15-Nov-2023

ବଲାଙ୍ଗୀର,ବଲାଙ୍ଗୀର ଜିଲ୍ଲାର ଜଣେ ଅଗ୍ରଣୀ ସଂଗଠକ,କ୍ରୀଡାବିତ୍ ତଥା ଜିଲ୍ଲା ଓକିଲସଂଘର ସାଧାରଣସଂପାଦକ ଅମନ ନାଗଙ୍କ ପରଲୋକ ହୋଇଯାଇଛି । ମଙ୍ଗଳବାର ରାତିରେ ତାଙ୍କ ଛାତିରେ ଯନ୍ତ୍ରଣା ହୋଇଥିଲା । ପ୍ରଥମେ ତାଙ୍କୁ ଭୀମଭୋଇ ମେଡିକାଲ କଲେଜ ଓ ପରେ ବରଗଡର ଏକ ଘରୋଇ ହସପିଟାଲକୁ ନିଆଯାଇଥିଲା । ସେଠାରେ ତାଙ୍କର ମୃତ୍ୟୁ ହୋଇଯାଇଥିଲା । ଅମନଙ୍କ ମୃତ୍ୟୁ ଖବର ପରେ ବଲାଙ୍ଗୀର ସହରରେ ଶୋକର ଛାୟା ଖେଳିଯାଇଛି । ଓକିଲସଂଘର ସଭାପତି ଅମ୍ବରିଶ ତ୍ରୀପାଠୀ ଗଭୀର ଶୋକବ୍ୟକ୍ତ କରିଛନ୍ତି । ଅମନ ଛାତ୍ରଜୀବନରୁ ଜଣେ ଭଲ ଫୁଟବଲ ଖେଳାଳି ହେବା ସହିତ ଜଣେ ଭଲ ସଂଗଠକ ଥିଲେ । ବଲାଙ୍ଗୀର ରାଜେନ୍ଦ୍ର ମହାବିଦ୍ୟାଳୟରେ ପଢୁଥିବା ସମୟରେ ଛାତ୍ରସଂସଦର ସାଧାରଣ ସଂପାଦକ ଓ ସମ୍ବଲପୁର ବିଶ୍ୱବିଦ୍ୟାଳୟର ଛାତ୍ରସଂସଦର ସଭାପତି ମଧ୍ୟ ରହିଥିଲେ । ଠିକ ସେହିପରି ବଲାଙ୍ଗୀର ଜିଲ୍ଲା ଓକିଲସଂଘର ସଂପାଦକ ଭାବରେ ଦୁଇଥର ନିର୍ବାଚନ ଜିଣିଥିଲେ । ଏବେ ମଧ୍ୟ ସାଧାରଣ ସଂପାଦକ ରହିଥିଲେ । ଗତ ଦୁଇବର୍ଷ ହେଲା ସେ ବିଜେପିଦଳରେ ଯୋଗଦେଇଥିଲେ । ତାଙ୍କ ବିୟୋଗରେ ବଲାଙ୍ଗୀର ଜିଲ୍ଲାରେ ଗଭୀର ଶୋକପ୍ରକାଶ ପାଇଛି ।