25-Nov-2022

ସମ୍ବଲପୁର, ଜାଲ୍‌ ସାର୍ଟିଫିକେଟ୍‌ ଦେଇ ଚାକିରି କରିଥିବା ଠକ ଶିକ୍ଷକ ଦୈତାରୀ ମହାପାତ୍ରଙ୍କୁ ପୋଲିସ ଗିରଫ କରିଛି I ଶାସନ ଥାନା ପରମାଣପୁରର ଦୈତାରୀ ମହାପାତ୍ର ଜାଲ୍‌ ସିଟି ସାର୍ଟିଫିକେଟ୍‌ ଦେଇ ଜାମପାଲି ପ୍ରାଥମିକ ବିଦ୍ୟାଳୟ ପରମାଣପୁରରେ ୨୦୦୫ରୁ ଚାକିରି କରୁଥିଲେ I ଠକ ଶିକ୍ଷକ ଦୈତାରୀଙ୍କର ୨୦୧୧ରେ ରେଗୁଲାର୍‌ ମଧ୍ୟ ହୋଇଥିଲା I ଅଭିଯୋଗ ହେବା ପରେ ତାଙ୍କର ସିଟି ସାର୍ଟିଫିକେଟ ଭେରିଫିକେସନ ପାଇଁ ମାଧ୍ୟମିକ ଶିକ୍ଷା ପରିଷଦ କଟକକୁ ପଠାଯାଇଥିଲା। ତାପରେ ଦୈତାରୀ ମହାପାତ୍ର ଜାଲ୍‌ ସାର୍ଟିଫିକେଟ ଦେଇ ଚାକିରି କରୁଥିବା ଜଣାପଡ଼ିଥିଲା I ମାନେଶ୍ବର ବିଇଓଙ୍କ ନିର୍ଦ୍ଦେଶକ୍ରମେ ୨୦୨୦ର ତାଙ୍କୁ ଚାକିରିରୁ ବହିଷ୍କୃତ କରାଯାଇଥିଲା। ଜାଲ୍‌ ସାର୍ଟିଫିକେଟ୍‌ ଦେଇ ପାଖାପାଖି ୧୫ ବର୍ଷ ସେ ଚାକିରି କରିବା ସହ ସରକାରୀଙ୍କ ଠାରୁ ଦରମା ମଧ୍ୟ ନେଇଛନ୍ତି। ତେଣୁ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଭବାନୀ ଫିଲ୍ଡର ନିରଞ୍ଜନ ବଡ଼ପଣ୍ଡା ଟାଉନ୍‌ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ଅଭିଯୁକ୍ତ ଦୈତାରୀ ମହାପାତ୍ରକୁ ପୋଲିସ ଗିରଫ କରି ଗୁରୁବାର କୋର୍ଟ ଚାଲାଣ କରିଛି I
ସମ୍ବଲପୁରରୁ ସଂଜୀବ ପାଣିଗ୍ରାହୀଙ୍କ ରିପୋଟ