06-Oct-2025

ନୂଆପଡ଼ା (ରାମନାଥ ପଣ୍ଡା)
 ନୂଆପଡ଼ା ଜିଲ୍ଲା ଗସ୍ତରେ ଆସିଥିବା ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଭାରତୀୟ ମଜଦୂର ସଂଘ ନୂଆପଡ଼ା ଜିଲ୍ଲା ତରଫରୁ ଜିଲ୍ଲା ସଭାପତି ପ୍ରଦୀପ କୁମାର ଦଣ୍ଡସେନାଙ୍କ ନେତୃତ୍ୱରେ ଏବଂ ତାଙ୍କ ସମେତ ବି ଏମ ଏସ ର ଏକ ନେତୃମଣ୍ଡଳୀ ପୂର୍ବତନ ସଭାପତି ଶୁକ୍ଳାମ୍ବର ନିଆଲ,ପୂର୍ବତନ ସଭାପତି ସୁକ ଦେବ ସାହୁ,କାର୍ଯ୍ୟକାରୀ ସଭାପତି କୁଞ୍ଜ ବିହାରୀ କଟା,ଉପ ସଭାପତି ବଳଦେବ କେତକି,ଜ୍ଞାନେ ସାହୁ ପ୍ରମୁଖ ପୁଷ୍ପ ମାଲ୍ୟ ସହ ଉପଢ଼ୋକନ ଦେଇ ସ୍ବାଗତ କରିଥିଲେ ଏବଂ ନୂଆପଡ଼ା ଜିଲ୍ଲାରେ ଶିଳ୍ପାନୁଷ୍ଠାନ ସ୍ଥାପନ କରିବାକୁ ଏକ ଲିଖିତ ଦାବି ଜଣାଇଥିଲେ ।ନିବେଦନର ଲେଖାରେ ସ୍ପଷ୍ଟ ଲେଖା ଯାଇଛି କି - ନୂଆପଡ଼ା ଜିଲ୍ଲା ଓଡ଼ିଶା ପ୍ରଦେଶର ଏକ ଅନୁନ୍ନତ ପଛୁଆ ଅଟେ ।ଏହି ଜିଲ୍ଲାରୁ ପ୍ରତିବର୍ଷ ଶ୍ରମିକ ମାନେ ରାଜ୍ୟ ବାହାରକୁ ନିୟମିତ ଭାବରେ ଦାଦନ ଖଟିବା ପାଇଁ ଯିବା ଏକ ସାଧାରଣ ସମସ୍ୟା ହୋଇ ରହି ଆସିଛି ।ଏହି ଜିଲ୍ଲାରେ ଶ୍ରମ ନିୟୋଜନ ଭିତ୍ତିକ କୌଣସି ପ୍ରକାର ଶିଳ୍ପାନୁଷ୍ଠାନ କିମ୍ବା ଅନ୍ୟ କୌଣସି ବିକଳ୍ପ ପ୍ରତିଷ୍ଠାନ ନାହିଁ ଫଳରେ ହଜାର ହଜାର ଶ୍ରମିକ ସୁଦୂର ଆନ୍ଧ୍ର ପ୍ରଦେଶ,ଗୁଜୁରାଟ,ମହାରାଷ୍ଟ୍ର,ତାମିଲନାଡୁ, ଛତିଶଗଡ ସହ ଅନ୍ୟ ରାଜ୍ୟକୁ ଦାଦନ ଖଟିବାକୁ ଯାଇ ଶାରୀରିକ, ମାନସିକ ଓ ଆର୍ଥିକ ଶୋଷଣର ଶିକାର ହୋଇ ଜୀବନ ହରାଉଥିବା ଦୃଷ୍ଟାନ୍ତମାନ ରହିଛି ।ଏହି ଜିଲ୍ଲାରେ ଉଭୟ ଖଣିଜ ଓ କୃଷି ଭିତ୍ତିକ ଶିଳ୍ପ ସ୍ଥାପନର ପର୍ଯ୍ୟାପ୍ତ ସୁଯୋଗ ଥିବା ସତ୍ତ୍ବେ  ମଧ୍ୟ କୌଣସି ପ୍ରକାର  ସରକାରୀ ଉଦ୍ୟମ କରାଯାଇ ନାହିଁ ।ବିପୁଳ ପରିମାଣରେ ଚୂନ ପଥର,ଗ୍ରାଫାଇଟ ଓ ଗ୍ରାନାଇଟ ଆମ ଜିଲ୍ଲାରୁ ଅନ୍ୟତ୍ର ସ୍ଥାନାନ୍ତର ହୋଇ ପ୍ରକ୍ରିୟାକରଣ ହେଉଅଛି ।ଠିକ୍ ସେହି ଭଳି ନୂଆପଡ଼ା ଜିଲ୍ଲାରେ କୃଷି ଶିଳ୍ପର ବିକାଶ ପାଇଁ ମଧ୍ୟ କଞ୍ଚାମାଲର ଅଭାବ ନାହିଁ  ।ଦାଦନ ସମସ୍ୟାର ସ୍ଥାୟୀ ସମାଧାନ ନିମନ୍ତେ ନୂଆପଡ଼ା ଜିଲ୍ଲାର ବିଭିନ୍ନ ସ୍ଥାନରେ ଶିଳ୍ପାନୁଷ୍ଠାନ ଗୁଡ଼ିକ ସ୍ଥାପନ ପାଇଁ ଭାରତୀୟ ମଜଦୂର ସଂଘ ମୁଖ୍ୟ ମନ୍ତ୍ରୀ ଙ୍କୁ ନିବେଦନ କରିଛନ୍ତି ।ପୁଣି ଏହି ନେତୃବର୍ଗ ମାନନୀୟା କଳାହାଣ୍ଡି ସାଂସଦ ମାଳବିକା ଦେବୀ,ରାଜ୍ୟ ସଭା ସାଂସଦ ସୁଜିତ କୁମାର,ପୂର୍ବତନ ସାଂସଦ ବସନ୍ତ କୁମାର ପଣ୍ଡାଙ୍କ ସହିତ ମଧ୍ୟ ଉପରୋକ୍ତ ବିଷୟରେ ପୁଙ୍ଖାନୁପୁଙ୍ଖ ଆଲୋଚନା କରିଛନ୍ତି ଓ ଆଗାମୀ ୧୦ ତାରିଖ ଦିନ ପୁନର୍ବାର ଆଲୋଚନା କରି ଏହାର ସ୍ଥାୟୀ ସମାଧାନ କରିବାକୁ ସାଂସଦମାନେ ପ୍ରତିଶ୍ରୁତି ଦେଇଛନ୍ତି ।