15-Nov-2023

ବଲାଙ୍ଗୀର(ପ୍ରେରଣା ଖବର) -ବଲାଙ୍ଗୀର ଜିଲ୍ଲାରେ ଚକଡାଚଡକ । ଶହଶହ ଏକର ଜମିରେ ଚକଡାପୋକ ଲାଗି ଧାନଫସଲ ନଷ୍ଟ ହୋଇଯାଇଛି । କୀଟଦମନ ପାଇଁ କୃଷିବିଭାଗର କୀଟନାଶକ ପ୍ରୟୋଗ କଲେ ମଧ୍ୟ ତାହା କାମ କରୁନାହିଁ । ଫଳରେ ଚାଷୀ ମାନେ ହତାଶ ହୋଇଯାଇଛନ୍ତି । ଏଭଳି ହତାଶାରୁ ପୁଇଁତଳା ବ୍ଲକ ବୁବେଲ ଗାଁର ଜଣେ ଚାଷି ରମେଶକୁମାର ଭୋଇ(୫୦ବର୍ଷ) ବିଷଖାଇ ଆତ୍ମହତ୍ୟା କରିଛନ୍ତି । ରମେଶ ଚଳିତବର୍ଷ ୧୦ଏକର ଜମିରେ ଧାନଚାଷ କରିଥିଲେ । ବ୍ୟାଙ୍କ ଓ ଅନ୍ୟାନ୍ୟ ସୂତ୍ରରୁ ଲକ୍ଷାଧିକ ଟଙ୍କା ଧାରକରଜ କରି ଚାଷ କରିଥିଲେ । ଧାନ ଫସଲ ମଧ୍ୟ ଭଲ ହୋଇଥିଲା । କିନ୍ତୁ ଗତ ୨୦ଦିନ ହେଲା ଧାନ ଫସଲରେ ଚକଡା ପୋକ ଲାଗିଗଲା । ଏଥିରେ ପ୍ରାୟ ୫ଏକରରୁ ଅଧିକ ଜମିରେ ଚକଡାପୋକ ଲାଗି ଧାନଫସଲ ନଷ୍ଟ ହୋଇଯାଇଛି । କୃଷିବିଭାଗକୁ ପରାମର୍ଶ କରି ଫସଲରେ ବିଷ ସିଞ୍ଚନ କରିଥିଲେ । କିନ୍ତୁ ତାହା କାମ ଦେଲାନି । ଚକଡା ଆହୁରି ବଢିଚାଲିଲା । ଏହା ସହିତ ଆଉ କିଛି ଜମି ଧାନହେଲା ବେଳେ ପାଣି ଅଭାବରୁ ମରୁଡିଗ୍ରସ୍ତ ମଧ୍ୟ ହୋଇଛି । ତେଣୁ ଗତ କିଛିଦିନ ହେଲା ରମେଶ ମାନସିକ ଚାପରେ ରହୁଥିଲେ । ଗତକାଲି ମଧ୍ୟ ସେ ବିଲକୁ ଯାଇ କୀଟନାଶକ ସିଞ୍ଚନ କରିଥିଲେ । ଧାନ ଫସଲର ଅବସ୍ଥା ଦେଖି ଶେଷରେ ନୀରାଶ ହୋଇ ନିଜେ ବିଷ ପିଇଦେଇ ଆତ୍ମହତ୍ୟା କରିଦେଲେ । ଧାନ ବିଲକୁ ଯାଇଥିବା ବେଳେ ସେଠାରେ ବିଷ ପିଇଦେଇ ଗୁରୁତର ହୋଇପଡିଥିଲେ । ତାଙ୍କ ଭାଇ ଓ ଅନ୍ୟମାନେ ଖବର ପାଇ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସପିଟାଲକୁ ଆଣି ଭର୍ତ୍ତି କରିଥିଲେ । କିନ୍ତୁ ମଙ୍ଗଳବାର ରାତି ୧୦ଟାରେ ହସପିଟାଲରେ ତାଙ୍କର ମୃତ୍ୟୁ ହୋଇଯାଇଥିଲା । ଏହି ଘଟଣାକୁ ନେଇ ପୁଇଁତଳା ଥାନାରେ ଏକ ମାମଲା ରୁଜୁ କରାଯାଇ ତଦନ୍ତ କରାଯାଉଛି । ପୋଲିସ ଶବକୁ ଜବତ କରି ପଞ୍ଚନାମା କରାଇଛି । ମୃତ ରମେଶଙ୍କ ଘରେ ବିଧବାପତ୍ନୀ,ପୁଅ ଓ ଝିଅ ଅଛନ୍ତି । ଏହି ପରିବାର କେବଳ ଚାଷ ଉପରେ ନିର୍ଭର କରୁଥିଲେ । ତେଣୁ ସରକାର ଏହି ପରିବାରକୁ ସରକାରୀ ସହାୟତା ପ୍ରଦାନ କରିବାକୁ ଗ୍ରାମବାସୀ ଦାବି କରିଛନ୍ତି । ସେପଟେ ଚାଷୀ ଆତ୍ମହତ୍ୟା ଘଟଣାଉପରେ ବଲାଙ୍ଗୀର ଜିଲ୍ଲା ମୁଖ୍ୟକୃଷି ଅଧିକାରୀ ସୁଭାଷ ବେହେରାଙ୍କୁ ପଚାରିବାରୁ ରମେଶ ବିଲରେ ଚକଡା ପୋକ ଲାଗନଥିଲା । ଆଜି ମୁଁ ନିଜେ କୃଷିବିଭାଗର ଅନ୍ୟଅଧିକାରୀମାନଙ୍କୁ ନେଇ ବୁବେଲ ଗାଁକୁ ଯାଇଥିଲୁ ।  ଧାନରେ ଅନ୍ୟ ପ୍ରକାର ପୋକ ଲାଗିଥିଲେ । ସେ ନିଜେ ଏହାର କେୟାର ନାଇନାହାଁନ୍ତି । ବିଲରେ ପାଣି ଆବଶ୍ୟକତା ଥିବା ବେଳେ ପାଣି ମଧ୍ୟ ମଡାଇ ନାହାଁନ୍ତି  ଓ ଶେଷରେ ଆତ୍ମହତ୍ୟା କରିଛନ୍ତି ବୋଲି କହିଛନ୍ତି । 
 

ଆଜି ବୁବେଲର ଚାଷୀ  ରମେଶ ଭୋଇଙ୍କ ଆତ୍ମହତ୍ୟା ଖବର ପାଇଲାପରେ ଲୋଇସିଂହା ବିଧାୟକ ଡ.ମୁକେଶ ମହାଲିଙ୍କ ବୁବେଲ ପହଞ୍ଚି ଗ୍ରାଉଣ୍ଡଜିରୋରୁ ସ୍ଥିତି ଅନୁଧ୍ୟାନ କରିଛନ୍ତି । ଏହି ଘଟଣା ବିଷୟରେ ସେ ରମେଶଙ୍କ ଧାନବିଲକୁ ବୁଲିବା ସହିତ ରମେଶଙ୍କ ପରିବାରବର୍ଗ ଓ ଗ୍ରାମବାସୀଙ୍କ ସହିତ ଆଲୋଚନା କରିଛନ୍ତି । ଅନୁଧ୍ୟାନ ପରେ ବିଧାୟକ ଶ୍ରୀ ମହାଲିଙ୍ଗ କହିଛନ୍ତି ଯେ,ସରକାରୀ ଯୋଜନାର ବିଫଳତା କାରଣରୁ  ହିଁ ରାଜ୍ୟରେ ଚାଷି ଆତ୍ମହତ୍ୟା ହେଉଛି । ରମେଶଙ୍କ ଜମିରେ ଚକଡା ଲାଗିଥିଲା । ସରକାର ଦେଉଥିବା ନକଲି କୀଟନାଶକ ସିଞ୍ଚନ କରିଥିବାରୁ ତାହା କାମ କଲାନାହିଁ । ସେହିପରି ସରକାରଙ୍କ ଘୋଷଣା ମୁତାବକ ଆଜି ପର୍ଯ୍ୟନ୍ତ ପୁଇଁତଳା ବ୍ଲକରେ ନିଶ୍ଚିତ ଜଳସେଚନ ହୋଇପାରିନାହିଁ । ଫଳରେ ରମେଶର ଜମି ମଧ୍ୟ ମରୁଡିଗ୍ରସ୍ତ ହୋଇଛି । ଶେଷରେ ମାନସିମ ଚାପଗ୍ରସ୍ତ ହୋଇ ରମେଶ ଆତ୍ମହତ୍ୟା କରିଛନ୍ତି । ମୃତ ଚାଷିଙ୍କ ପରିବାରକୁ ୫୦ଲକ୍ଷ ଟଙ୍କାର ସରକାରୀ ସହାୟତା ଓ ତାଙ୍କ ପରିବାରର ଜଣକୁ ସରକାରୀ ଚାକିରି ଦେବାକୁ ସେ ସରକାରଙ୍କ ପାଖରେ ଦାବି କରିଛନ୍ତି ।