22-Jun-2025

ବରପାଲି (ସୁଦାମ ଦୀପ) 
ବରପାଲି ଅଞ୍ଚଳର ବିଭିନ୍ନ ଶିକ୍ଷାନୁଷ୍ଠାନ ଦ୍ବାରା ଆନ୍ତର୍ଜାତୀୟ ଯୋଗ ଦିବସ ପାଳିତ ହୋଇଯାଇଛି। ସ୍ଥାନୀୟ ଲିଟିଲ ଏଞ୍ଜେଲସ ପବ୍ଲିକ ସ୍କୁଲ ପରିସରରେ ସ୍ଥିତ ଏଞ୍ଜେଲସ ହଲ , ଏଞ୍ଜେଲସ ଗାର୍ଡନ ଓ ଶିରିଡିସାଇ ମନ୍ଦିର ହଲ ପ୍ରାଙ୍ଗଣରେ ଆନ୍ତର୍ଜାତୀୟ ଯୋଗ ଦିବସ ପାଳିତ ହୋଇଥିଲା । ଏହି ଅବସରରେ ଭାରତ ସରକାରଙ୍କ ଆୟୁଷ ମନ୍ତ୍ରାଳୟ ପକ୍ଷରୁ ଆୟୋଜିତ ଯୋଗ ସଙ୍ଗମ ଅନଲାଇନ କାର୍ଯ୍ୟକ୍ରମରେ ବିଦ୍ୟାଳୟର ପରିଚାଳନା ସମିତି, କାର୍ଯ୍ୟକର୍ତ୍ତା,, ଶିକ୍ଷକ ଶିକ୍ଷୟିତ୍ରୀ , ଅଭିଭାବକ ଅଭିଭାବିକା ଓ ଛାତ୍ରଛାତ୍ରୀ ମାନେ ମିଳିତ ଭାବେ ପ୍ରାୟ ୫୧୯ଜଣ ଯୋଗ ଦାନ କରିଥିଲେ। ଆନ୍ଧ୍ରପ୍ରଦେଶର ବିଶାଖା ପଟ୍ଟନମଠାରେ ମାନ୍ୟବର ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଆୟୋଜିତ  କାର୍ଯ୍ୟକ୍ରମଟି ଏକକାଳୀନ ଭାବେ ଅନୁଷ୍ଠିତ ହୋଇଥିଲା । ସେହିପରି ମହାରାଷ୍ଟ୍ର ହାବୁଲଡଙ୍କ ଆୟୋଜିତ ଅନଲାଇନ ଯୋଗାଭ୍ୟାସର ଅନଲାଇନ ପ୍ରଶିକ୍ଷଣ ପ୍ରଦାନ କରାଯାଇଥିଲା । ବିଦ୍ୟାଳୟ ୨୫ବର୍ଷ ପୂର୍ତ୍ତି ଅବସରରେ  ସ୍ୱତନ୍ତ୍ର କାର୍ଯ୍ୟକ୍ରମ ପ୍ରସ୍ତୁତି ନିମନ୍ତେ କାର୍ଯ୍ୟକର୍ତ୍ତାଙ୍କ ମଧ୍ଯରେ ଉତ୍ସାହ ପରିଲକ୍ଷିତ ହୋଇଥିଲା। ବିଦ୍ୟାଳୟର ଏହି ବିଶେଷ କାର୍ଯ୍ୟକ୍ରମଟି ଅଭିଭାବକ ଅଭିଭାବିକା ଓ ଶୁଭେଚ୍ଛୁଙ୍କ ଯୋଗଦାନରେ ସଫଳତା ଲାଭ କରିଥିଲା । ସେହିପରି ବରପାଲି ମହାବିଦ୍ୟାଳୟ ପରିସରରେ ସକାଳ ସମୟରେ ଆନ୍ତର୍ଜାତୀୟ ଯୋଗଦିବସ ପାଳିତ ହୋଇଥିଲା। ଛାତ୍ରଛାତ୍ରୀ ,ଅଧ୍ୟାପକ, ଅଧ୍ୟାପିକା ତଥା କର୍ମଚାରୀ ବୃନ୍ଦଙ୍କ ଗହଣରେ ଏହା ପାଳିତ ହୋଇଥିଲା। ଅଧ୍ୟକ୍ଷା ସୁଶ୍ରୀ ଜୟନ୍ତୀ ଦାଶଙ୍କ ଅଧ୍ୟକ୍ଷତାରେ କାର୍ଯ୍ଯକ୍ରମ ପରିଚାଳିତ ହୋଇଥିଲା। ସରସ୍ଵତୀ ଶିଶୁମନ୍ଦିର ଯୋଗଗୁରୁ ଗୋବିନ୍ଦ ଚନ୍ଦ୍ର ବାରିକଙ୍କ ନିର୍ଦ୍ଦେଶନାରେ ଆୟୋଜିତ ଏହି କାର୍ଯ୍ୟକ୍ରମରେ ଯୋଗଗୁରୁ ପ୍ରଥମେ ଯୋଗର ଉପଯୋଗୀତା ସମ୍ପର୍କରେ ବକ୍ତବ୍ୟ ରଖି ପରେ ବଜ୍ରାସନ, ମଣ୍ଡୁକାସନ, ବ୍ୟାଘ୍ରାସନ, ଅନୁଲୋମ ବିଲୋମ, ଭ୍ରାମରି ପ୍ରାଣାୟାମ ଆଦି ଯୋଗାଭ୍ୟାସ କରାଇଥିଲେ । ଏଥିରେ ସହଯୋଗ କରିଥିଲେ  ଏନ୍‌ଏସ୍‌ଏସ୍ ପ୍ରୋଗ୍ରାମ ଅଫିସର ଅଧ୍ୟାପକ ଶ୍ରୀଯୁକ୍ତ ଭକ୍ତବନ୍ଧୁ ପ୍ରଧାନ, ଅଧ୍ୟାପିକା ଶ୍ରୀମତୀ ସୀମାଞ୍ଜଳି ଦାସ ଏବଂ ରେଡକ୍ରସ କାଉନସିଲର ଅଧ୍ୟାପକ ଅଲେଖ କୁମାର ମହାନନ୍ଦ ଓ ଅଧ୍ୟାପିକା ନତାଶା ସିକନ୍ଦର ପ୍ରମୁଖ । ଏହି କାର୍ଯ୍ୟକ୍ରମରେ ମହାବିଦ୍ୟାଳୟର ଶତାଧିକ ଛାତ୍ରଛାତ୍ରୀ, ସମସ୍ତ ଅଧ୍ୟାପକ ଅଧ୍ୟାପିକା, ଅଣଶିକ୍ଷକ କର୍ମଚାରୀବୃନ୍ଦ ଯୋଗଦେଇ କାର୍ଯ୍ୟକ୍ରମକୁ ସାଫଲ୍ୟମଣ୍ଡିତ କରିଥିଲେ । ଶେଷରେ ଅଧ୍ୟାପକ ଅଲେଖ କୁମାର ମହାନନ୍ଦ ଧନ୍ୟବାଦ ଅର୍ପଣ କରିଥିଲେ । ଜଗବନ୍ଧୁ ଦାଶ ସ୍ନାତକ ମହିଳା ମହାବିଦ୍ୟାଳୟ ପରିସରରେ ମଧ୍ଯ ଆନ୍ତର୍ଜାତୀୟ ଯୋଗ ଶିବିର କାର୍ଯ୍ୟକ୍ରମ ପରିଚାଳିତ ହୋଇଥିଲା। ଅଧ୍ୟକ୍ଷା ପଦ୍ମିନୀ ଦାଶଙ୍କ ଅଧ୍ୟକ୍ଷତାରେ ଆୟୋଜିତ ଶିବିରରେ ରେଡ଼କ୍ରସ ଓ ଏନଏସଏସ  ମିଳିତ ଆନୁକୁଲ୍ୟରେ ଆୟୋଜିତ ହୋଇଥିଲା।  କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ମହାବିଦ୍ୟାଳୟ ପ୍ରତିଷ୍ଠାତା ଅନ୍ତର୍ଯ୍ୟାମୀ ପଣ୍ଡା ଯୋଗଦେଇ ଛାତ୍ରୀମାନଙ୍କୁ ସୁସ୍ଥ ଜୀବନ ଓ ଯୋଗର ଉପାଦେୟତା ଉପରେ ଆଲୋକପାତ କରିଥିଲେ। ଯୋଗ ଶିକ୍ଷକ ଭାବେ ଯୋଗ ଗୁରୁ ଜଗବନ୍ଧୁ ଦାଶ ଉଚ୍ଚ ମାଧ୍ୟମିକ ବିଦ୍ୟାଳୟ ଇଂରାଜୀ ଅଧ୍ୟାପକ ସୁଧାଂଶୁ କୁମାର ଦାଶ ଯୋଗଦେଇ  ସ୍ବେଚ୍ଛାସେବୀମାନଙ୍କୁ ସୁସ୍ଥ ଜୀବନ ସମ୍ପର୍କିତ ଭିନ୍ନ ଭିନ୍ନ ଯୋଗ ପ୍ରଣାଳୀ ଉପରେ ବ୍ୟବହାରିକ ଶିକ୍ଷା ପ୍ରଦାନ କରିଥିଲେ। ଉଭୟ ରେଡକ୍ରସ ଓ ଏନଏସଏସ ସ୍ବେଚ୍ଛାସେବୀ ମାନଙ୍କ ସମେତ ମହାବିଦ୍ୟାଳୟ ସମସ୍ତ ଛାତ୍ରୀ, ଅଧ୍ୟାପକ, ଅଧ୍ୟାପିକା ଏବଂ ସହକର୍ମୀ ବୃନ୍ଦ ସାମିଲ ହୋଇଥିଲେ