08-Jul-2025

ଡୁଙ୍ଗୁରିପାଲି (ଅରବିନ୍ଦ ମିଶ୍ରଙ୍କ ରିପୋର୍ଟ): ସୋନପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ଅଞ୍ଚଳର ଲୋକେ ବିଭିନ୍ନ କାର୍ଯ୍ୟାଳୟ ଉପରେ ଅନ୍ୟ ବ୍ଲକ ତଥା ଅନ୍ୟାନ୍ୟ ଅଞ୍ଚଳ ଉପରେ ନିର୍ଭର କରୁଛନ୍ତି। ବ୍ଲକ ସଦର ମହକୁମାରୁ ଲୋକେ ରାମପୁର ତହସିଲ, ବିଏସ୍ଏନ୍ଏକ ସେବା ପାଇଁ ହୋଲସିଂହା ନହେଲେ ବଲାଙ୍ଗୀର, ଶବ ବ୍ୟବଚ୍ଛେଦ ଓ ବିଦ୍ୟୁତ ବିଭାଗ କାମ ପାଇଁ ବିନିକା ଅଫିସ ଉପରେ ଲୋକେ ନିର୍ଭର କରନ୍ତି।  ଏଥିପାଇଁ ଲୋକଙ୍କୁ ଛୋଟ କାମ ଟିଏ ପାଇଁ ଅଯଥାରେ ହଇରାଣ ହେବାକୁ ପଡୁଛି l ସୋନପୁର ଜିଲ୍ଲା ଓ ଚୁଙ୍ଗୁରିପାଲି ବ୍ଲକ ମାନ୍ୟତା ପାଇବା ପରେ ଏଠାକାର ଲୋକେ ଅନ୍ୟ ଆଞ୍ଚଳ ଓ ଜିଲା ଉପରେ ନିର୍ଭର କରିବା କେତେଦୂର ଯୁକ୍ତିଯୁକ୍ତ ବୋଲି ପ୍ରଶ୍ନ ହେଉଛି। ସୂଚନା ଅନୁସାରେ, ଅବିଭକ୍ତ ବଲାଙ୍ଗୀର ଜିଲ୍ଲା ଥିବା ବେଳେ ଲୋକେ ଜିଲ୍ଲାପାଳ ଓ ଉପଜିଲାପାଳ କାର୍ଯ୍ୟାଳୟରେ କମ ପାଇଁ ୪୦ କିମି ଯାଇ କାମ କରି ଫେରି ଆସୁଥିଲେ । ସୁବର୍ଣ୍ଣପୁର ଜିଲ୍ଲା ମାନ୍ୟତା ପାଇବା  ପରେ ଲୋକେ ୨୦/୮୦ କିମି ଯାଇ ନିଜର କାମ କରୁଛନ୍ତି । ନୂତନ ଜିଲା ମାନ୍ୟତାକୁ ୩୦ ବର୍ଷ ପୂରିଲାଣି । ଡୁଙ୍ଗୁରିପାଲି ବ୍ଲକ ହେବା ପରେ ଅନ୍ୟ କାର୍ଯ୍ୟଳୟ ମଧ୍ୟ ଏହି ଅଞ୍ଚଳରେ ହେବ ବୋଲି ଲୋକେ ଆଶା ରଖୁଥ‌ିଲେ । ଚୁଙ୍ଗୁରିପାଲିରେ ଏକ ପୂର୍ଣାଙ୍ଗ ତହସିଲ ପାଇଁ ଅଞ୍ଚଳବାସୀ ଦାବି କରି ଆସୁଥିବା ବେଳେ ଦାବି ପ୍ରଶମିତ କରିବାପାଇଁ ଏଠାରେ ଏକ ଅତିରିକ୍ତ ତହସିଲ କାର୍ଯ୍ୟାଳୟ ଡାକବଙ୍ଗଳା ୨୦୦୪ ଏପ୍ରିଲ ୨୧ରେ ଖୋଲା ଯାଇଥିଲା । ପ୍ରଥମ ଅତିରିକ୍ତ ତହସିଲଦାର ଭାବେ ରମେଶ ଚନ୍ଦ୍ର ଚାଇଁ ଯୋଗ ଦେଇଥିବା ବେଳେ ପରବର୍ତ୍ତୀ ସମୟରେ କନକଚମ୍ଫା ମେହେର, ସମାସ ବିଲୁଙ୍ଗ, ପଦ୍ମନାର ପୁରୋହିତ କାଯ୍ୟ କରିଥିଲେ।  ୨୦୧୫ରେ ଏଠାରେ ବନୋଦ ବିହାରା ଦାନୀ ଯୋଗଦେବା ପରେ ଉକ୍ତ  କାର୍ଯ୍ୟାଳୟ ସମ୍ପୂର୍ଣ ବନ୍ଦ ରହିଛି । ପୁଣି ଏହି ଅଞ୍ଚଳବାସୀ ଛୋଟମୋଟ କାମରେ ରାମପୁରକୁ ଧାଉଁଛନ୍ତି । ଡୁଙ୍ଗୁରିପାଲି ସହର ୨୬ ନମ୍ବର ଜାତୀୟ ରାଜପଥ ଉପରେ ରହିଛି । ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ମଧ୍ୟ ଅଛି । ବିଭିନ୍ନ ସମୟରେ ଦୁର୍ଘଟଣା, ଅଘଟଣ ଯୋଗୁଁ ଲୋକଙ୍କ ମୃତ୍ୟୁ ହେଲେ ପୁଲିସ ଶବ ବ୍ୟବଚ୍ଛେଦ ପାଇଁ ବିନିକା ପଠା ଯାଉଛି । ଏଠାରେ ବ୍ୟବଚ୍ଛେଦ କେନ୍ଦ୍ର ନଥିବରୁ ଲୋକେ ବନ୍ଧା ହୋଇ ବିନିକା ଯାଆନ୍ତି । ତେବେ ଛୋଟ ଛୋଟ କାମ ପାଇଁ କେତେ ଦିନ ଧରି ଡୁଙ୍ଗୁରିପାଲି ଅଞ୍ଚଳର ଲୋକ ମାନେ ଅନ୍ୟ ଜାଗା ଉପରେ ନିର୍ଭରଶୀଳ ରହୁଥିବେ; ତାହା ଏକ ବଡ ପ୍ରଶ୍ନ l