31-Oct-2024

କେସିଙ୍ଗା(ମଳୟ ମିଶ୍ରଙ୍କ ରିପୋର୍ଟ) ଆଗାମୀ କାଲି ନଭେମ୍ବର ୧  ତାରିଖରେ କଳାହାଣ୍ଡି ଜିଲ୍ଲାର କେସିଙ୍ଗା ବ୍ଲକରେ ଏବର ପଞ୍ଚାୟତ ସମିତି ଅଧ୍ୟକ୍ଷଙ୍କ ବିରୋଧରେ ଅନାସ୍ଥା ପ୍ରସ୍ତାବର ଭୋଟ୍ ଗ୍ରହଣର ଦିନ। ଏଥିପାଇଁ ଅଧ୍ୟକ୍ଷ ଚନ୍ଦନ କୁମାର ସେନାପତି ଓ ଉପାଧ୍ୟକ୍ଷା ରାଜଲକ୍ଷ୍ମୀ ପଟ୍ଟନାୟକଙ୍କ ସ୍ବାମୀ ସମିତି ସଭ୍ୟ ମନୋଜ ପଟ୍ଟନାୟକଙ୍କ ଗୋଷ୍ଠୀ ମଧ୍ୟରେ ପ୍ରତିଦ୍ୱନ୍ଦିତା ହେଉଛି। ଉଭୟ ଗୋଷ୍ଠୀ ରାଜଧାନୀ ଭୁବନେଶ୍ଵରରେ ଡେରା ପକାଇଥିବା ଜଣାପଡିଛି। ବିଶ୍ବସ୍ତ ସୂତ୍ରରୁ ପ୍ରକାଶ ଯେ, ମୋଟ ୫୫ଟି ଭୋଟ ମଧ୍ୟରୁ ବିଜେଡି ସମର୍ଥିତ ମନୋଜଙ୍କ ହାତରେ ଏବେ ୩୪ ଜଣ ସଭ୍ୟ/ସଭ୍ୟା ରହୁଛନ୍ତି ଓ ତାଙ୍କୁ ଜିତିବା ପାଇଁ ଆଉ ୩ ଜଣଙ୍କର ଦରକାର ଅଛି। ଯଦି କଳାହାଣ୍ଡି ବିଜେପି ସାଂସଦ ରାଣୀ ମାଳବିକା ଦେଓ ତାଙ୍କ ପାଇଁ ଆସି ଭୋଟ୍ ଦିଅନ୍ତି, ତା'ହେଲେ ତାଙ୍କ ବିରୋଧରେ ଆଗତ ଏହି ଅନାସ୍ଥା ପ୍ରସ୍ତାବରେ ବିଜେପି ସମର୍ଥିତ ଅଧ୍ୟକ୍ଷ ଥିବା ଚନ୍ଦନ ସେନାପତି କଟିଯିବେ ଓ ଦେଓଗାଁ ସମିତିସଭ୍ୟ ମନୋଜ ପଟ୍ଟନାୟକ ପରବର୍ତ୍ତୀ ଚେୟାରମ୍ୟାନ୍ ହେବା ପ୍ରାୟ ନିଶ୍ଚିତ । 

ତେବେ ଚନ୍ଦନଙ୍କୁ ବ୍ଲକ୍ ର ଅଧିକାଂଶ ବିଜେପି ସରପଞ୍ଚ ଓ ସମିତିସଭ୍ୟ ସମର୍ଥନ କରୁଛନ୍ତି । 

ଉଲ୍ଲେଖନୀୟ ଯେ, ପଞ୍ଚାୟତ ସମିତି ଅଧ୍ୟକ୍ଷଙ୍କ ଅନାସ୍ଥା ପ୍ରସ୍ତାବରେ ବିଧାୟକ ଓ ସାଂସଦଙ୍କର ଭୋଟ୍ ଦେବାର କ୍ଷମତା ରହିଛି । ଏହି ପଞ୍ଚାୟତ ସମିତିଟି ଭବାନୀପାଟଣା ଓ ନର୍ଲା ବିଧାନସଭା ନିର୍ବାଚନ ମଣ୍ଡଳୀ ଅଧୀନରେ ରହିଥିବାରୁ ଏଥିରେ ନର୍ଲା ବିଧାୟିକା ମନୋରମା ମହାନ୍ତି(ବିଜେଡି) ଓ ଭବାନୀପାଟଣା ବିଧାୟକ ସାଗର ଚରଣ ଦାସ(କଂଗ୍ରେସ) ମଧ୍ୟ ଜଣେ ଜଣେ ଭୋଟର୍ ଅଟନ୍ତି । ତେବେ ସେମାନେ କାହାକୁ ସେମାନଙ୍କ ସମର୍ଥନ ଦେବେ, ଏହା ଏବେ ବି ଅସ୍ପଷ୍ଟ ରହିଛି । ନର୍ଲା ବ୍ଲକ୍ ର ଭାରପ୍ରାପ୍ତ ଅଧ୍ୟକ୍ଷ ଦୁର୍ଗା ପ୍ରସାଦ ମହାନ୍ତି ଏହି ଅନାସ୍ଥାର ମଙ୍ଗ ଧରିଥିବା ପ୍ରକାଶ। ଏଇ ୨ ଜଣ ବିଧାୟକ ଓ ସାଂସଦଙ୍କ ସମର୍ଥନ ଯୋଗାଡ କରିବାକୁ ଉଭୟ ଗୋଷ୍ଠୀ  ଭୁବନେଶ୍ବରରେ।  

ପ୍ରକାଶ ଯୋଗ୍ୟ ଯେ, ୨୬ ପଞ୍ଚାୟତ ବିଶିଷ୍ଟ କେସିଙ୍ଗା ବ୍ଲକ୍ ରେ ଗତବର୍ଷଠାରୁ ଅଧ୍ୟକ୍ଷ ଓ ପୂର୍ବତନ ବିଡିଓଙ୍କ ବିରୁଦ୍ଧରେ ବିଭିନ୍ନ ଗୁରୁତର ଦୁର୍ନୀତି ଓ କେଳେଙ୍କାରୀର ଅଭିଯୋଗ ପ୍ରକାଶ ପାଇଛି । ଏହା ସହ ଆନ୍ଦୋଳନ, ଧାରଣା ଓ ବିଶୃଙ୍ଖଳା ଆଦି ଚାଲିଆସୁଛ। ଏଇ ଉଭୟଗୋଷ୍ଠୀ ପରସ୍ପର ବିରୋଧରେ ଆରୋପ/ପ୍ରତ୍ୟାରୋପ କରି ଆସୁଛନ୍ତି। ଅଧ୍ୟକ୍ଷ ଚନ୍ଦନ କୁମାର ସେନାପତିଙ୍କ ବିରୋଧରେ ମନରେଗା ଓ ବିଭିନ୍ନ ସରକାରୀ ଯୋଜନାରୁ ପ୍ରଚୁର ପିସି ନେଉଥିବା, କଶୁରପଡାର ଏକ ସଂଯୋଗୀକରଣ ରାସ୍ତାକାମର ଫଲ୍ସ ବିଲ୍ ପାଇଁ ଜଣେ ମହିଳା କନିଷ୍ଠ ଯନ୍ତ୍ରୀ ତାଙ୍କୁ ୭ ଲକ୍ଷଟଙ୍କାର ଚେକ୍ ଦେଇଥିବା ସହ ସବୁକାମରେ ତାଙ୍କର ଅନୁଚିତ ଦଖଲ ଇତ୍ୟାଦି ବିଷୟରେ ସମିତି ବୈଠକରେ ପ୍ରବଳ ହଟ୍ଟଗୋଳ ସୃଷ୍ଟି ହୋଇଥିଲା । ଅପରପକ୍ଷରେ ସମିତିସଭ୍ୟ ମନୋଜ ପଟ୍ଟନାୟକ ଓ କେତେକ ସରପଞ୍ଚଙ୍କ ବିରୁଦ୍ଧରେ ଲୋକପ୍ରତିନିଧିମାନେ ସିଧାସଳଖ ଠିକା କରୁଥିବା ଅଭିଯୋଗ ମଧ୍ୟ ପ୍ରକାଶ ପାଇଥିଲା। ଅଳ୍ପଦିନ ତଳେ ସୁବୋଧ ରଣା ଓ ଜଣେ ମହିଳା ସରପଞ୍ଚଙ୍କ ନେତୃତ୍ଵରେ ବ୍ଲକ୍ କାର୍ଯ୍ୟାଳୟ ସମ୍ମୁଖରେ ଅଧ୍ୟକ୍ଷଙ୍କ ଇସାରାରେ ବ୍ଲକ୍ ପ୍ରଶାସନରେ ଚାଲୁଥିବା ଅନିୟମିତତା ଓ କେତେକ ଠିକାଦାରଙ୍କ ବିଲ୍ କରୁ ନଥିବା ବା ଟଙ୍କା କାଟିଦେଉଥିବା ଇତ୍ୟାଦି ଅଭିଯୋଗ କରି ସରପଞ୍ଚ ସଂଘ ଓ ସଭ୍ୟ ଧାରଣା ଦେଇଥିଲେ। ସର୍ବୋପରି ଏହି ବ୍ଲକ୍ ରେ ସରକାରୀ ଯୋଜନାର ଠିକାକାମକୁ ନେଇ ବର୍ଷାଧିକ କାଳ ଧରି ଗୋଷ୍ଠୀବିବାଦ, ରାଜନୈତିକ ଅସ୍ଥିରତା ଲାଗିଆସୁଛି । ବର୍ତ୍ତମାନ ରାଜ୍ୟରେ ନୂତନ ବିଜେପି ସରକାର ଆସିଲାପରେ ବିଜେଡି-ବିଜେପି ମଧ୍ୟରେ ଟକରାଟକରି ଚାଲିଥିବା ପ୍ରକାଶ। ତେଣୁ କୁଆଡେ ୯ କୋଟି ଟଙ୍କା ଖର୍ଚ୍ଚକରି ଚେୟାରମ୍ୟାନ୍ ହୋଇଥିବା ଚନ୍ଦନଙ୍କ ଆର୍ଥିକ ସାମର୍ଥ୍ୟ ଓ ତାଙ୍କ ପରିବାରର ପୁରାତନ ରାଜନୈତିକ ଇତିହାସ ସହିତ ତାଙ୍କର ଶିକ୍ଷାଗତ ଓ

ବ୍ୟକ୍ତିଗତ ଭାବମୂର୍ତ୍ତି ସହିତ ଜଣେ ଉତ୍ସର୍ଗୀକୃତ ସମାଜସେବୀ ତଥା ବନ୍ଧୁବତ୍ସଳ ଦୃଢ ସଂଗଠକ ଭାବରେ ଜନପ୍ରିୟ ଉପାଧ୍ୟକ୍ଷାଙ୍କ ସମିତିସଭ୍ୟ ସ୍ବାମୀ ମନୋଜଙ୍କର ମଧ୍ୟରେ ଚାଲିଥିବା ଏହି ରାଜନୈତିକ ପ୍ରତିଦ୍ୱନ୍ଦିତାରେ କିଏ ବିଜୟୀ ହେବେ, ଏହା ଜାଣିବାକୁ ଆଉ ମାତ୍ର ଗୋଟିଏ ରାତି ବାକି ଅଛି l ଏହି ଅନାସ୍ଥାପ୍ରସ୍ତାବ ପାଇଁ ଏକତୃତୀୟାଂଶ ସମର୍ଥନ ନିମନ୍ତେ ଆଉ ମାତ୍ର ୩ ଟି ସଂଖ୍ୟାର ଆବଶ୍ୟକତା ରହିଥିଲେ ହେଁ, ସାଂସଦ ଗେମ୍ ଚେଞ୍ଜର୍ ହୋଇପାରନ୍ତି ବୋଲି ପୂର୍ବାନୁମାନ କରାଯାଉଥିଲା ବେଳେ ରଜାଘରର ବୋହୂ ବା ରାଣୀମାଆ ସାଧାରଣତଃ ଭୋଟ୍ ଦେବାକୁ ବ୍ଲକ୍ କୁ ଆସନ୍ତିନି ବୋଲି ମଧ୍ୟ ଚର୍ଚ୍ଚା ହେଉଛି । ତଥାପି ଏହି ବ୍ଲକ୍ ର ପରବର୍ତ୍ତୀ ଚେୟାରମ୍ୟାନ୍ ମନୋଜ ପଟ୍ଟନାୟକ ହୋଇପାରନ୍ତି ବୋଲି ସ୍ଥାନୀୟ ଲୋକେ ଆଲୋଚନା କରୁଛନ୍ତି । ମନୋଜ ପଟ୍ଟନାୟକ ବିଜେଡ଼ି ଆଡକୁ ଢ଼ଳି ଥିବାରୁ ବିଜେପି ସାଂସଦ ତାଙ୍କୁ ଭୋଟ ଦେବେ ନାହିଁ l  ଏହାରି ଭିତରେ ଦେଖାଯାଉ, କାଲି କ'ଣ ହେଉଛି  ?