂ କରାଯାଇ ସାରିଥିବା ସୂଚନା ଦେବା ସହିତ ଖୁବଶୀଘ୍ର ସମସ୍ୟାଗୁଡିକର ସମାଧାନ କରାଯିବ ବୋଲି ଯନ୍ତ୍ରୀ କହିଥିଲେ । ତେବେ ବଲାଙ୍ଗୀର ସହରରେ ଦୁଇଘଣ୍ଟାରୁ ଅଧିକ ସମୟ ବିଦ୍ୟୁତ ଚାଲିଯାଉଥିବା,ଶାସ୍ତ୍ରୀନଗରରେ ନୂଆଟ୍ରାନ୍ସଫର୍ମର ଲଗାଇବା.ବରପାଲିପଡା ଅଞ୍ଚଳରେ ଲୋଭୋଲଟେଜ ସମସ୍ୟା ବିଷୟରେ ବିଧାୟକ ଯନ୍ତ୍ରୀଙ୍କ ସହିତ ଆଲୋଚନା କରିଥିଲେ ଓ ସମସ୍ୟାର ସମାଧାନ କରିବାକୁ ନିର୍ଦ୍ଦେଶ କରିଥିଲେ । ଠିକ ସେହିପରି ବଲାଙ୍ଗୀର ସହରକୁ ତରଭା ନିକଟରୁ ତେଲନଦୀରୁ ପାନୀୟଜଳ ଆସୁଥିବା ଓ ବିଦ୍ୟୁତସମସ୍ୟାରୁ ଠିକରେ ଜଳ ଯୋଗାଣ ହୋଇପାରୁନଥିବା ବିଷୟରେ ଜନସ୍ୱାସ୍ଥ୍ୟବିଭାଗର ଅଧିକ୍ଷଣଯନ୍ତ୍ରୀ ଇଂ.ଇନ୍ଦ୍ରଜିତ ସାହୁ ବିଧାୟକଙ୍କୁ ଅବଗତ କରିଥିଲେ । ବଲାଙ୍ଗୀର ସହରୁ ପ୍ରତିଦିନ ୧୭ଲକ୍ଷ ଲିଟର ପାଣିର ଆବଶ୍ୟକତା ଥିବା ବେଳେ ପ୍ରତ୍ୟହ ୧୭.୫ ଲକ୍ଷ ଲିଟର ଜଳ ଅଣାଯାଉଛି। ୧୫% ଜଳ ଜଳ ଯୋଗାଣବେଳେ ନଷ୍ଟ ହେଉଛି । ତେବେ ସୋନପୁର ଜିଲ୍ଲାରେ ବିଦ୍ୟୁତ ସମସ୍ୟାରୁ ବହୁତ ସମୟରେ ପମ୍ପ ଚାଲିପାରୁନଥିବାରୁ ସମସ୍ୟା ହେଉଛି ବୋଲି ପିଏଚ ଯନ୍ତ୍ରୀ ଇଂ.ସାହୁ କହିଥିଲେ । ସେପଟେ କିନ୍ତୁ ଗତ ଅପ୍ରେଲ ମାସରେ ଶିବତଳା ପମ୍ପହାଉସ ପାଇଁ ସ୍ୱତନ୍ତ୍ର ଟ୍ରାନ୍ସଫର୍ମର ଲଗାଯାଇ ସାରିଥିବା ବିଷୟରେ ବିଦ୍ୟୁତବିଭାଗର ଅଧିକ୍ଷଣଯନ୍ତ୍ରୀ କହିଥିଲେ। ଏଣିକି ଆଉ ବେଶି ସମସ୍ୟା ହେବ ନାହିଁ ବୋଲି ଯନ୍ତ୍ରୀ କହିଥିଲେ । ସହରରେ ଅଧିକଟ୍ୟାଙ୍କର ଓ ପାଣିଟାଙ୍କିର ବ୍ୟବସ୍ଥା କରି ଜଳ ଯୋଗାଣ କରିବାକୁ ବିଧାୟକ ନିର୍ଦ୍ଦେଶ କରିଥିଲେ । ଲୋୟରସୁକତେଲ ବିସ୍ଥାପିତ କଲୋନୀରେ ଜଳସମସ୍ୟା କଥା ମଧ୍ୟ ଆଲୋଚନା ହୋଇଥିଲା । ଚଳିତବର୍ଷ ଲୋୟରସୁକତେଲ କତ୍ତୃପକ୍ଷ ଟ୍ୟାଙ୍କର ଲଗାଇ ଜଳ ଯୋଗାଣ କରୁଥିବା ବିଷୟରେ ଆରଡବ୍ଲୁଏସଏସ ବିଭାଗ ସୂଚନା ଦେଇ ଥିଲେ । ଠିକ ସେହିପରି ଗ୍ରାମାଞ୍ଚଳରେ ଅଧିକ ଡିପ ବୋରେୱେଲ ରୁ ସୋଲାର ପମ୍ପ ଯୋଗେ ପାନୀୟଜଳ ଯୋଗାଣ ପାଇଁ ବିଧାୟକ ନିର୍ଦ୍ଦେଶ କରିଥିଲେ । ସେପଟେ ବଲାଙ୍ଗୀର ପୌରପାଳିକା ଅଞ୍ଚଳରେ ଡ୍ରେନସମସ୍ୟାର ସମାଧାନ ପାଇଁ ପୌରପାଳିକା ସହିତ ଏନଏଚବିଭାଗ ଓ ପୂର୍ତ୍ତବିଭାଗ ସହ ଯୋଗ କରିବାକୁ ନିର୍ଦ୍ଦେଶ କରାଯାଇଥିଲା। ଅନ୍ୟମାନଙ୍କ ମଧ୍ୟରେ କ୍ଷୁଦ୍ରଜଳସେଚନ ବିଭାଗ,ମେଗା ପାନୀୟଜଳ ଯୋଗାଣପ୍ରକଲ୍ପବିଭାଗ ଓ ପୌରପାଳିକାର ବିଭିନ୍ନ ପ୍ରକଲ୍ପ ଉପରେ ବିଧାୟକ ସମୀକ୍ଷାକରି ଆବଶ୍ୟକ ନିର୍ଦ୍ଦେଶ ଦେଇଥିଲେ ।