25-Apr-2026

କଟକ(ତପନ ମହାନ୍ତି) : ବିଶ୍ୱ ପ୍ରାଣିଚିକିତ୍ସା ଦିବସ ୨୦୨୬ ଅବସରରେ ଆଜି ଓଡ଼ିଶା ରାଜ୍ୟ ନୌବାଣିଜ୍ୟ ସଂଗ୍ରହାଳୟ ପରିସରରେ ଜିଲ୍ଲାସ୍ତରୀୟ ପ୍ରାଣିଚିକିତ୍ସା ଦିବସ ଅନୁଷ୍ଠିତ ହୋଇଯାଇଛି। ଜିଲ୍ଲାପାଳ ଏବଂ ଜିଲ୍ଲା ମାଜିଷ୍ଟ୍ରେଟ ଶ୍ରୀ ଦତ୍ତାତ୍ରୟ ଭାଉସାହେବ ଶିନ୍ଦେ ଉତ୍ସବକୁ ଉଦ୍ଘାଟନ କରି କ୍ଲଷ୍ଟର ଆଧାରିତ ପ୍ରାଣିପାଳନ ଓ ରୋଜଗାର ସୃଷ୍ଟି ଉପରେ ଗୁରୁତ୍ୱ ଦେଇଥିଲେ। ସେ କହିଥିଲେ ଯେ, ଏକ ସ୍ଥାନରେ ଗୋଷ୍ଠୀ ଆଧାରରେ କ୍ଷୀର ଉତ୍ପାଦନ, ଛେଳି, ଘୁଷୁରି ଓ କୁକୁଡ଼ା ପାଳନ କରାଯାଇପାରିଲେ ସରକାରୀ ସହାୟତା ସହଜରେ ମିଳିପାରିବ। ଏହା ସହିତ ଚାଷୀମାନଙ୍କ ମଧ୍ୟରେ ସଚେତନତା ବୃଦ୍ଧି କରାଯାଇ ତାଙ୍କର ଆୟ ବୃଦ୍ଧି କରିବାକୁ ସେ ଆହ୍ୱାନ ଜଣାଇଥିଲେ।

କାର୍ଯ୍ୟକ୍ରମରେ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ ଡା. ସୁଶାନ୍ତ କୁମାର ନାୟକ, କାର୍ଯ୍ୟନିର୍ବାହୀ ଯନ୍ତ୍ରୀ (କୃଷି) ଇଂ. ପ୍ରଶାନ୍ତ କୁମାର ଜେନା ଓ ଉପଖଣ୍ଡ ପ୍ରାଣୀ ଚିକିତ୍ସା ଅଧିକାରୀ ଡା. ଅଭିମନ୍ୟୁ ସାହୁ ଉପସ୍ଥିତ ଥିଲେ। ଏହି ବର୍ଷର ବିଷୟ “ଉତ୍ତମ ଖାଦ୍ୟ ଓ ସ୍ୱାସ୍ଥ୍ୟ ପାଇଁ ପ୍ରାଣିଚିକିତ୍ସା” ଉପରେ

ଆଲୋଚନା କରାଯାଇଥିଲା।

ଏହି ଅବସରରେ ୨୦୨୫-୨୬ ଆର୍ଥିକ ବର୍ଷରେ କଟକ ଜିଲ୍ଲାର ନରସିଂହପୁର ବ୍ଲକ ପ୍ରାଣୀ ସମ୍ପଦ ସେବା ଓ ବିଭିନ୍ନ ଯୋଜନାର ସଫଳ ରୂପାୟଣ ପାଇଁ ରାଜ୍ୟରେ ସର୍ବଶ୍ରେଷ୍ଠ ବ୍ଲକ ଭାବେ ଚୟନ ହୋଇଥିବାରୁ ବ୍ଲକ ପ୍ରାଣୀ ଚିକିତ୍ସା ଅଧିକାରୀ ଡା. ନୀହାର ରଞ୍ଜନ ମିଶ୍ର ସହ ଅନ୍ୟ ପ୍ରାଣୀ ଚିକିତ୍ସକ ଓ ପ୍ରାଣୀଧନ ନିରୀକ୍ଷକମାନଙ୍କୁ ସମ୍ମାନିତ କରାଯାଇଥିଲା।