22-May-2025

କଣ୍ଟାମାଳ: କଣ୍ଟାମାଳ ପୋଲିସ ମାରଡୋଲ ଗ୍ରାମର ୩ ନିରୀହ ବ୍ୟକ୍ତିଙ୍କ ନାମରେ ମିଥ୍ୟା ଗଞ୍ଜେଇ ମାମଲା ଦେଇଥିବା ଅଭିଯୋଗ କରି ବୌଦ୍ଧ ଏସପିଙ୍କ ଦ୍ୱାରସ୍ଥ ହୋଇଛନ୍ତି ପରିବାର ଓ ଗ୍ରାମବାସୀ l ଅଭିଯୋଗ  ଅନୁଯାୟୀ ଗତ ମେ ୨୦ ତାରିଖ ରାତି ୮ ଘଣ୍ଟା ସମୟରେ ଲମ୍ବସରୀ ଗ୍ରାମ ଠାରେ ଏକ ଗଞ୍ଜେଇ ଭର୍ତ୍ତି ପିକପ ଗାଡିକୁ ଗୃହରକ୍ଷୀ ପ୍ରଶାନ୍ତ କ୍ଷେତି କିଛି ଗ୍ରାମବାସୀଙ୍କ ଉପସ୍ଥିତିରେ ଅଟକାଇ ଥିଲେ l ଗାଡି ଛାଡ଼ି ଡ୍ରାଇଭର ଫେରାର ମାରିଥିଲା l ଖବର ପାଇ କଣ୍ଟାମାଳ ଥାନା ପୋଲିସ୍ ପହଞ୍ଚି ଗଞ୍ଜେଇ ସହ ଗାଡିକୁ ଥାନାକୁ ନେଇଥିଲା l ଆଜି ଉକ୍ତ ଗାଡି ସହ ୬କ୍ବିଣ୍ଟାଲ୍ ଗଞ୍ଜେଇ ଡୋଲାବାଲି ଗ୍ରାମ ଛକରୁ ଜବତ ହୋଇଥିବା ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଛି l ସେହିପରି ମାରଡୋଲ ଗ୍ରାମବାସୀ ଜନୈକ ଓକିଲଙ୍କ ଠାରୁ ଜାଣିବାକୁ ପାଇଲେ ଯେ ଉକ୍ତ ମାମଲାରେ ସମ୍ପୃକ୍ତ ନଥିବା ତାଙ୍କ ଗ୍ରାମର ରାଜୀବ ଦେହୁରୀ, ହୃଷିକେଶ ସାହୁ ଓ ଅଶୋକ ଦେହୁରୀଙ୍କ ନାମରେ ଗଞ୍ଜେଇ ଚାଲାଣ ମାମଲା ରୁଜୁ କରିଛି | ଫଳରେ ଆଜି ଗ୍ରାମବାସୀ ଓ ୩ ଜଣଙ୍କ ପରିବାର ବୌଦ୍ଧ ଆସି ଏସପିଙ୍କ ନିକଟରେ ଅଭିଯୋଗ କରିଛନ୍ତି | ସମ୍ପୃକ୍ତ ନଥିବା ନିରୀହ ବ୍ୟକ୍ତିଙ୍କ ନାମରେ କଣ୍ଟାମାଳ ପୋଲିସ ଦେଇଥିବା ମାମଲାରୁ ନାମ  କାଟିବାକୁ ପାଇଁ ନିର୍ଦ୍ଦେଶ ଦେବାକୁ  ଅନୁରୋଧ  କରିଛନ୍ତି l