03-May-2026

ରେଙ୍ଗାଲିକ୍ୟାମ୍ପ(ଆକାଶ ମିଶ୍ର): ଆଜି ଅତାବିରା ସାମ୍ବାଦିକ ମାନଙ୍କ ପକ୍ଷରୁ ସାମ୍ବାଦିକତା ଜଗତର ଆଦ୍ୟ ପୁରୁଷ ଦେବର୍ଷି ନାରଦଙ୍କ ଜନ୍ମ ଜୟନ୍ତୀ ଅତାବିରା ୫୩ ନମ୍ବର ଜାତୀୟ ରାଜପଥ କଡ଼ରେ ଅବସ୍ଥିତ ଅଗ୍ରସେନ୍ ଭବନ ପରିସରରେ ଅତି ଶୃଙ୍ଖଳିତ ଓ ଆଧ୍ୟାତ୍ମିକ ପରିବେଶ ମଧ୍ୟରେ ପାଳିତ ହୋଇଯାଇଛି। ସାମ୍ବାଦିକ ମନୀଷ ଶର୍ମାଙ୍କ ସଭାପତିତ୍ବରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଦେବର୍ଷି ନାରଦଙ୍କ ତୈଳ ଚିତ୍ରରେ ପୂଜାର୍ଚ୍ଚନା ଓ ପୁଷ୍ପମାଲ୍ୟ ଅର୍ପଣ ପୂର୍ବକ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା। ସଭାରେ ଉପସ୍ଥିତ ସାମ୍ବାଦିକମାନେ ଦେବର୍ଷି

ନାରଦଙ୍କ ଜୀବନ ଶୈଳୀ ଓ ତାଙ୍କ ସମ୍ବାଦ ପରିବେଷଣର କଳା ଉପରେ ଆଲୋକପାତ କରିଥିଲେ। ତିନି ଲୋକରେ ଦେବତା ଙ୍କ ଠାରୁ ଆରମ୍ଭ କରି ଦାନବଙ୍କ ପର୍ଯ୍ୟନ୍ତ ସମ୍ବାଦ ପହଞ୍ଚାଇବା ଏବଂ ପ୍ରତିଟି ଖବର ପଛରେ ବିଶ୍ୱ କଲ୍ୟାଣର ଉଦ୍ଦେଶ୍ୟ ରଖିବା ହିଁ ନାରଦଙ୍କ ବୈଶିଷ୍ଟ୍ୟ ଥିଲା। ଆଜିର ସମୟରେ ସାମ୍ବାଦିକତା ମଧ୍ୟ ସେହିପରି ସର୍ବଜନହିତାୟ ଓ ସମାଜର ମଙ୍ଗଳ ପାଇଁ ଉଦ୍ଦିଷ୍ଟ ହେବା ଆବଶ୍ୟକ ବୋଲି ମତ ପ୍ରକାଶ ପାଇଥିଲା।
ନାରଦଙ୍କ ଆଦର୍ଶରେ ଅନୁପ୍ରାଣିତ ହୋଇ ସମ୍ବାଦ ଗ୍ରହଣ ଓ ପ୍ରକାଶନ କ୍ଷେତ୍ରରେ ନିରପେକ୍ଷତା,ନିଃସ୍ୱାର୍ଥପରତା ଓ ସଠିକତା ଏହି ତିନୋଟି ମୁଖ୍ୟ ସ୍ତମ୍ଭକୁ ପାଥେୟ କରି ନିଜର କର୍ତ୍ତବ୍ୟ ସମ୍ପାଦନ କରିବା ପାଇଁ ଉପସ୍ଥିତ ସମସ୍ତ ସାମ୍ବାଦିକ ବନ୍ଧୁ ଶପଥ

ପାଠ କରିଥିଲେ। କାର୍ଯ୍ୟକ୍ରମର ଆରମ୍ଭରେ ସାମ୍ବାଦିକ ନବୀନ ଦାଶ ଉଦ୍ଦେଶ୍ୟ ଜ୍ଞାପନ କରିଥିବା ବେଳେ, ସାମ୍ବାଦିକ ଆକାଶ ମିଶ୍ର ମଞ୍ଚ ପରିଚାଳନା କରିଥିଲେ। ଶେଷରେ ଖିରୋଜ ନାଏକ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। ଅତାବିରାର ଅଗ୍ରଣୀ ସାମ୍ବାଦିକମାନଙ୍କ ଏହି ପ୍ରୟାସ ଅଞ୍ଚଳରେ ଏକ ଆଧ୍ୟାତ୍ମିକ ଓ ବୈଦ୍ଧିକ ବାତାବରଣ ସୃଷ୍ଟି କରିଛି। ଏହି କାର୍ଯ୍ୟକ୍ରମରେ ସାମ୍ବାଦିକ ରାଜେଶ ପଣ୍ଡା, ମୋହନ ସାହୁ ,ପବିତ୍ର ମେହେର, ଜନକ ଦାଶ ପ୍ରମୁଖ ଉପସ୍ଥିତ ରହି ନିଜ ନିଜର ମତ ପ୍ରକାଶ କରିବା ସହ ସକ୍ରିୟ ସହଯୋଗ କରିଥିଲେ ।