27-May-2026

ତରଭା(କପିଳାସ ସେଠ୍): ତରଭା ବିଦ୍ୟୁତ ଗ୍ରୀଡ଼ ଅଞ୍ଚଳରେ ବିଦ୍ୟୁତ ସେବା ଓପିଟିସିଏଲ ନିରବିଛିନ୍ନ ଭାବରେ ବିଦ୍ୟୁତ ଯୋଗାଇ ଦେବାରେ ବିଫଳ ହୋଇଛି I ମଙ୍ଗଳବାର ସକାଳ ୬ ଘଣ୍ଟାରୁ ତରଭା ସହର ସମେତ ବିଭିନ୍ନ ଅଞ୍ଚଳରେ ଅପରାହ୍ନ ୨ ଟା ପର୍ଯ୍ୟନ୍ତ ଦୀର୍ଘ ୮ ଘଣ୍ଟା ଧରି ବିଦ୍ୟୁତ ଯୋଗାଣ ବନ୍ଦ ରହି ଥିଲା I ଫଳରେ ସହରବାସୀଙ୍କ ପାଇଁ  ଜଳ ଯୋଗାଣ ସମ୍ପୂର୍ଣ୍ଣ ଭାବରେ ବନ୍ଦ ରହିଥିଲା I  ପାନୀୟ ଜଳ ସଙ୍ଗେ ବିଭିନ୍ନ କାର୍ଯ୍ୟ ନେଇ ପି.ଏଚ.ଡି. ପାଣି ଉପରେ ନିର୍ଭର କରୁଥିବା ବ୍ୟକ୍ତି, ପରିବାର ନାହିଁ ନ ଥିବା ଅସୁବିଧା ରସମ୍ମୁଖୀନ ହୋଇ ଥିବାର ଜଣାଯାଇଛି I ଅନ୍ୟ ପକ୍ଷରେ ବିଦ୍ୟୁତ ବନ୍ଦ  ଯୋଗୁଁ ସମସ୍ତ ସରକାରୀ କାର୍ଯ୍ୟ ବାଧାପ୍ରାପ୍ତ ହୋଇଥିଲା I ସୂଚନାଯୋଗ୍ୟ ଯେ ପ୍ରତିଦିନ କିଛି ନା କିଛି ମରାମତି ନାମରେ ଘଣ୍ଟା ଘଣ୍ଟା ବିଦ୍ୟୁତ ଯୋଗାଣ ବନ୍ଦକରି ଗ୍ରାହକ ଓ ସାଧାରଣ ଜନତାଙ୍କୁ ରୌଦ୍ରତାପ ରୁ ଯନ୍ତ୍ରଣାରେ କଲବଳ କରୁଛି ଓପିଟିସିଏଲ ସଂସ୍ଥା I  ତରଭା ଅଞ୍ଚଳରେ ବର୍ତ୍ତମାନ ସଦାସର୍ବଦା ୪୪ ରୁ ୪୫ଡିଗ୍ରୀ ତାପମାତ୍ରା ରହୁଛି I ତା ସାଙ୍ଗକୁ ଗୁଲଗୁଲି, ଝାଞ୍ଜି ପବନ ଯୋଗୁଁଜନଜୀବନ ଅସ୍ତବ୍ୟସ୍ତ ହୋଇ ପଡିଛି I ଦିନ ୧୦ ଟା ସମୟରୁ ରାସ୍ତାଘାଟ, ଦୋକାନବଜ଼ାର ଜନଶୂନ୍ୟ ହୋଇ ପଡୁଛି I ଫଳରେ ବ୍ୟବସାୟୀ ବାଣିଜ୍ୟ ଠପ ହୋଇପଡୁଛି I ସୋମବାର ସନ୍ଧ୍ୟା ରେ ତରଭା ବିଦ୍ୟୁତ ବିଭାଗ ପକ୍ଷରୁ ମାଇକ ଯୋଗେ (ଡାକବାଜି ଯନ୍ତ୍ର) ସକାଳ ୬ ଘଣ୍ଟା ଟା ରୁ ୯ ଟା ପର୍ଯ୍ୟନ୍ତ ୧୩୨ କେ.ଭି  ଓ ତରଭା ଜି.ଏସ.ଏସ. ରକ୍ଷଣାବେକ୍ଷଣ ପାଇଁ ସହର ରେ  ବିଦ୍ୟୁତ ଯୋଗାଣ ବନ୍ଦ ରହିବ ବୋଲି ଘୋଷଣା କରା ଯାଇଥିଲା I ହେଲେ ପୂର୍ବାହ୍ନ ୧୦.୪୦ସମୟରେ ସୋନପୁର ବିଭାଗୀୟ ଏସ ଡିଓ ମୋବାଇଲ ଗ୍ରୁପ ମାଧ୍ୟମରେ ସୂଚନା ଦେଲେ ରକ୍ଷଣାବେକ୍ଷଣ କାର୍ଯ୍ୟ ଶେଷ ହୋଇ ନଥିବା ରୁ ଆହୁରି ଅଧିକ ୨ ଘଣ୍ଟା ପରେ ବିଦ୍ୟୁତ ଯୋଗାଣ ହେବ ବୋଲି ସୂଚନା ଦିଆ ଯାଇଥିଲା I କେତେବେଳେ ବିଦ୍ୟୁତ ଯୋଗାଣ ହେବ ବୋଲି ଯୋଗାଯୋଗ ପରେ ପରବର୍ତ୍ତୀ ସମୟରେ  ୧୧.୫୦ଟା ରେ ବିଦ୍ୟୁତଯୋଗାଣ ପାଇଁ ଓ ପି ଟି ସି ଏଲ. ପକ୍ଷରୁ କୌଣସି ସୂଚନା ଦିଆଯାଇ ନାହିଁ ବୋଲି  ଖବର ଦିଆଯାଇଥିଲା। ରୌଦ୍ର ତାପରେ ଭାଜି ହେଉଥିବା ଅଞ୍ଚଳବାସୀଙ୍କୁ ଦୀର୍ଘ ୮ ଘଣ୍ଟା ବ୍ୟବଧାନ ପରେ ଦିନ ୨ ଘଣ୍ଟା ୧୫ ମିନିଟରେ ଅଞ୍ଚଳବାସୀଙ୍କ ପାଇଁ ବିଦ୍ୟୁତ ଯୋଗାଣ ହୋଇଥିଲା I  ବିଦ୍ୟୁତ ଯୋଗାଣ ହେବା ପରେ ଅଞ୍ଚଳବାସୀ ସାମାନ୍ୟ ଆଶ୍ବସ୍ତି ପାଇଥିଲେ।