29-Jul-2024

ବଲାଙ୍ଗୀର(ପ୍ରେରଣା ଖବର)- ବିଶ୍ୱର ସର୍ବଶ୍ରେଷ୍ଠ ଗବେଷକଙ୍କ ମତରେ ଓଡିଆ ସାହିତ୍ୟରେ ହିଂସା,ଅହଙ୍କାର ଓ ବିଦ୍ୱେଷ ଅନୁପାତ ଅନ୍ୟ ସାହତ୍ୟଠାରୁ ଖୁବକମ୍ ।  କାରଣ ଓଡଶାର ସାଂସ୍କୃତିକ ଜୀବନ ତଳେ ଆଉଏକ ଜୀବନଶୈଳୀ ରହିଛି । ଯାହା ବୌଦ୍ଧଧର୍ମ ଦ୍ୱାରା ପ୍ରଭାବିତ । ତେଣୁ ସାହିତ୍ୟ ସବୁ ଉପାଦାନର ମୂଳପିଣ୍ଡ । ଓଡିଆ ସାହିତ୍ୟରେ ପ୍ରେମ,କରୁଣା,ଆବେଗ ଓ ତ୍ୟାଗ ଭରି ରହିଛି ବୋଲି ବଲାଙ୍ଗୀରର ପିପିଏକାଡେମୀ ହାଇସ୍କୁଲର ସଭାକକ୍ଷରେ ସାହିତ୍ୟ ଅନୁଷ୍ଠାନ ରଚନା ପକ୍ଷରୁ ଆୟୋଜିତ ଗଗନ ସ୍ୱାଇଁ ସ୍ନାରକୀବକ୍ତୃତାରେ ଜଗତଉଦ୍ଧାର ହେଉ ଶୀର୍ଷକ ଆଲୋଚନାଚକ୍ରରେ ଓଡିଶା ବିଶିଷ୍ଟ ସାହିତ୍ୟିକ ଡ.ଗୌରହରୀ ଦାସ ମତବ୍ୟକ୍ତ କରିଛନ୍ତି । ସେ ଆହୁରି କହିଛନ୍ତି ଯେ,ସାହିତ୍ୟର ଭୂମୀକା ବର୍ଷାପରି । ବର୍ଷା ଯେଭଳି ନୂଆ ଜଗତ ସୃଷ୍ଟିପାଇଁ  ସହାୟ ହୋଇଥାଏ ଠିକ ସେହିପରି ସାହିତ୍ୟ ନୂତନ ସୃଜନ ସଂସାର ଆରମ୍ଭ କରିଥାଏ । ସଂସାର ଆବେଗ ବିନା ରହିପାରିବ ନାହିଁ । ଏହି ଅବେଗର ନିଦର୍ଶନ ଓଡିଆ ସାହିତ୍ୟରେ ଭରି ରହିଛି । ମଣିଷର ଚେତନାକୁ ସାହିତ୍ୟ ଆଲୋକିତ କରିଥାଏ । ଶବ୍ଦକୁ ସେ ସବୁଠୁ ସମୃଦ୍ଧ ଓ ଶକ୍ତିଶାଳୀ ଅସ୍ତ୍ର ବୋଲି ବିବେଚନା କରିଥିଲେ । ମାତ୍ର ଗୋଟିଏ କଟୁଶବ୍ଦର ବେଦନା ଓ ଯନ୍ତ୍ରଣା ମଣିଷକୁ ଦୀର୍ଘଦିନ ଧରି ଆଘାତ ଦେଇଥାଏ । ତେଣୁ ଶବ୍ଦପ୍ରୟୋଗ ବେଳେ ସମସ୍ତେ ଯତ୍ନବାନ ହେବାକୁ ପରାମର୍ଶ ଦେଇଥିଲେ । ସେ କହିଥିଲେ ଯେ,ସାହିତ୍ୟ ଅଭିଜ୍ଞତା ଦେଇଥାଏ ଓ ଏହି ଅଭିଜ୍ଞତା ମଣିଷକୁ ବଦଳାଇ ଦେଇଥାଏ । ଭାରତର ଦୁଇଟି ମହାନକିର୍ତ୍ତି ମହାଭାରତ ଓ ରାମାୟଣରେ ମଧ୍ୟ ପ୍ରେମ,କରୁଣା ଓ

ଆବେଗର ଅନେକ ଉଦାହରଣ ରହିଛି ବୋଲି ଡ.ଦାସ କହିଥିଲେ । ରଚନାର ସଭାପତି ସନାତନ ଠାକୁରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଅନୁଷ୍ଠାନର ସଂପାଦକ ଭାଗିରଥି ମିଶ୍ର ସ୍ୱାଗତ ଅଭିଭାଷଣ ଓ ରାଜୀବଲୋଚନ ଆଚାର୍ଯ୍ୟ ପ୍ରାରମ୍ଭିକ ସୂଚନା ଦେଇଥିଲେ । ଏହି ଅବସରରେ ସ୍ୱର୍ଗତ ଗଗନ ସ୍ୱାଇଁଙ୍କ କବିତା ଓ ଗଲ୍ପକୁ କବି ପ୍ରହଲ୍ଲାଦ ଶତପଥି,ବନ୍ଦନା ପଟ୍ଟନାୟକ,ଜଗନ୍ନାଥ ସାହୁ ଓ ସୌମ୍ୟାଋତୁପର୍ଣ୍ଣା ତ୍ରୀପାଠୀ ପାଠ କରିଥିଲେ । ଶେଷରେ ରତ୍ନମୟ ତ୍ରୀପାଠୀ ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ପ୍ରଫେସର ମଧୁସୂଦନ ପତି,ପ୍ରଫେସର ଘନଶ୍ୟାମ ପଣ୍ଡା,ରମେଶଚନ୍ଦ୍ର ପୁରୋହିତ,ଗାଲ୍ପିକା ଗାୟତ୍ରୀ ସରାଫ,ଅଧ୍ୟାପକ ଅକ୍ଷୟ ସାହୁ,କୌତୁକ ପନ୍ଦର,ସାମ୍ବାଦିକ ମନରଂଜନ ଯୋଷୀ,ଅଖିଳ ହୋତା ପ୍ରମୁଖଙ୍କ ସହିତ ଶତାଧିକ ସାହିତ୍ୟପ୍ରେମୀ ଯୋଗ ଦେଇଥିଲେ ।