12-May-2026

ବଲାଙ୍ଗୀର(ପ୍ରେରଣା ଖବର)  ନର୍ସମାନଙ୍କର ନିଷ୍ଠା, ସେବାଭାବ ଏବଂ ରୋଗୀ ସେବା ପ୍ରତି ସେମାନଙ୍କର ନିସ୍ଵାର୍ଥ ଅବଦାନକୁ ସମ୍ମାନ ଜଣାଇବା ପାଇଁ ସ୍ୱରାଜ ହସ୍ପିଟାଲ ଏବଂ ରିସର୍ଚ୍ଚ ଇନଷ୍ଟିଟ୍ୟୁଟ୍ ରେ  ଆନ୍ତର୍ଜାତୀୟ ନର୍ସ ଦିବସ ଉତ୍ସାହ ଉଦ୍ଦୀପନାର ସହ ପାଳନ କରାଯାଇଥିଲା। ଏହି ବର୍ଷର ବିଷୟବସ୍ତୁ ଥିଲା “ଆମ ନର୍ସ, ଆମ ଭବିଷ୍ୟତ”  ଯାହା ନର୍ସମାନଙ୍କ ଗୁରୁତ୍ୱ ଏବଂ ସୁସ୍ଥ ସମାଜ ଗଠନରେ ସେମାନଙ୍କ ଅବଦାନକୁ ଉଜାଗର କରିଥିଲା।

ଏହି ଅବସରରେ ନର୍ସିଙ୍ଗର ଜନନୀ ଏବଂ “ଲେଡି ଓଇଥ ଦ ଲ୍ୟାମ୍ପ” ଭାବେ ପରିଚିତ ଫ୍ଲୋରେନ୍ସ ନାଇଟିଙ୍ଗେଲଙ୍କ ଜୀବନ ଓ ଶିକ୍ଷାକୁ ସ୍ମରଣ କରାଯାଇଥିଲା। ହସ୍ପିଟାଲର ସମସ୍ତ ନର୍ସ ମହମବତୀ ଧରି ନର୍ସିଙ୍ଗ  ବୃତ୍ତିର ଶପଥ ନେଇଥିଲେ।

 ସ୍ୱରାଜ ହସ୍ପିଟାଲ ଏବଂ ରିସର୍ଚ୍ଚ ଇନଷ୍ଟିଟ୍ୟୁଟର ଚେୟାରମ୍ୟାନ ଡାଃ ସୁଜ୍ଞାନେନ୍ଦ୍ର ମିଶ୍ର ଯୋଗ ଦେଇ  ନର୍ସିଙ୍ଗ ପେଶାକୁ ଏକ ମହାନ ଏବଂ ପବିତ୍ର ପେଶା ଭାବେ ବର୍ଣ୍ଣନା କରିଥିଲେ ଏବଂ ଦିନ ରାତି ରୋଗୀ ସେବାରେ ନିୟୋଜିତ ନର୍ସମାନଙ୍କର ନିସ୍ଵାର୍ଥପର ଅବଦାନକୁ ସ୍ୱୀକାର କରି ସେମାନଙ୍କୁ ଧନ୍ୟବାଦ ଜଣାଇଥିଲେ। ବି.ବି.ଏମ୍. ସି.ଏଚ୍. ର ଡିନ୍ ଏବଂ ପ୍ରିନ୍ସିପାଲ ଡାଃ ସ୍ୱୟଂପ୍ରଭା ପ୍ରଧାନ ଏହି ଉତ୍ସବରେ ଯୋଗ ଦେଇ

ହସ୍ପିଟାଲରେ ନର୍ସମାନଙ୍କ ଭୂମିକା ବିଷୟରେ ଆଲୋଚନା କରିଥିଲେ। ନର୍ସମାନଙ୍କର ସେବାମୟ ହାତ ରୋଗୀଙ୍କୁ ସାହସ, ସାନ୍ତ୍ୱନା ଓ ଆଶା ପ୍ରଦାନ କରେ ବୋଲି ଡାକ୍ତର ଶ୍ରୀମତୀ ପ୍ରଧାନ କହିଥିଲେ। ବଲାଙ୍ଗୀର ସିଡିଏମ୍ ଏବଂ ପିଏଚ୍ଓ  ଡାଃ ପୁଷ୍ପାଞ୍ଜଳି ମିଶ୍ର ଅତିଥି ଭାବରେ ଯୋଗ ଦେଇ  ଫ୍ଲୋରେନ୍ସ ନାଇଟିଙ୍ଗେଲଙ୍କ ପ୍ରେରଣାଦାୟକ ଜୀବନ ଉପରେ ଆଲୋକପାତ କରିବା ସହ  କିପରି ତାଙ୍କର ସେବା ଭାବନା ସମାଜର ବିଭିନ୍ନ ଶ୍ରେଣୀର ଲୋକଙ୍କୁ ନର୍ସିଙ୍ଗ ପେଶାକୁ ଆସିବା ପାଇଁ ପ୍ରେରିତ କରିଥିଲା ତାହା ବୁଝାଇ ଥିଲେ। ନର୍ସିଙ୍ଗ ଶପଥ କାର୍ଯ୍ୟକ୍ରମକୁ ବାଲାଜୀ କଲେଜ ଅଫ୍ ନର୍ସିଙ୍ଗର ପ୍ରିନ୍ସିପାଲ ଦେବାଶିଷ ପାଣ୍ଡିଆ ପରିଚାଳନା କରିଥିଲେ।