15-Mar-2021

ବ୍ରହ୍ମପୁର (ପ୍ରେରଣା ଖବର) : ମାର୍ଚ୍ଚ ଅଧା ନହେଉଣୁ ଜଳ ପାଇଁ ଯନ୍ତ୍ରଣା ବଢ଼ିଲାଣି ।  କେଉଁଠି ପିଇବା ପାଣି ନାଁରେ କାଦୁଅମିଶା ପାଣି ଲୋକଙ୍କ ଶୋଷ ମେଣ୍ଟାଉଛି ତ ଆଉ କେଉଁଠି ମାଇଲ ମାଇଲ ଚାଲିବାକୁ ପଡ଼ୁଛି ।  ହେଲେ ଗଞ୍ଜାମ ଛତ୍ରପୁର ଷ୍ଟେସନ ରୋଡରେ ଭାଗ୍ୟଟାଣ ଥିଲେ ପିଇବା ପାଣି ମିଳିବ ନ ହେଲେ କାଦୁଅ ପାଣି ତ ଦୂରର କଥା । ପାଣିର ଦର୍ଶନ ବି ମିଳୁନି । ଲଟେରୀରେ  ନାଁ ଉଠିଲା ତ ପାଣି ମିଳିବ । ନେହେଲେ ପାଣି କଥା ଭାବି ଶୋଷ ମେଣ୍ଟାଇବା ସାର । ସେହି ଗଞ୍ଜାମରେ ପାଣି ଡିମାଣ୍ଡରେ ଆଉ କେଉଁଠି ହୋହଲ୍ଲା ବି ହୋଇଛି । ଗରା, ବାଲଟି ଧରି ଲୋକେ ଟାୟାର ଜାଳି ପାଣି ମୁନ୍ଦାଏ ପାଇଁ ରାସ୍ତାରେ ବସିଛନ୍ତି ।

ବୃହସ୍ପତି ଟାଣ ଅଛି ତ ପାଣି ଗରାଏ ମିଳିବ । ନହେଲେ ଜଳ ନାଁରେ ଯମ ଯନ୍ତ୍ରଣା। ଯେମିତି ଶୂନ୍ୟହସ୍ତରେ ଆସିଥିବ ସେମିତି ହିଁ ଲେଉଟିବ । ଗଞ୍ଜାମ ଛତ୍ରପୁର ଷ୍ଟେସନ ରୋଡ୍‌ ସାହିରୁ ଆସିଛି ଏମିତି ବିଚଳିତ କରିଦେବା ଭଳି ଚିତ୍ର । ପାନୀୟ ଜଳର ଘୋର ସମସ୍ୟାରେ ସନ୍ତୁଳି ହେଉଥିବା ଏହି ଅଞ୍ଚଳବାସୀଙ୍କୁ ପାଣି ମିଳିବ କି ନାଁ ତାହା ନିର୍ଦ୍ଧାରଣ କରୁଛି ଲଟେରୀ ।  ୧୫ ମିନିଟ ପାଇଁ ପାଇପରେ ପାଣି ଆସେ । ସାମ୍ନାରେ ଲମ୍ବା ଲାଇନ୍‌ ।  ଗଣ୍ଡଗୋଳ ଏଡ଼ାଇବାକୁ ଲଟେରୀ ଉଠାଣ ହୁଏ । ୧ ନମ୍ବର ଟୋକନ୍‌ ଯିଏ ପାଏ ସିଏ ପ୍ରଥମେ ପାଣି ଗରା ନିଏ। କ୍ରମାନ୍ବୟରେ ଧାଡ଼ି ଆଗକୁ ବଢ଼େ । ୧୫ ମିନିଟ ପରେ ପାଇପରେ ପାଣି ବନ୍ଦ। ବାକି ଲୋକ କାନମୁଣ୍ଡା ଆଉଁସି ଫେରନ୍ତି। 

ସେହି ଗଞ୍ଜାମ ବ୍ରହ୍ମପୁର ଉପକଣ୍ଠ ଜଗଦଳପୁରର ଏ ଦୃଶ୍ୟ ଉପରେ ମଧ୍ୟ ନଜର ପକାନ୍ତୁ । ପାଣି ପାଇଁ ରାସ୍ତା ଉପରେ ଶହଶହ ଲୋକେ । ଜାନିବିଲି ଜଳଯୋଗାଣ ପ୍ରକଳ୍ପ ଥିଲେ ବି ଲୋକଙ୍କୁ ମିଳୁନି ପାଣି । ବାରମ୍ବାର ପ୍ରଶାସନର କୁମ୍ଭକର୍ଣ୍ଣ ନିଦ୍ରା ଭାଙ୍ଗିବାକୁ ପ୍ରୟାସ ପରେ ବିଫଳ ହେବାରୁ ବାଧ୍ୟ ହୋଇ ପ୍ରତିବାଦକୁ ଓହ୍ଲାଇଛନ୍ତି ଲୋକେ ।ତେବେ  ଖବର ପାଇ କୁକୁଡ଼ାଖଣ୍ଡି ବିଡିଓ ଓ ଗ୍ରାମ୍ୟ ଜଳ ଯୋଗାଣ ନିର୍ବାହୀ ଯନ୍ତ୍ରୀ ସ୍ପଟ୍‌ରେ ପହଞ୍ଚି ସମସ୍ୟା ସମାଧାନ ନେଇ ପ୍ରତିଶ୍ରୁତି ଦେବା ପରେ ପ୍ରଶମିତ ହୋଇଛି ଆନ୍ଦୋଳନ ।

ମୟୂରଭଞ୍ଜ କପ୍ତିପଦା ସରଙ୍ଗର ଦୃଶ୍ୟ କିନ୍ତୁ ସମ୍ପୂର୍ଣ୍ଣ ଭିନ୍ନ  । କୋଦାଳ ଧରି ଯୁବକ ଜଣକ କାମରେ ଲାଗିଛନ୍ତି । ପାଣି ପାଇଁ ଏହି ସଂଗ୍ରାମ। ଦେଖନ୍ତୁ କେମିତି ଓ କେତିକି ପାଣି ବାହାରୁଛି। ଏଇଥିରେ ହିଁ ସ୍ଥାନୀୟ ଲୋକଙ୍କ ଆବଶ୍ୟକତା ମେଣ୍ଟିଥାଏ।  ସମସ୍ୟା ନେଇ ଅନେକ ଥର ବଡ଼ ଅଧିକାରୀ ଦୁଆର ବାଡ଼େଇଛନ୍ତି । ହେଲେ ଏମାନଙ୍କ ସମସ୍ୟା ଶୁଣିବାକୁ ସେମାନଙ୍କୁ ତର ନାହିଁ ।

ଏଯାଏ ଏପ୍ରିଲ ହୋଇନି । ରାଜ୍ୟ ସାରା କିନ୍ତୁ ଜଳାଭାବର ମେଞ୍ଚମେଞ୍ଚା ଚିତ୍ର ସାମ୍ନାକୁ ଆସିଲାଣି । ତେଣୁ ବେଳ ଥାଉଥାଉ ବନ୍ଧ ନବାନ୍ଧିଲେ ମେ, ଜୁନ୍‌ରେ ବଡ଼ ଅଘଟଣକୁ ଏଡ଼ାଇ ଦିଆଯାଇନପାରେ ।