16-Jun-2025

ବିନିକା(ହିମାଂଶୁ ଶେଖର ପୁଟେଲ)ଦେଖୁ ଦେଖୁ ରାଜ୍ୟରେ ନୂଆଁ ସରକାରର କାର୍ଯ୍ୟକାଳ ଏକ ବର୍ଷ ପୂରି ଯାଇଛି ।ହେଲେ ଏହି ଏକ ବର୍ଷ ମଧ୍ୟରେ ସୁବର୍ଣ୍ଣପୁର ଜିଲ୍ଲା ବିନିକା ବିଜ୍ଞାପିତ ଅଞ୍ଚଳ ପରିଷଦରେ କନିଷ୍ଠ ଯନ୍ତ୍ରୀ ନଥିବାରୁ  ବିଭିନ୍ନ ଉନ୍ନୟନ ମୂଳକ କାର୍ଯ୍ୟ ଠପ ହୋଇ ପଡ଼ିଛି। ୧୨ଗୋଟି ୱାର୍ଡକୁ ନେଇ ଗଠିତ ବିନିକା ଏନଏଏସିର ଗୋଟିଏ ୱାର୍ଡ କେବଳ ବିଜେପି ହାତରେ ଥିବା ବେଳେ ବାକି ୧୧ଟିରେ ବିଜେଡି କାଉସିଲର ଓ ଅଧ୍ୟକ୍ଷ ବିଜେଡିର ରହିଛନ୍ତି ।ସମ୍ପୂର୍ଣ୍ଣ ବିଜେଡି ଦବଦବାରେ ରହିଛି ଏହି ବିଜ୍ଞାପିତ ପରିଷଦ।ହେଲେ ସାମାନ୍ୟ କନିଷ୍ଠ ଯନ୍ତ୍ରୀ ଟିଏ ଏଠାରେ ଅଦ୍ୟାବଧି ନିଯୁକ୍ତି ନହେବା ଏବଂ ଉନ୍ନୟନ ମୂଳକ କାର୍ଯ୍ୟର ଅଗ୍ରଗତି ହୋଇ ନପାରିବା ପରିଷଦ କାଉନସିଲରଙ୍କ ପାରିବା ପଣିଆ ଉପରେ ସାଧାରଣରେ ଚର୍ଚା ଜୋର ଧରିଛି।କାମ ହେଉ ନଥିବାରୁ ପରିଷଦ ଅଧିନସ୍ତ ୱାର୍ଡ ବାସୀ ନିଜ ନିଜ ନିର୍ବାଚିତ ପ୍ରତିନିଧିଙ୍କୁ ବିଭିନ୍ନ ପ୍ରକାରର କଟୁ କଥା କହିବା ଫଳରେ ଏହାକୁ ସହ୍ୟ କରି ନପାରି ଆଜି ଏନଏସି ଉପାଧ୍ୟକ୍ଷା ତପସ୍ଵିନୀ ମେହେରଙ୍କ ନେତୃତ୍ବରେ ବୈରାଗୀ ପ୍ରଧାନ,ଜିତେନ୍ଦ୍ର ମଲ୍ଲିକ,ଗୋପାଳ କୃଷ୍ଣ ମହାଲିଂ,ଆଶାରାଣୀ ପଣ୍ଡା, ବୈଜନ୍ତୀ କଟୁଆଲ,ରେଣୁକା ବରାଇ,କଳ୍ପନା ଦୀପ,କୁନି ଚିର୍ଗୁନ ପ୍ରମୁଖ କାଉନସିଲର ବିନିକା ଏନଏଏସିକୁ ଆସି କାର୍ଯ୍ୟନିର୍ବାହୀ ଅଧିକାରୀ ମାନସ ରଞ୍ଜନ ଭୋଇଙ୍କ ଜରିଆରେ ସୁବର୍ଣ୍ଣପୁର ଜିଲ୍ଲାପାଳଙ୍କ ନିକଟକୁ ଏକ ଦାବିପତ୍ର ପ୍ରଦାନ କରିଛନ୍ତି।ସେମାନେ ଦାବିପତ୍ରରେ ଉଲ୍ଲେଖ କରିଛନ୍ତି ଯେ ଏନଏଏସିର ବିଭିନ୍ନ ଉନ୍ନୟନ ମୂଳକ କାର୍ଯ୍ୟ ପାଇଁ ଟେଣ୍ଡର ଓପନ ହୋଇଥିଲେ ମଧ୍ୟ କାର୍ଯ୍ୟ ପୁରାପୁରି ଠପ ହୋଇ ପଡ଼ିଛି ।କାରଣ ଦୀର୍ଘ ମାସ ହେଲା କାର୍ଯ୍ୟ ତଦାରକ ପାଇଁ  ଏଠାରେ କନିଷ୍ଠ ଯନ୍ତ୍ରୀ ନାହାନ୍ତି । ଅଞ୍ଚଳର ସେବା ପାଇଁ ସଂକଳ୍ପବଦ୍ଧ ଜନ ପ୍ରତିନିଧି ବିକାଶ କାର୍ଯ୍ୟକୁ ନେଇ ଜନସାଧାରଣଙ୍କ ଠାରୁ ଲୋକହସା ହେବା ପୂର୍ବରୁ ତୁରନ୍ତ ଖାଲିଥିବା କନିଷ୍ଠ ଯନ୍ତ୍ରୀ ପଦବୀ ପୂରଣ ସହିତ ବିକାଶ କାର୍ଯ୍ୟର ଅଗ୍ରଗତି ଦିଗରେ ପଦକ୍ଷେପ ନେବାକୁ ସେମାନେ ଦାବୀ କରିଛନ୍ତି।ପୁନଶ୍ଚ ସାତ ଦିନ ମଧ୍ୟରେ ଯଦି ସମସ୍ୟା ସମାଧାନ କରା ନ ଯାଏ ତେବେ ଏନଏଏସିର ମୁଖ୍ୟ ଫାଟକରେ ତାଲା ପକାଇ ଅନିର୍ଦିଷ୍ଟ କାଳ ପର୍ଯ୍ୟନ୍ତ ଧାରଣା ଦେବେ ବୋଲି କାଉନସିଲର ବୃନ୍ଦ ଧମକ ଦେଇଛନ୍ତି ।