06-Dec-2025

ବଲାଙ୍ଗୀର(ପ୍ରେରଣା ଖବର): ଆଲ୍ ଓଡ଼ିଶା ଆୟୁଷ ଷ୍ଟୁଡେଣ୍ଟସ୍ ଏସୋସିଏସନ୍ ର ଡାକରାରେ ଗତ ୨୪ ତାରିଖରୁ ବଲାଙ୍ଗୀର ଆୟୁର୍ବେଦିକ କଲେଜର ଆୟୁଷ ବିଭାଗର ଛାତ୍ରଛାତ୍ରୀ ମାନେ କଲେଜ ସମ୍ମୁଖରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣାରେ ବସିଛନ୍ତି ।ଏହା ମଧ୍ୟରେ ବଲାଙ୍ଗୀର ଜିଲ୍ଲାର ବିଭିନ୍ନ ସାମାଜିକ ସଂଗଠନ ଏହି ଦାବିକୁ ସମର୍ଥନ ଜଣାଇଛନ୍ତି l ଧାରଣାରତ ଛାତ୍ରଛାତ୍ରୀମାନେ ଗତ ୩ତାରିଖ ଦିନ ପ୍ରଧାନମନ୍ତ୍ରୀଙ୍କ ଉଦ୍ଦ୍ୟେଶରେ ବଲାଙ୍ଗୀର ଜିଲ୍ଲାପାଳଙ୍କୁ ଏକ ଦାବିପତ୍ର ମଧ୍ୟ ପ୍ରଦାନ କରିଛନ୍ତି l ଏହି କ୍ରମରେ ଆଜି ବଲାଙ୍ଗୀର ଅବସରପ୍ରାପ୍ତ ସୈନିକ ସଂଘର ସମ୍ପାଦକ ପ୍ରତାପ ରଥ ଙ୍କ ନେତୃତ୍ଵରେ ଏକ ଟିମ୍ ଧାରଣା ସ୍ଥଳକୁ ଆସି ଆୟୁଷ ଛାତ୍ରଛାତ୍ରୀ ଙ୍କୁ ନିଜର ନୈତିକ ସମର୍ଥନ ଜଣାଇଛନ୍ତି l ଆଗାମୀ ଦିନରେ ଏହି ଛାତ୍ର ଅସନ୍ତୋଷ ଉଗ୍ର ରୂପ ନେବାକୁ ଯାଉଥିବା ବେଳେ କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହେଲେ ସରକାର ହିଁ ଦାୟୀ ରହିବେ ବୋଲି ଷ୍ଟୁଡେଣ୍ଟସ୍ ୟୁନିୟନ ର ସଭାପତି ଓମପ୍ରକାଶ ବେହେରା ଚେତାବନୀ ଦେଇଛନ୍ତି l ରାଜ୍ୟରେ ଥିବା ସମସ୍ତ  ଆୟୁର୍ବେଦିକ କଲେଜର ଆୟୁସ ଛାତ୍ରଛାତ୍ରୀ ମାନେ ନିଜ ନିଜ କଲେଜ ଗେଟ୍ ସମ୍ମୁଖରେ ଅହୋରାତ୍ର ଧାରଣାରେ ବସିଥିବା ବେଳେ ରାଜ୍ୟ ଓ କେନ୍ଦ୍ରରେ କ୍ଷମତାସୀନ ବିଜେପି ସରକାର କିମ୍ବା ସ୍ଥାନୀୟ ନେତୃମଣ୍ଡଳୀ ଛାତ୍ରଛାତ୍ରୀ ମାନଙ୍କ ଦାବିକୁ ଅଣଦେଖା କରିଚାଲିଛନ୍ତି ବୋଲି ଷ୍ଟୁଡେଣ୍ଟସ୍ ୟୁନିୟନ ର ସମ୍ପାଦକ ଅଭିଳାଷ ପଟ୍ଟନାୟକ  ଅଭିଯୋଗ କରିଛନ୍ତି । ସ୍ଥାୟୀ ଆୟୁର୍ବେଦିକ ଡାକ୍ତର ପଦବୀ ସୃଷ୍ଟି, ଆୟୁଷ ଛାତ୍ରଛାତ୍ରୀ ମାନଙ୍କ ଇନଟେନସିଭ୍ କୁ ସଠିକ ସମୟରେ ସାରିବା, ଷ୍ଟାଇଫେଣ୍ଡ ବୃଦ୍ଧି ଏବଂ ରାଜ୍ୟର ସମସ୍ତ ଆୟୁଷ କଲେଜରେ ଏନ୍‌ସିଆଇଏସ୍‌ଏମ(NCISM) ଗାଇଡଲାଇନ୍ କୁ ପାଳନ କରିବା ଆଦି ଦାବି ନେଇ ଛାତ୍ରଛାତ୍ରୀ ମାନେ ଦୀର୍ଘ ୧୩ଦିନ ହେଲା ଧାରଣାରେ ବସିଛନ୍ତି ।  ଆଜିର ଧାରଣାରେ ମିଡିଆ ଆଡଭାଈଜର୍ ଧର୍ମେନ୍ଦ୍ର ଜାଲ, ଛାତ୍ରୀ ତୃପ୍ତିମୟୀ ମହାପାତ୍ର, ପ୍ରିୟଙ୍କା ଶାନ୍ତା ପ୍ରମୂଖ ଉପସ୍ଥିତ ଥିଲେ l