11-Sep-2025

ବଲାଙ୍ଗିର(ପ୍ରେରଣା ଖବର): ସ୍ଥାନୀୟ ସରକାରୀ ମହାବିଦ୍ୟାଳୟ ବଲାଙ୍ଗିରରେ ଜିଲ୍ଲା ମାନସିକ ସ୍ଵାସ୍ଥ୍ୟ କାର୍ଯ୍ୟକ୍ରମ ବିଭାଗ ଏବଂ ନିଶା ନିବାରଣ କେନ୍ଦ୍ର ବଲାଙ୍ଗିରର ମିଳିତ ପ୍ରୟାସରେ ଆତ୍ମହତ୍ୟା ନିବାରଣ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମକୁ କଲେଜର ଅଧ୍ୟକ୍ଷ ଡକ୍ଟର କୌତୁକ ପନ୍ଦର ଉଦଘାଟନ କରି  ଏହାର ଅଭିଲକ୍ଷ୍ୟ ସଂପର୍କରେ ଅବଗତ କରେଇବା ସହିତ  ଧୈର୍ଯ୍ୟ, ସଚେତନତା ଏବଂ ମାନସିକ ସ୍ଵାସ୍ଥ୍ୟ ଚିକିତ୍ସା ଦ୍ବାରା ଆତ୍ମହତ୍ୟା ରୋକାଯାଇପାରିବ ବୋଲି ମତ ପ୍ରକାଶ କରିଥିଲେ । ଚିକିତ୍ସା ମନୋବିଜ୍ଞାନୀ ସୁଶ୍ରୀ ଶ୍ରାବଣୀ କାଲସାଏ

ଏବଂ ପ୍ରିୟା ପ୍ରତୀକ୍ଷା ଧରୁଆ ଯୋଗଦେଇ ଆତ୍ମହତ୍ୟାର କାରଣ, ନିବାରଣ ଏବଂ ଉପଚାର ସଂପର୍କରେ ଗଭୀର ଆଲୋଚନା କରିବା ସହିତ ସଚେତନତାମୂଳକ ପ୍ରାମାଣିକ ଚଳଚ୍ଚିତ୍ର ଦେଖାଇଥିଲେ। ଡକ୍ଟର ଶ୍ରୀକାନ୍ତ କୁମାର ବାରିକ କାର୍ଯ୍ୟକ୍ରମକୁ ସୁଚାରୁରୂପେ ସଂଚାଳନ କରିଥିଲେ। ମହାବିଦ୍ୟାଳୟର ଜାତୀୟ ସେବା ଯୋଜନାର କାର୍ଯ୍ୟକାରୀ ଅଧିକାରୀ ଡକ୍ଟର ରମଣୀ ନାଏକ, ସାମାଜିକ କର୍ମୀ ମଳୟ

କୁମାର ନାଗ, ଶିବ କର୍ମୀ, ସବ୍ୟସାଚୀ ସିଂ ପ୍ରମୁଖ ଉପସ୍ଥିତ ରହି ମାନସିକ ଅବସାଦ ଏବଂ ତାର ପ୍ରତିକାର ସଂପର୍କରେ ବିଶ୍ଳେଷଣ କରିଥିଲେ। ଅଧ୍ୟାପିକା ସ୍ବୟଂପ୍ରଭା ମହାପାତ୍ର ଏବଂ ମୋନାଲିସା କୁମ୍ଭାରଙ୍କ ମିଳିତ ରଚନା ଓ ନିର୍ଦ୍ଦେଶନାରେ ମହାବିଦ୍ୟାଳୟର ଛାତ୍ରଛାତ୍ରୀଙ୍କ ଦ୍ବାରା ଅଭିନିତ ହୋଇଥିଲା ଆତ୍ମହତ୍ୟା ନିବାରଣମୂଳକ ନାଟକ 'ଆଶା' । ପରିଶେଷରେ ଅଧ୍ୟାପକ ହୃଷୀକେଶ ଦାସ ଆନୁଷ୍ଠାନିକ ଭାବେ ଧନ୍ୟବାଦ ଅର୍ପଣ କରିଥିଲେ। ଏଥିରେ ମହାବିଦ୍ୟାଳୟର ସମସ୍ତ ଅଧ୍ୟାପକ ଅଧ୍ୟାପିକା ଏବଂ ଛାତ୍ରଛାତ୍ରୀ ଉପସ୍ଥିତ ଥିଲେ।