14-Mar-2026

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ ) ସୁବର୍ଣ୍ଣପୁର ପୋଲିସ କୌଣସି ସୂତ୍ରରୁ ସୂଚନା ପାଇ ଜିଲ୍ଲାର ଉଲୁଣ୍ଡା ବ୍ଲକ ସିଂହାସନୀ ଜଙ୍ଗଲ ଜମିରେ ଅଫିମ ଚାଷ ହୋଇଥିବା ଦେଖିବାକୁ ପାଇଛି । ଜିଲ୍ଲାରେ ପ୍ରଥମ ଥର ପାଇଁ ଧରାଯାଇଥିବା ସିଂହାସନୀ ସଂରକ୍ଷିତ ଜଙ୍ଗଲର ଅରଖମୁଣ୍ଡା ଠାରେ ୧ ଏକର ରୁ କମ ଜମିରେ ଏହି ଅଫିମ ଗଛ ଲଗାଯାଇଥିଲା। ଏଥିରେ ସ୍ଥାନୀୟ ଲୋକ ସାମିଲ ଥିବା ନେଇ ଏସ୍‌ପି ନାରାୟଣ ନାୟକ ଏକ ସାମ୍ବାଦିକ ସମ୍ମିଳନୀରେ ଏହି ସମ୍ପର୍କରେ ସମସ୍ତ ସୂଚନା ଦେଇଛନ୍ତି । ଏସପି ଶ୍ରୀ ନାୟକ ଙ୍କ ସହିତ ପୋଲିସ, ଅବକାରୀ ଓ ବନ ବିଭାଗର ଟିମ୍ ଜଙ୍ଗଲ ଭିତରେ ଖୋଜିବା ପରେ ୨ଟି ପ୍ଲଟରେ ଅଫିମ ଗଛ ଲାଗିଥିବା ଦେଖିବାକୁ ପାଇଥିବା ବେଳେ ଗଛରୁ ପ୍ରାୟତଃ ରସ ସଂଗ୍ରହ ସରିଥିଲା ଏବଂ କେବଳ ଫଳଥିବା ଦେଖିବାକୁ ମିଳିଥିଲା। ୨ ଟି ପ୍ଲଟ ରେ ଚାଷ ହୋଇଥିବା ଅଫିମ କିଆରୀକୁ ନିକଟସ୍ଥ ୨ ଟି ଘରୁ ବିଦ୍ୟୁତ୍ ସଂଯୋଗ କରାଯାଇଥିଲା ଏବଂ ନାଳରୁ ପାଣି ଦିଆଯାଉଥିଲା । ତଦନ୍ତ ସମୟରେ ଜଣେ ଘର ମାଲିକ ସମୁଏଲ୍ ଲୁଗୁନ (୨୪) କୁ ଗିରଫ କରାଯାଇଥିବା ବେଳେ ସେ ଅନ୍ୟ ୨ ଜଣଙ୍କ ସଂପୃକ୍ତି ଅଫିମ ଚାଷ ରେ ଥିବା ପ୍ରକାଶ କରିଥିବା ସୂଚନା ଦେଇଛନ୍ତି ଏସପି। ମାଜିଷ୍ଟ୍ରେଟ୍ ତଥା ବୀରମହାରାଜପୁର ଉପଜିଲାପାଳଙ୍କ କାର୍ଯ୍ୟାଳୟର ସହକାରୀ ଜିଲାପାଳ ଙ୍କ ଉପସ୍ଥିତିରେ ୨ ଟି ପ୍ଲଟରୁ ବନ ବିଭାଗ ଓ ଅବକାରୀ ବିଭାଗ କର୍ମଚାରୀ ମାନେ ଅଫିମ ଗଛ ଗଣନା କରିବାରୁ ୧୫,୩୧୮ ଟି ଗଛ ଥିବା ଜଣାପଡିଥିଲା । ପରେ ମାଜିଷ୍ଟ୍ରେଟ୍‌ଙ୍କ ଉପସ୍ଥିତିରେ ଗଛ ଗୁଡ଼ିକୁ କାଟି ନିଆଁ ଲଗାଇ ନଷ୍ଟ କରାଯାଇଥିଲା । ନଷ୍ଟ କରଯାଇଥିବା ଅଫିମ ଗଛର ମୂଲ୍ୟ ସରକାରୀ ହିସାବ ରେ ୭ କୋଟି ୬୫ ଲକ୍ଷ ୯୦ ହଜାର ଟଙ୍କା ଆକଳନ କରାଯାଇଛି। ସୁବର୍ଣ୍ଣପୁର ଏସପି ନାରାୟଣ ନାୟକ ଙ୍କ ନେତୃତ୍ବରେ ବୀରମହାରାଜପୁର ଏସ୍‌ଡିପିଓ ହେମନ୍ତ ରାଓ, ଉଲୁଣ୍ଡା ଆଇଆଇସି ଲିଙ୍ଗରାଜ ସେଠୀ, ଙ୍କ ସହ ପୋଲିସ ଟିମ୍, ଉଲୁଣ୍ଡା ବନାଞ୍ଚଳ ଅଧିକାରୀ ଦେବରାଜ ଛତ୍ରିଆଙ୍କ ସହ ବନ ବିଭାଗ ଦଳ ଏବଂ ଅବକାରୀ ଇନ୍ସପେକ୍ଟର ଗୋବିନ୍ଦ ନାଏକ ପ୍ରମୁଖ ଏବଂ ଟିମ୍ ଏହି ଅଭିଯାନରେ ସାମିଲ ହୋଇଥିଲେ। ଏହି ସମ୍ପର୍କରେ ଉଲୁଣ୍ଡା ଥାନାରେ କେସ ନଂ ୪୫/ ୧୧.୦୩.୨୬ ଏନଡିପିଏସ ଆକ୍ଟରେ ଏକ ମାମଲା ରୁଜୁ ହୋଇଛି । କିନ୍ତୁ ଏହି ବିଷୟରେ ସ୍ଥାନୀୟ ଉଲୁଣ୍ଡା ବନାଞ୍ଚଳ ଅଧିକାରୀ କେମିତି ଜାଣି ପାରିଲେ ନାହିଁ ଜନସାଧାରଣରେ ଚର୍ଚ୍ଚା ହେଉଛି। ଡିସେମ୍ବର ରୁ ଆରମ୍ଭ ହୋଇ ଫେବୃଆରୀ ମାସ ଭିତରେ ଏହି ଅଫିମ ଚାଷ ଅମଳ ହେଉଥିବା ବିଷୟ ସୂଚନା ଦେଇ ଛନ୍ତି  ଓ ଅନ୍ୟ ୩ ଅଭିଯୁକ୍ତଙ୍କୁ ମଧ୍ୟ ଗିରଫ କରାଯିବା ପାଇଁ ପୋଲିସ ତଦନ୍ତ ଚଳାଇଥିବା କହିଛନ୍ତି ଏସପି ଶ୍ରୀ ନାୟକ।