21-Apr-2021

ବଲାଙ୍ଗିର(ପ୍ରେରଣା ଖବର) ପୋଲିସ ଡ଼ିଜି ଅଭୟଙ୍କ ବଲାଙ୍ଗିର ଗସ୍ତ । ପୂର୍ବାହ ୯ଟା ୧୫ରେ ଡ଼ିଜି ଏକ ସ୍ବତନ୍ତ୍ର ହେଲିକ୍ୟାପ୍ଟର ଯୋଗେ ଆସି ମନୋହରପୁର ରିଜର୍ଭ ପୋଲିସ ହେଲିପ୍ୟାଡରେ ଓହ୍ଲାଇଥିଲେ । ସେଠାରୁ ସେ ରିଜର୍ଭ ପୋଲିସ କାର୍ଯ୍ୟାଳୟକୁ ଯାଇ ଜିଲ୍ଲାରେ କରୋନା ସ୍ଥିତି, ପୋଲିସର ଯାଞ୍ଚ, ମାଓ ଗତିବିଧି ଏବଂ ଆଇନ ଶୃଙ୍ଖଳା ପରିସ୍ଥିତି ଉପରେ ଆଲୋଚନା କରିଥିଲେ । ପରେ ସେଠାରୁ ବାହାରି ପ୍ରଥମେ ଟାଉନ ଥାନା ଏବଂ ପରେ ସଦର ଥାନା ପରିଦର୍ଶନରେ ଯାଇଥିଲେ । ଥାନାମାନଙ୍କରେ ଡ଼ିଜି ଥାନା କର୍ମଚାରୀ ଏବଂ ଉପସ୍ଥିତ ଅଭିଯୋଗକାରୀମାନଙ୍କ ସହ ଆଲୋଚନା କରିଥିଲେ ।

ପରେ ସେଠାରୁ ବାହାରି ୧୧ଟାରେ ହେଲିପ୍ୟାଡକୁ ଫେରିଯାଇଥିଲେ । ଏହି ଅବସରରେ ଡ଼ିଜି ଅଭୟ ବଲାଙ୍ଗୀରବାସୀଙ୍କୁ କରୋନା ସଂକ୍ରମଣରୁ ନିଜକୁ ସୁରକ୍ଷିତ ରଖିବାକୁ ନିବେଦନ କରିଥିଲେ । ଅତି ଆବଶ୍ୟକ ନହେଲେ ଘରୁ ବାହାରିବାକୁ ସେ ବାରଣ କରିବା ସହ ମାସ୍କ ଏବଂ ସାନିଟାଇଜର ବ୍ୟବହାର କରିବାକୁ ପରାମର୍ଶ ଦେଇଥିଲେ । ଶେଷରେ ପୋଲିସ ଲୋକଙ୍କ ସେବକ ଏବଂ ତାଙ୍କ ସେବା ପାଇଁ ପୋଲିସ ଅଛି, ଏମାନଙ୍କ ସହଭାଗିତରେ ହିଁ କରୋନା ନିୟନ୍ତ୍ରଣ ହେବ  ବୋଲି କହିଥିଲେ । ଏହି ଗସ୍ତରେ ସ୍ବତନ୍ତ୍ର ଗୁଇନ୍ଦା ବିଭାଗର ଡ଼ିଆଇଜି ଅନିରୁଦ୍ଧ ସିଂ, ଉତ୍ତରାଞ୍ଚଳ ଆଇଜି ନରସିଂହ ଭୋଲ, ବଲାଙ୍ଗିର ଏସପି ଦାୟିତ୍ବରେ ଥିବା ବରଗଡ଼ ଏସପି ପଦ୍ମିନୀ ସାହୁ ତଥା ଜିଲ୍ଲା ପୋଲିସର ବହୁ ବରିଷ୍ଠ ଅଧିକାରୀ ଉପସ୍ଥିତ ଥିଲେ ।