24-Nov-2022

ସମ୍ବଲପୁର,( ସଂଜୀବ ପାଣିଗ୍ରାହୀ)
 ସମ୍ବଲପୁର ସାଂସ୍କୃତିକ ପରିଷଦ ପକ୍ଷରୁ ଅଇଁଠାପାଲି ବିର୍ସା ମଇଦାନର ଭାଗବତ ନନ୍ଦ ମଂଚରେ ଆୟୋଜିତ ସମ୍ବଲପୁର ମହୋତ୍ସବର ବୁଧବାର ଚତୁର୍ଥ ସନ୍ଧ୍ୟା‌ରେ ଦର୍ଶକଙ୍କ ପ୍ରବଳ ଭିଡ଼ ଦେଖିବାକୁ ମିଳିଥିଲା I ଥଣ୍ଡା ହେଉଥିବା ସତ୍ତ୍ବେ ଲୋକେ ମ‌ହୋତ୍ସବର ସାଂସ୍କୃତିକ କାର୍ଯ୍ୟକ୍ରମକୁ ବେଶ୍‌ ଉପଭୋଗ କରିଥିଲେ I ବୁଧବାର ମଧ୍ୟ ଲୋକଗୀତ ସହିତ ଆରମ୍ଭ ହୋଇଥିଲା ସାଂସ୍କୃତିକ କାର୍ଯ୍ୟକ୍ରମ I ଲୋକଗୀତରେ ଅଲକା ମିଶ୍ର ‘ଚିକି ଚିକି ଚାଉଁରକେ’, କ୍ରିଷ୍ଣା ପଟେଲ ‘ଗାଁ ମଲ ମଲ ଅମରିଫୁଲ’, ସ୍ମୃତି ମିଶ୍ର ‘ସତେ ଦିଶୁଛେ କେଡ଼େ ସୁନ୍ଦର’, ପ୍ରୀତିନନ୍ଦା ମିଶ୍ର ‘ ଇ ସାରା ଦୁନିଆ ବୁଲି ଆଏଲି’, କାଲିଚରଣ ଗୁରୁ ‘ଗାଡ଼ି ଗଲା ନ ରାଉରକେଲାର କସଲା’ ଆଦି ଗୀତ ଉପସ୍ଥିତ ଲୋକଙ୍କୁ ବେଶ୍ ଆମୋଦିତ କରିଥିଲା  I ଲୋକଗୀତ କାର୍ଯ୍ୟକ୍ରମ ପରେ ବିଭିନ୍ନ ସ୍ଥାନରୁ ଆସିଥିବା କଳାକାରମାନେ ଚିତ୍ତାକର୍ଷକ ଲୋକନୃତ୍ୟ ପରିବେଷଣ କରି ଦର୍ଶକଙ୍କ ମନ ଜିଣି ନେଇଥିଲେ I ମଙ୍ଗଳବାର ଭଳି ବୁଧବାର ମଧ୍ୟ ଫେସନ ସୋ’ ଅନୁଷ୍ଠିତ ହୋଇଥିଲା I ଭିସୁଟ୍‌ର କୁଳପତି ପ୍ରଫେସର ବଂଶୀଧର ମାଝୀଙ୍କ ସହିତ ଶିବ ନାରାୟଣ ଶତପଥୀ, ଦୁର୍ଗା ପଣ୍ଡା ଏବଂ କ୍ରିଷ୍ଣା ପଟେଲ ଅତିଥି ଭାବେ ଯୋଗଦେଇଥିଲେ I ସମ୍ବଲପୁର ସାଂସ୍କୃତିକ ପରିଷଦର ସଂପାଦକ ସପନ ମିଶ୍ରଙ୍କ ସଂଯୋଜନାରେ ଅନୁଷ୍ଠିତ କାର୍ଯ୍ୟକ୍ରମରେ ଉପଦେଷ୍ଟା ଭକ୍ତପ୍ରସାଦ ନନ୍ଦ, ସଦାନନ୍ଦ ପଣ୍ଡା ଓ ଗୋଲକ ବିହାରୀ ମିଶ୍ର ମଂଚାସୀନ ଥିଲେ I ସମାଜସେବା ପାଇଁ ‘ମା ଲିମ୍‌ ସରିଏନ୍ ଯୁବକ ସଂଘ’ ଏବଂ ‘ପ୍ରୟାସ ପରିବାର’କୁ ସମ୍ବର୍ଦ୍ଧିତ କରାଯାଇଥିଲା I ମଙ୍ଗଳବାର ତୃତୀୟ ଦିବସରେ ପଡ଼ିଆର ଅଭୟ ପାଢ଼ୀ ସଭାଘରରେ ଅଧ୍ୟାପକ ମୋହନ ସାହୁଙ୍କ ସଭାପତିତ୍ବରେ ଶିବପ୍ରିୟ ମିଶ୍ର ଓ କିଶୋର ସାହୁ ଯୋଗଦେଇ ‘ସମ୍ବଲପୁରୀ  ଭାଷା-ସାହିତ୍ୟର ସ୍ଥିତି, ଗତି ଆଉ ଉନ୍ନତି’ ଶୀର୍ଷକ ଉପରେ ଆଲୋଚନା ହୋଇଥିଲା I ଶିକ୍ଷାଦାନ କ୍ଷେତ୍ରରେ ସମ୍ବଲପୁରୀ ଭାଷାରେ ପାଠ୍ୟପୁସ୍ତକ ତିଆରି କରିବା ସମୟ ଆସିଯାଇଛି I ଜାତୀୟ ଶିକ୍ଷାନୀତି ଅନୁସାରେ ଅନ୍ତତଃ ପକ୍ଷେ ତୃତୀୟ ଶ୍ରେଣୀ ପର୍ଯ୍ୟନ୍ତ ସମ୍ବଲପୁରୀ ଭାଷାରେ ପାଠ୍ୟପୁସ୍ତକ ପ୍ରଣୟନଯୋଗ୍ୟ ଲେଖା ଏବେ ଅତ୍ୟାବଶ୍ୟକ ହୋଇଯାଇଛି I କେବଳ କବିତା ନଲେଖି ବିଭିନ୍ନ ବିଷୟରେ ନିବନ୍ଧ, ଶିଶୁ ଲେଖା ଆଦି ରଚନା କରିବାର ଆବଶ୍ୟକତା ରହିଛି ବୋଲି ମତପ୍ରକାଶ ପାଇଥିଲା I ସଦାନନ୍ଦ ପଣ୍ଡାଙ୍କ ପରିଚାଳନାରେ ଅନୁଷ୍ଠିତ ଏହି ଆଲୋଚନାରେ ସପନ ମିଶ୍ର ଶେଷରେ ଧନ୍ୟବାଦ ଦେଇଥିଲେ ।