18-May-2023

ବୀରମହାରାଜପୁର, (ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ତହସିଲ ଅନ୍ତର୍ଗତ ବିଶାଳପାଳି ଗ୍ରାମ୍ୟ ଜଙ୍ଗଲ ଜମି ଜବରଦଖଲ ପ୍ରତିବାଦରେ ଗାଁର ଏସ ଏଚ ଜି ମହିଳା ଗୋଷ୍ଠୀ ତହସିଲଦାର ଙ୍କୁ ଦାବି ପତ୍ର ପ୍ରଦାନ କରିଥିଲେ। ବିଶାଲପାଳି ଠାରେ ଜଙ୍ଗଲ ଜମିରେ ସବୁଜିମା ସୃଷ୍ଟି ଉଦ୍ଦେଶ୍ୟରେ ବନ ବିଭାଗ ପକ୍ଷରୁ ବୃକ୍ଷ ରୋପଣ କରାଯାଇଥିଲା। ବର୍ତ୍ତମାନ ଉକ୍ତ ସ୍ଥାନ ସହିତ ଗ୍ରାମ୍ୟ ଜଙ୍ଗଲକୁ ଗାଁ ତଥା ଆଖପାଖ ଗାଁର କିଛି ଲୋକ ଜବରଦଖଲ କରିଥିବା ନେଇ ଦାବି ପତ୍ର ରେ ଉଲ୍ଲେଖ ରହିଛି। ଏହାକୁ ଗାଁ'ର ମହିଳା ସ୍ବୟଂ ସହାୟକ ଗୋଷ୍ଠୀ ର ସଦସ୍ୟ ମାନେ ବିରୋଧ କରିବା ସହ ବନ ବିଭାଗର ଦୃଷ୍ଟି ଆକର୍ଷଣ କରିଥିବା ଦର୍ଶାଇଛନ୍ତି। ଜବରଦଖଲକାରୀ ମାନେ ବିଭାଗୀୟ କର୍ମଚାରୀ ଙ୍କୁ ହାତ କରି ଗ୍ରାମ୍ୟ ଜଙ୍ଗଲ କୁ ଅକ୍ତିଆର କରୁଥିବା ଅଭିଯୋଗ ହୋଇଛି। ଫଲରେ ଦିନକୁ ଦିନ ଗୃହପାଳିତ ପ୍ରାଣୀଙ୍କ ଚାରଣ ଭୂମି ମଧ୍ୟ ସଙ୍କୁଚିତ ହେବାରେ ଲାଗିଛି। ଉକ୍ତ ଜମିରୁ କେନ୍ଦୁପତ୍ର ତୋଳାଳୀ ମଧ୍ୟ ନିଜ ଜୀବିକା ହରାଇବା ସହ ସରକାରଙ୍କ ରାଜସ୍ବ ହାନି ହେଉଥିବା ମହିଳା ଗୋଷ୍ଠୀ ଅଭିଯୋଗ କରିଛନ୍ତି।  ଏସବୁର ପ୍ରତିକାର ତଥା ଜବରଦଖଲ ଉଚ୍ଛେଦ ଦାବିରେ ୫ ଗୋଟି ସ୍ବୟଂ ସହାୟକ ଗୋଷ୍ଠୀ ବୀରମହାରାଜପୁର ତହସିଲ କାର୍ଯ୍ୟାଳୟକୁ ଆସି ତହସିଲଦାର ବିବୁଧ ଗଡ଼ନାୟକ ଙ୍କୁ ଏକ ଦାବିପତ୍ର ପ୍ରଦାନ କରିଥିଲେ। ଖୁବଶୀଘ୍ର ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଥିଲେ।