10-May-2026

ଢେଙ୍କାନାଳ: ଏହା ମାନେ ମାଟିର ସୁଗନ୍ଧ, ଆସ୍ଥାର ନାଡ଼ି, ଗର୍ବର ଗାଥା। ଏହା କେବଳ ଓଡ଼ିଶାର ଏକ ଜିଲ୍ଲା ନୁହେଁ, ଏହା ହେଉଛି ଏକ ସଂସ୍କୃତିର ଜୀବନ ମନ୍ତ୍ର, ଯେଉଁଠି ସାହସ, ଦୟା ଓ ମାନବତା ସାଧାରଣ ଜୀବନର ଅଂଶ।

ଢେଙ୍କାନାଳ ର ମାଟି ସାହସ ଓ ତ୍ୟାଗରେ ଭିଜିଛି। 
ଏଠାରେ ଜନ୍ମ ନେଇଥିଲେ ଦେଶଭକ୍ତିର ଅମର ପ୍ରତୀକ ବାଜି ରାଉତ, ଯିଏ ମାତୃଭୂମି ପାଇଁ ନିଜ ଅପରିପକ୍କ ବୟସରେ ମଧ୍ୟ ପ୍ରାଣ ଦେଇ ଦେଶକୁ ଗର୍ବିତ କରିଥିଲେ। ତାଙ୍କ ତ୍ୟାଗ ଆଜି ମଧ୍ୟ ଓଡ଼ିଶାର ପ୍ରତ୍ୟେକ ଶିଶୁ ମନେ ଦେଶପ୍ରେମ ଜାଗରଣ କରେ।

ଏହି ଜିଲ୍ଲାର ମାଟି ଜନ୍ମ ଦେଇଛି ସେହି ମହିଳାକୁ ଯିଏ ଆକାଶ ଛୁଇଁ ଓଡ଼ିଶାକୁ ବିଶ୍ୱମଞ୍ଚରେ ଗର୍ବିତ କରିଥିଲେ- କଳ୍ପନା ଦାଶ। ଜନ୍ମ ୭ ଜୁଲାଇ ୧୯୬୬, ସରିଆପଦା ଗାଁ, ଢେଙ୍କାନାଳ- ଏହି ନାମ ଆଜି ମଧ୍ୟ ଓଡ଼ିଆ ହୃଦୟରେ ପ୍ରେରଣା। ସେ ୨୧ ମଇ ୨୦୦୮ ରେ ଏଭରେଷ୍ଟ ଆରୋହଣ କରିଥିଲେ ଭାରତର ପ୍ରଥମ ବେସାମରିକ ଓ ସବୁଠାରୁ ବୟସ୍କା ମହିଳା ଭାବେ। ତାଙ୍କ ସଫଳତା ଢେଙ୍କାନାଳ ମାଟିର ନାରୀଶକ୍ତି, ସାହସ ଓ ଅଦମ୍ୟ ଇଚ୍ଛାଶକ୍ତିର ପ୍ରତୀକ ହେଲା।
ସାହିତ୍ୟ ଓ ସଂସ୍କୃତିର କ୍ଷେତ୍ରରେ ମଧ୍ୟ ଢେଙ୍କାନାଳ ଗର୍ବ କରେ ଓଡ଼ିଶାର ପ୍ରଥମ ମହିଳା ମୁଖ୍ୟମନ୍ତ୍ରୀ ନନ୍ଦିନୀ ଶତପଥୀ ଭଳି ପ୍ରତିଭାଶାଳୀ ସ୍ୱରୂପ ଉପରେ। ତାଙ୍କ ଲେଖା, ସଂପାଦନା ଓ ସମାଜସେବା ଢେଙ୍କାନାଳ ଓ ଓଡ଼ିଶାର ନାମକୁ ଜାତୀୟ ସ୍ତରରେ ଉତ୍ତୋଳିତ କରିଛି।

ଢେଙ୍କାନାଳ ର ସପ୍ତଶଯ୍ୟା ପର୍ବତ ଓ ତୀର୍ଥକ୍ଷେତ୍ର ଏକ ଆଧ୍ୟାତ୍ମିକ ରତ୍ନ। ପାହାଡ଼ ଓ ଗୁହା ମଧ୍ୟରେ ଲୁଚିଥିବା ଶିବପାର୍ବତୀଙ୍କ ପୌରାଣିକ କାହାଣୀ ଏଠାର ଧାର୍ମିକ ମହିମାକୁ ଅନୁଭବିତ କରେ। ସେଠାର ଶାନ୍ତି ଓ ଭକ୍ତିଭାବ ଢେଙ୍କାନାଳର ଆଧ୍ୟାତ୍ମିକ ସଂସ୍କାରକୁ ପ୍ରତିପାଦନ କରେ।

ଏହି ଜିଲ୍ଲା ହେଉଛି ମହିମା ଧର୍ମ ର ଜନ୍ମଭୂମି, ଯାହା ମନୁଷ୍ୟକୁ ସତ୍ୟ, ଦୟା ଓ ଆତ୍ମସାକ୍ଷାତ୍କାରର ମାର୍ଗ ଦେଖାଇଥିଲା। ଏହି ଧାର୍ମିକ ଆନ୍ଦୋଳନ ଢେଙ୍କାନାଳର ଆଧ୍ୟାତ୍ମିକ ଗରିମାକୁ ଅନୁପମ ଭାବରେ ଉଜାଗର କରିଛି।

ଆଜି ଏହି ମାଟିର ସନ୍ତାନ ଦେଶର ବିଭିନ୍ନ କୋଣରେ IAS, IPS, ଓ ସେନାବାହିନୀରେ ନିରତ ରହି ଜନସେବା କରୁଛନ୍ତି। ସେମାନେ ନିଜ କର୍ମ ଓ ସଂସ୍କାର ଦ୍ୱାରା ଢେଙ୍କାନାଳର ନାମକୁ ଉଜ୍ଜ୍ୱଳ କରୁଛନ୍ତି।

ଏମିତି ଏକ ଗୌରବମୟ ଜିଲ୍ଲା ବିଷୟରେ ଯଦି କେହି ଅସଭ୍ୟ ଲୋକ ଅପମାନକାରୀ ଶବ୍ଦ କହିଛନ୍ତି — ତାହାର ପ୍ରତିଶୋଧ ଆମେ ଗାଳିରେ ନୁହେଁ, ଗର୍ବରେ କରିବା। ଆମେ ଢେଙ୍କାନାଳ ର ମହାନତା, ତାହାର ଇତିହାସ ଓ ମାନବତାର ଆଲୋକକୁ ସମଗ୍ର ଦେଶରେ ଭାସି ଯିବା ପାଇଁ ପ୍ରେରିତ ହେବା। କାରଣ ଢେଙ୍କାନାଳ ହେଉଛି ଆମ ଗର୍ବ, ଆମ ପରିଚୟ, ଆମ ଅସ୍ତିତ୍ୱ। ଆମ ଢେଙ୍କାନାଳ ପାଇଁ ଆମେ ଗର୍ବିତ।

ଅନସାର ଅଲୀ ଖାଁ, ଢେଙ୍କାନାଳ