26-Jul-2026

ବଲାଙ୍ଗୀର(ପ୍ରେରଣା ଖବର ): ବଲାଙ୍ଗୀର ଜିଲ୍ଲା ଲୋଇସିଂହା ବ୍ଲକଅନ୍ତର୍ଗତ ମାଗୁରବେଢାଠାରେ ନିର୍ମାଣ ହୋଇଥିବା ଲୋୟରସୁକତେଲ ବୃହତ ଜଳସେଚନପ୍ରକଲ୍ପରୁ ଆଜି ପ୍ରଥମକରି ଚଳିତବର୍ଷର ବନ୍ୟାଜଳ ଛଡାଯାଇଛି । ୪ଟି ଗେଟରେ ଜଳ ନିସ୍କାସିତ ହେଉଛି । ପୂର୍ବ ସୂଚନା ମୁତାବକ ନଇକୁଳିଆ ଗ୍ରାମଗୁଡିକୁ ଡାକବାଜିଯନ୍ତ୍ରରେ ସୂଚିତ କରାଯାଇଥିଲା । ଆଜି ଦିନ ୧.୩୦ଟା ବେଳେ ପୂଜାର୍ଚ୍ଚନା କରାଯାଇ ଗେଟ ଖୋଲାଯାଇ ଜଳ ଛଡାଯାଇଥିଲା । ବଲାଙ୍ଗୀର ଅତିରିକ୍ତ ଜିଲ୍ଲାପାଳ(ରାଜସ୍ୱ) ପବିତ୍ରକୁମାର ବେହେରା,ପ୍ରକଲ୍ପର ମୁଖ୍ୟନିର୍ମାଣଯନ୍ତ୍ରୀ ଇଂ.ସୁରେନ୍ଦ୍ର ଭୋଇ,ଡେମଡିଭିଜନର ଅଧିକ୍ଷଣଯନ୍ତ୍ରୀ ଇଂ.ଭାଗିରଥି ପାତ୍ର,ଏସଡିଓ ଗୋବିନ୍ଦ ପୁରୋହିତ,ତପନ ବାରିକ ଓ ନିର୍ମାଣକାରୀ ସଂସ୍ଥାର ପ୍ରୋଜେକ୍ଟମ୍ୟାନେକର ଇଂ.ବିଶ୍ୱଜିତ ବଡୁ ପ୍ରମୁଖ ଉପସ୍ଥିତ ରହି ଗେଟଗୁଡିକ ଖୋଲିଥିଲେ । ଆଜି ସକାଳୁ ଡେମରେ ବାରମ୍ବାର ସାଇରନ ବଜାଯାଇ ଲୋକଙ୍କୁ ସତର୍କ କରାଯାଇଥିଲା । ବନ୍ୟା ନିସ୍କାସନ ଦେଖିବାକୁ ହଜାର ହଜାର ସଂଖ୍ୟାରେ ଲୋକ ଡେମରେ ଠୁଳ ହୋଇଥିଲେ । ଠିକ ଅପରାହ୍ନ ୧ଟା୩୦ରେ ୬ନମ୍ବର ଗେଟର ସ୍ୱିଚଚିପି ଅତିରିକ୍ତ ଜିଲ୍ଲାପାଳ ପବିତ୍ରକୁମାର ବେହେରା ଶୁଭାରମ୍ଭ କରିଥିଲେ । ପରେ ପରେ ୫,୭ ଓ ୮ ନମ୍ବର ଗେଟକୁ ମଧ୍ୟ ଖୋଲାଯାଇ ଜଳନିସ୍କାସନ ପ୍ରକ୍ରୀୟା ଚାଲିଛି । ଏବେ ଡେମରେ ୨୦୦.୫୭ ମିଟର ପାଣି ସଂରକ୍ଷିତ ଥିବା ବେଳେ ୪ଟି ଗେଟରେ ୫୦୦.୫ କ୍ୟୁମେକ ଜଳ ନିସ୍କାସିତ ହେଉଛି । ଡେମର ଜଳଧାରଣ କ୍ଷମତା ୨୦୬ ମିଟର ରହିଛି । ଚଳିତବର୍ଷ ଡେମରେ ସଂପୂର୍ଣ୍ଣ ଜଳଧାରଣ ପର୍ଯ୍ୟନ୍ତ ଜଳସଂରକ୍ଷଣ କରାଯିବ । କିନ୍ତୁ ଡେମରେ ବୁଡିବାକୁ ଥିବା କୁମିଆଁପାଲିର ଆଦିବାସୀବସ୍ତିର ୮୪ ଟି ପରିବାର ଏବେ ମଧ୍ୟ ଗାଁରେ ରହିଯାଇଛନ୍ତି । ଗତ ୧୦ଦିନ ହେଲା ସେମାନେ ଆନ୍ଦୋଳନ କରି ତାଙ୍କୁ ଉଚିତ କ୍ଷତିପୂରଣ ଓ ଥଇଥାନ ଦାବି କରିଥିଲେ । ପ୍ରଶାସନିକ ଅଧିକାରୀମାନେ ଗାଁରେ ପହଞ୍ଚି ତାଙ୍କ ସହିତ ଆଲୋଚନା କରିଥିଲେ ହେଁ ସଫଳ ହୋଇନଥିଲେ । ତାଙ୍କର ଘରଗୁଡିକର ନୂଆ ସର୍ଭେକରିବାକୁ ପ୍ରଶାସନ ପ୍ରତିଶୃତି ଦେବାପରେ ସେମାନେ ଗାଁରୁ ବିସ୍ଥାପିତ ହେବାକୁ ମଙ୍ଗିଥିଲେ । ତେବେ ଗତକାଲି ଉପରମୁଣ୍ଡରେ ପ୍ରବଳ ବର୍ଷାଫଳରେ ଡେମକୁ କ୍ଷୀପ୍ରଗତିରେ ଜଳପ୍ରବେଶ କରୁଛି । ଏବେ ସେକେଣ୍ଡପ୍ରତି ପ୍ରାୟ ୭ଲକ୍ଷ ଲିଟର ବନ୍ୟାପାଣି ଡେମକୁ ପଶୁଛି । କିଛି ସମୟ ପରେ ଏହା ଆହୁରି ବଢିବ । ତେଣୁ କୁମିଆଁପାଲିବାସୀଙ୍କୁ ବିସ୍ଥାପିତ କରିବାକୁ ପ୍ରଶାସନର ଏକ ଟିମ ଯାଇ ଗାଁରେ ରହିଛନ୍ତି ଓ ଏପଟେ ଡେମର ଗେଟ ଖୋଲାଯାଇ ଜଳନିସ୍କାସନ କରାଯାଉଛି । ଗତକାଲି କୁମିଆଁପାଲିର ତେତେଲପଡାରେ ଥିବା ୨୦ଟି ଘରକୁ ପାଣି ଫଶିଯାଇଥିଲା । ସେମାନଙ୍କର ଗାଁର ଉପରମୁଣ୍ଡକୁ ନିଆଯାଇ ରଖାଯାଇଥିଲା । ରାତିରେ କୁମିଆଁପାଲିର ସୁବନ ବରିହା ଓ ଅନ୍ୟକିଛି ଲୋକ ଘରେ ଶୋଇଥିବା ବେଳେ ହଠାତ ଡେମରେ ଠେଲାପାଣି ତାଙ୍କ ଘରକୁ ପଶିଯାଇଥିଲା । ସ୍ଥାନୀୟଲୋକେ ତାଙ୍କୁ ସୁରକ୍ଷିତ ଭାବରେ ଉଦ୍ଧାର କରିଥିଲେ । କୁମିଆଁପାଲିର ବିସ୍ଥାପିତଙ୍କ ପାଇଁ ନିର୍ମାଣ କରାଯାଇଥିବା କପିଲବାହାଲର ଥଇଥାନ କେନ୍ଦ୍ରକୁ ଲୋକଙ୍କୁ ନେବାକୁ ଚେଷ୍ଟା ଚାଲିଛି ବୋଲି ଲୋୟରସୁକତେଲ ପ୍ରକଲ୍ପର ମୁଖ୍ୟନିର୍ମାଣଯନ୍ତ୍ରୀ ଇଂ.ସୁରେନ୍ଦ୍ର ଭୋଇ କହିଛନ୍ତି ।