09-Feb-2026

ନବରଙ୍ଗପୁର :(ପ୍ରିୟଦର୍ଶିନୀ ପାତ୍ର) ଭାରତ ସରକାରଙ୍କ ପିଏମ୍-ଉଷା  (PM-USHA) ଯୋଜନାର ଲିଙ୍ଗ ସମାବେଶ ଓ ସମତା ପଦକ୍ଷେପ (GIEI) ଅଂଶ ଅଧୀନରେ ପ୍ରଯୋଜିତ କନ୍ୟା ଶିଶୁ ଶିକ୍ଷା ଉପରେ ଏକ ଦିନିକିଆ କର୍ମଶାଳା ତଥା ସଚେତନତା କାର୍ଯ୍ୟକ୍ରମ ତା: ୦୯.୦୨.୨୦୨୬ ରିଖ ରେ ସଫଳତାର ସହ ଅନୁଷ୍ଠିତ ହୋଇଯାଇଛି ।  କାର୍ଯ୍ୟକ୍ରମଟିକୁ ନବରଙ୍ଗପୁର ଡିଗ୍ରୀ ମହାବିଦ୍ୟାଳୟର ଅଧ୍ୟକ୍ଷ ଶ୍ରୀ ଡି. ଗୋବିନ୍ଦା ରାଓ ଉଦଘାଟନ କରି, ଶିଶୁ କନ୍ୟା ଶିକ୍ଷାର ଗୁରୁତ୍ୱ ଉପରେ ଆଲୋକପାତ କରି ଝିଅ ଶିଶୁ ଶିକ୍ଷା ସମାଜର ସମତା ଏବଂ ଦେଶର ସର୍ବାଙ୍ଗୀଣ ବିକାଶ ପାଇଁ ଅତ୍ୟନ୍ତ ଆବଶ୍ୟକ ବୋଲି ମତ ପ୍ରକାଶ କରିଥିଲେ। ମୁଖ୍ୟ ଅତିଥି ଭାବେ ଶ୍ରୀମତୀ ମୋନାରମା ମାଝୀ, ସାମାଜିକ କର୍ମୀ, ନବରଙ୍ଗପୁର  ଯୋଗଦେଇ,ଶିଶୁ କନ୍ୟା ଶିକ୍ଷାର ଜାତି ଗଠନ ଓ ସମାଜ ପରିବର୍ତ୍ତନରେ ଭୂମିକା ବିଷୟରେ ବିସ୍ତୃତ ଆଲୋଚନା କରିଥିଲେ ଏବଂ ଛାତ୍ରୀମାନଙ୍କୁ ଉଚ୍ଚ ଶିକ୍ଷା ଅଧ୍ୟୟନ ପାଇଁ ଉତ୍ସାହିତ କରିଥିଲେ।ସମ୍ମାନିତ ସଂସାଧନ ବ୍ୟକ୍ତି ଡଃ ମନୋରଞ୍ଜନ ପ୍ରଧାନ, ସହକାରୀ ପ୍ରାଧ୍ୟାପକ, ଶିକ୍ଷା ବିଭାଗ, ବିକ୍ରମ ଦେବ ବିଶ୍ୱବିଦ୍ୟାଳୟ, ଜୟପୁର, ପ୍ରାଚୀନ ଶିକ୍ଷା ପ୍ରଣାଳୀରୁ ଆରମ୍ଭ କରି ନୂତନ ଶିକ୍ଷା ନୀତି ୨୦୨୦ ପର୍ଯ୍ୟନ୍ତ ଏକ ସଂକ୍ଷିପ୍ତ ବିବରଣୀ ପ୍ରଦାନ କରିଥିଲେ ଏବଂ ଶିଶୁ କନ୍ୟା ଶିକ୍ଷା ପାଇଁ ସରକାର ଆରମ୍ଭ କରିଥିବା ବିଭିନ୍ନ ଯୋଜନା ବିଷୟରେ ଆଲୋକପାତ କରିଥିଲେ।
ଡଃ ସାଗରିକା ମିଶ୍ର, ସହକାରୀ ପ୍ରାଧ୍ୟାପକ, ସମାଜଶାସ୍ତ୍ର ବିଭାଗ, ବିକ୍ରମ ଦେବ ବିଶ୍ୱବିଦ୍ୟାଳୟ, ଗ୍ରାମାଞ୍ଚଳର ଝିଅମାନେ ଉଚ୍ଚ ଶିକ୍ଷା ଅଧ୍ୟୟନ କରିବା ସମୟରେ ସମ୍ମୁଖୀନ ହେଉଥିବା ବିଭିନ୍ନ ସମସ୍ୟା ଓ ବାଧାବିଘ୍ନ ବିଷୟରେ ଗଭୀର ଆଲୋଚନା କରିଥିଲେ ।  ଅନ୍ୟାନ୍ୟ ସଂସାଧନ ବ୍ୟକ୍ତିତ୍ୱ ଡଃ ହରିଶ୍ଚନ୍ଦ୍ର ଶବର, ଶ୍ରୀମତୀ ମାନସୀ ମହାପାତ୍ର ଏବଂ ଛାତ୍ରୀ ପ୍ରତିନିଧି କୁମାରୀ ପ୍ରିୟଙ୍କା ନାୟକ ମଧ୍ୟ ଶିଶୁ କନ୍ୟା ଶିକ୍ଷାର ଗୁରୁତ୍ୱ ଉପରେ ବିସ୍ତୃତ ଆଲୋଚନା କରି ଏହାକୁ ସମୟର ଆବଶ୍ୟକତା ବୋଲି କହିଥିଲେ। ପିଏମ୍-ଉଷା ଯୋଜନାର ଜିଲ୍ଲା ନୋଡାଲ୍ ଅଧିକାରୀ,ଶ୍ରୀମତୀ ସଙ୍ଗୀତା ତ୍ରିପାଠୀ, ପିଏମ୍-ଉଷାର ଲକ୍ଷ୍ୟ ଓ ଉଦ୍ଦେଶ୍ୟ ସହିତ ଶିଶୁ କନ୍ୟା ଶିକ୍ଷାର ଗୁରୁତ୍ୱ ବିଷୟରେ ଆଲୋଚନା କରିଥିଲେ । ଏହି କାର୍ଯ୍ୟକ୍ରମରେ ଭୈରବ ଡିଗ୍ରୀ ମହାବିଦ୍ୟାଳୟ, ଡାବୁଗାଁ, ସରକାରୀ ଡିଗ୍ରୀ ମହାବିଦ୍ୟାଳୟ, କୋସାଗୁମୁଡା, ସରକାରୀ ଡିଗ୍ରୀ ମହାବିଦ୍ୟାଳୟ, ତେନ୍ତୁଳିଖୁଣ୍ଟି, ମୋଡେଲ୍ ଡିଗ୍ରୀ ମହାବିଦ୍ୟାଳୟ, ନବରଙ୍ଗପୁର, ମହିଳା ଡିଗ୍ରୀ ମହାବିଦ୍ୟାଳୟ, ନବରଙ୍ଗପୁର ଏବଂ ନବରଙ୍ଗପୁର ଡିଗ୍ରୀ ମହାବିଦ୍ୟାଳୟର ଛାତ୍ରୀ ଓ କର୍ମଚାରୀମାନେ ଯୋଗଦେଇଥିଲେ।
କାର୍ଯ୍ୟକ୍ରମର ଶେଷରେ ଡଃ ଜାହାଙ୍ଗୀର ମହମ୍ମଦ ଧନ୍ୟବାଦ ଜ୍ଞାପନ କରି କାର୍ଯ୍ୟକ୍ରମର ସମାପ୍ତି ଘୋଷଣା କରିଥିଲେ।