01-Jul-2023

ବରଗଡ଼:-ବିଗତ ଦିନରେ ଓଡ଼ିଶା ମାଟିରୁ ଠିକା ନିଯୁକ୍ତି ପ୍ରଥା ସବୁଦିନ ପାଇଁ ଉଚ୍ଛେଦ କରାଗଲା ବୋଲି ଘୋଷଣା କରାଯାଇଥିଲେ ମଧ୍ୟ ଜାତୀୟ ସ୍ୱାସ୍ଥ୍ୟ ମିଶନ ଓଡ଼ିଶା ଅଧିନରେ ୨୫୦୦ ରୁ ଉର୍ଦ୍ଧ ଆୟୁଷ ଡାକ୍ତର ଏବେବି ସେଇ କୁତ୍ସିତ ପ୍ରଥା ଠିକା ନିଯୁକ୍ତି ଓ ସ୍ୱଳ୍ପ ଦରମାରେ କାର୍ଯ୍ୟ କରୁଛନ୍ତି।ଆଜି ତା୦୧.୦୭.୨୦୨୩ରିଖ ଶନିବାର ଦିନ ଭୁବନେଶ୍ୱର ୟୁନିଟ-୯ ସ୍ଥିତ ବୁଦ୍ଧବିହାର ମନ୍ଦିର ସମ୍ମିଳନୀ କକ୍ଷରେ ରାଜ୍ୟ ଆର.ବି.ଏସ.କେ ଆୟୁଷ ଡାକ୍ତର ସଂଘ ଓଡ଼ିଶା ପକ୍ଷରୁ ଏକ ସାମ୍ବାଦିକ ସମ୍ମିଳନୀ ସମେତ ସାଧାରଣ ପରିଷଦ ବୈଠକ ଅନୁଷ୍ଠିତ ହୋଇଯାଇଛି।ଓଡ଼ିଶା ସରକାରଙ୍କ ଜାତୀୟ ସ୍ୱାସ୍ଥ୍ୟ ମିଶନ ଅଧିନରେ କାର୍ଯ୍ୟରତ ୧୨୭୨ ଆ.ବି.ଏସ.କେ ଆୟୁଷ ଡାକ୍ତରଙ୍କ ସହ ସମସ୍ତ ଆୟୁଷ ଡାକ୍ତର ମାନଙ୍କୁ ସେମାନଙ୍କ ପାହ୍ୟା ମାନ୍ୟତାରେ ଦରମା ପ୍ରଦାନ ତଥା ସେମାନଙ୍କ ନିଯୁକ୍ତିକୁ ଯଥାଶିଘ୍ର ନିୟମିତ ସହ ସ୍ଥାୟୀ କରିବା ପାଇଁ ମାନ୍ୟବର ମୁଖ୍ୟମନ୍ତ୍ରୀ ଓ ଓଡ଼ିଶା ସରକାରଙ୍କୁ ବାର୍ତ୍ତା ଦେବା ପାଇଁ ଏ ସାମ୍ବାଦିକ ସମ୍ମିଳନୀ ଆୟୋଜିତ କରାଯାଇଥିଲା।ଆଜିର କାର୍ଯ୍ୟକ୍ରମକୁ ସଂଘର ସଭାପତି ପ୍ରଭାତ ମହାନ୍ତି ଉଦଘାଟନ କରି ଉପସ୍ଥିତ ଗଣମାଧ୍ୟମ ପ୍ରତିନିଧି ମାନଙ୍କ ମାଧ୍ୟମରେ ରାଜ୍ୟ ସରକାରଙ୍କୁ ବାର୍ତ୍ତା ଦେଇ କହିଲେ ଯେ,ସ୍ୱଳ୍ପ ଦିନ ମଧ୍ୟରେ ଆୟୁଷ ଡାକ୍ତର ମାନଙ୍କ ନ୍ୟାର୍ଯ୍ୟ ଦାବି ପୂରଣ ପାଇଁ ମାନ୍ୟବର ମୁଖ୍ୟମନ୍ତ୍ରୀ ଯଦି କିଛି ସକରାତ୍ମକ ପଦକ୍ଷେପ ନ ନିଅନ୍ତି ତେବେ ଓଡିଶା ଓଡ଼ିଶା ସରକାରଙ୍କ ଅଧିନରେ କାର୍ଯ୍ୟରତ ସମସ୍ତ ଆୟୁଷ ଡାକ୍ତରଙ୍କ ସମେତ ଆୟୁଷ ପାଠ୍ୟକ୍ରମରେ ଅଧ୍ୟୟନରତ ସମସ୍ତ ଛାତ୍ରଛାତ୍ରୀ ରାଜରାସ୍ତାକୁ ଓହ୍ଲାଇବା ସହ ଆନ୍ଦୋଳନ କରିବେ।ବାରମ୍ବାର ଦାବି ଉତ୍ଥାପନ ସତ୍ତେ ସରକାରୀ ସ୍ତରରେ ଆୟୁଷ ଡାକ୍ତର ମାନଙ୍କ ପ୍ରତି ଅବହେଳାକୁ ନେଇ ସମ୍ମିଳନୀର ଉପସ୍ଥିତ ସଂଘର ବରିଷ୍ଠ ସଦସ୍ୟ ତଥା ଉପଦେଷ୍ଟା ଡା ବିଶ୍ୱରଞ୍ଜନ ପ୍ରଧାନ,ଡା ବିଜୟ ସାମଲ ଓ ଡାକ୍ତର ସୁଦୀପ୍ତ କୁମାର ସାହୁ ତୀବ୍ର ଅସନ୍ତୋଷ ପ୍ରକାଶ କରିଥିଲେ।ଆଜିର ଏହି କାର୍ଯ୍ୟକ୍ରମରେ ସଂଘର କାର୍ଯ୍ୟକାରୀ ସଭାପତି ଡ଼ା ହିମାଂଶୁ ଶେଖର ମିଶ୍ର,ସାଧାରଣ ସମ୍ପାଦକ ଡା ରବିନ୍ଦ୍ର ସେଠୀ,ଉପସଭାପତି ଡା ଲିଙ୍ଗରାଜ ଦାଶ ଏବଂ କୋଷାଧ୍ୟକ୍ଷ ଡା ରାଜେଶ କୁମାର ଜେନା,ଡା ଶୁଭେନ୍ଦୁ ଦାସ,ସଦସ୍ୟା ଡା ଅମୃତା ମହାନ୍ତି,ଡା ସୁଦିପ୍ତା ପରିଡ଼ା ପ୍ରମୁଖ ଯୋଗଦେଇ ଥିଲେ।ଆର.ବି.ଏସ.କେ ଆୟୁଷ ଡାକ୍ତର ମାନଙ୍କ ଦ୍ୱାରା ଦୀର୍ଘ ୧୦ବର୍ଷ ଧରି ସମଗ୍ର ଓଡିଶାର କୋଣ ଅନୁକୋଣରେ କିପରି ଅଙ୍ଗନବାଡ଼ି ଓ ବିଦ୍ୟାଳୟ ସ୍ତରୀୟ ପିଲା ମାନଙ୍କୁ ସ୍ୱାସ୍ଥ୍ୟ ସେବା ଯୋଗାଇ ଦିଆଯାଇ ଆସୁଛି ତାହାର ଏକ ବିସ୍ତୃତ ବିବରଣୀ ଦିଆଯାଇଥିଲା।ଆର.ବି.ଏସ.କେ ଆୟୁଷ ଡାକ୍ତର ମାନଙ୍କୁ ଓଡ଼ିଶା ସରକାରଙ୍କ ଆୟୁଷ ମନ୍ତ୍ରଣାଳୟ ଅଧିନକୁ ନେବା ସହିତ ଜାତୀୟ ସ୍ୱାସ୍ଥ୍ୟ ମିଶନ,ଓଡ଼ିଶା ଅଧିନରେ କାର୍ଯ୍ୟରତ ସମସ୍ତ ଆୟୁଷ ଡାକ୍ତର ମାନଙ୍କ ନିଯୁକ୍ତି କୁ ଯଥାଶୀଘ୍ର ସ୍ଥାୟୀ ତଥା ନିୟମିତ କରା ନ ଗଲେ ସମସ୍ତ ଆବିଏସକେ ଆୟୁଷ ଡାକ୍ତରମାନେ ଏସମା କୁ ଖାତିର ନ କରି ଆଗାମୀ ଦିନରେ ଦୃଢ଼ ପଦକ୍ଷେପ ନେବାକୁ ସଂଘ ପକ୍ଷରୁ ଓଡ଼ିଶା ସରକାର ତଥା ମାନ୍ୟବର ମୁଖ୍ୟମନ୍ତ୍ରୀଙ୍କୁ ଚେତାବନୀ ଦେଇଛନ୍ତି।