13-Mar-2026

ବଲାଙ୍ଗୀର (ପ୍ରେରଣା ଖବର): ବଲାଙ୍ଗୀର ଜିଲ୍ଲାର ଯୁବକ/ଯୁବତୀମାନେ ବିଭିନ୍ନ କ୍ରୀଡାକ୍ଷେତ୍ରରେ ଜାତୀୟସ୍ତରରେ ଉଲ୍ଲେଖନୀୟ ସଫଳତା ପାଉଛନ୍ତି । ତେଣୁ ସେମାନଙ୍କୁ ଆହୁରି ଆଗକୁ ନେବାକୁ କ୍ରୀଡାଭିତ୍ତିଭୂମୀର ଆବଶ୍ୟକତା ରହିଛି । ସରକାର ଏଥିପାଇଁ ପଦକ୍ଷେପ ନେଉଛନ୍ତି କି ଓ ବଲାଙ୍ଗୀରରେ ଜାତୀୟସ୍ତରୀୟ ହାଫମାରାଥନ କରିବେ ବୋଲି ବିଧାନସଭା ରେ ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓ ପ୍ରଶ୍ନ କରିଛନ୍ତି । ଏହାର ଉତ୍ତରରେ କ୍ରୀଡା ଓ ଯୁବବ୍ୟାପାର ବିଭାଗର ମନ୍ତ୍ରୀ ସୁରଜ ସୂର୍ଯ୍ୟବଂଶୀ କହିଛନ୍ତି ଯେ, ରାଜ୍ୟ ସରକାର କ୍ରୀଡାଭିତ୍ତିଭୂମୀ ନିର୍ମାଣ ପାଇଁ ବ୍ଲକସ୍ତରୀୟ ଷ୍ଟାଡିୟମ ନିର୍ମାଣ ପାଇଁ ୪,୧୨୪ କୋଟି ଟଙ୍କାର ବଜେଟ ଧରିଛନ୍ତି । ବଲାଙ୍ଗୀର ଜିଲ୍ଲାରେ ଖପ୍ରାଖୋଲରେ ୧୬କୋଟି ୪୨ଲକ୍ଷ୩୬ ହଜାର ଟଙ୍କା ଓ ପାଟଣାଗଡଠାରେ ୧୯କୋଟି୮୬ଲକ୍ଷ ୪୬ ହଜାର ଟଙ୍କାର ଅନୁଦାନରେ ଦୁଇଟି ମଲ୍ଟିପର୍ପୋସ ଷ୍ଟାଡିୟମ ନିର୍ମାଣ କରିବାକୁ ଯାଉଛନ୍ତି । ଅନ୍ୟ ବ୍ଲକଗୁଡିକରେ ମଧ୍ୟ ଜମି ଖୋଜାଚାଲିଛି । ଏହା ସହିତ ଗ୍ରାମାଞ୍ଚଳରେ ୧୪ଟି ସ୍ଥାନ ଓ ସହରାଞ୍ଚଳରେ ୫ଟି ସ୍ଥାନରେ ରେ ୨୦ଲକ୍ଷ ଟଙ୍କା ଲେଖାଏଁ ଖର୍ଚ୍ଚରେ ଖେଳପଡିଆ ଉନ୍ନତିକରଣ କାମ କରାଯାଇଛି । ବ୍ଲକସ୍ତରୀୟ ଷ୍ଟାଡିୟମରେ ଫୁଟବଲ, କ୍ରିକେଟ, ଅଥେଲେଟିକ ଟ୍ରାକ,ଭଲିବଲକୋର୍ଟ,ଖୋଖୋ ଓ କବାଡି କୋର୍ଟ,(ବେଡମିଣ୍ଟନ, ଟେବୁଲଟେନିସ, ୟୋଗା,ଜିମ) ପାଇଁ ଇଣ୍ଡୋରଷ୍ଟାଡିୟମ,କମନ ଫେସିଲିଟି(ଚେଞ୍ଜିଂରୁମ,ୱାସରୁମ),ବାଉଣ୍ଡରିୱାଲ ଓ ଗେଟ ରହିବ । ବଲାଙ୍ଗୀର ଆରଏନସିଂଦେଓ ସ୍ପୋର୍ଟସ କମ୍ପେ୍ଲକ୍ସରେ (ସ୍ପୋର୍ଟସ ହଷ୍ଟେଲ, ସ୍ୱିମିଂପୁଲ, ଫୁଟବଲ ଫିଲ୍ଡ, କ୍ଲେଅଥେଲେଟିକ ଟ୍ରାକ,ଲନବଲକୋର୍ଟ,ଫେସିଲିଟି ବିଲଡିଂ ଇତ୍ୟାଦି) ବ୍ୟବସ୍ଥା କରାଯାଇଥିବା ବେଳେ କଣ୍ଟାବାଞ୍ଜି ଏନଏସିରେ ୭କୋଟି୫୭ଲକ୍ଷ ଟଙ୍କା ଓ ତୁଷୁରା ଏନଏସିରେ ୬କୋଟି ୩୫ଲକ୍ଷ ୩୧ ହଜାର ଟଙ୍କାର ଅନୁଦାନରେ  ମଲଟିପର୍ପୋସ ଇଣ୍ଡୋରଷ୍ଟାଡିୟମ ଚାଲୁରହିଛି  ବୋଲି ମନ୍ତ୍ରୀ ସୂର୍ଯ୍ୟବଂଶୀ ଉତ୍ତର ରଖିଛନ୍ତି । ତେବେ ଚଳିତବର୍ଷ ବଲାଙ୍ଗୀର ଜିଲ୍ଲାରେ ଜାତୀୟସ୍ତରୀୟ ହାଫମାରାଥନ କରାଇବାର କୌଣସି ପ୍ରସ୍ତାବ ନାହିଁ ବୋଲି ମନ୍ତ୍ରୀ ଉତ୍ତର ରଖିଛନ୍ତି ।
  ଠିକ ସେହିପରି କେନ୍ଦ୍ରୀୟବିଦ୍ୟାଳୟ ଗୁଡିକର ବିଲଡିଂନିର୍ମାଣ ନେଇ ଗଣଶିକ୍ଷାମନ୍ତ୍ରୀ ବିଭାଗକୁ ହୋଇଥିବା କଳିକେଶଙ୍କର ପ୍ରଶ୍ନର ଉତ୍ତରରେ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ସୂଚନା ଦେଇଛନ୍ତି ଯେ,ଟିଟିଲାଗଡରେ ରେଳବିଭାଗ ପକ୍ଷରୁ ୮ଏକର ଜମି ହସ୍ତାନ୍ତର ପ୍ରକ୍ରୀୟାଚାଲିଛି ଓ ପ୍ରଥମପର୍ଯ୍ୟାୟରେ ୨୦ଲକ୍ଷ ଟଙ୍କାର ଅନୁଦାନ ଦିଆଯାଇଛି । ଠିକ ସେହିପରି ପାଟଣାଗଡରେ ୧୦ଏକର ଜମି ଚିହ୍ନଟ କରାଯାଇ ହସ୍ତାନ୍ତର ପ୍ରକ୍ରିୟାଚାଲିଛି ଓ ସିପିଡବ୍ଲୁଡି ବିଭାଗକୁ ଡିଡିଆର ମଗାଯାଇଛି ବୋଲି ମନ୍ତ୍ରୀ ଶ୍ରୀ ଗଣ୍ଡ ଉତ୍ତର ରଖିଛନ୍ତି । ସେହିପରି ବଲାଙ୍ଗୀର ଜିଲ୍ଲାର ଦିବ୍ୟାଙ୍ଗଜନଙ୍କ ଭତ୍ତାପ୍ରସଙ୍ଗରେ ସାମାଜିକ ସୁରକ୍ଷା ଓ ଦିବ୍ୟାଙ୍ଗ ସଶକ୍ତିକରଣ ବିଭାଗକୁ କରାଯାଇଥିବା ପ୍ରଶ୍ନରେ ବିଭାଗୀୟମନ୍ତ୍ରୀ ନିତ୍ୟାନନ୍ଦ ଗଣ୍ଡ ଉତ୍ତର ରଖିଛନ୍ତି ଯେ, ବଲାଙ୍ଗୀର ଜିଲ୍ଲାରେ ୮୦ବର୍ଷରୁ ଉର୍ଦ୍ଧ୍ୱ ୨୯୮ଜଣ ଙ୍କର ଆବେଦନ ଆସିଥିଲା ସେଥିରୁ ୨୦ଜଣଙ୍କର ଭତ୍ତା ମଞ୍ଜୁର ହୋଇଛି । ଠିକସେହିପରି ୮୦% ରୁ ଅଧିକ ଦିବ୍ୟାଙ୍ଗ ଥିବା ୬୧୧ ଜଣଙ୍କର ଆବେଦନ ଆସିଥିଲା ଓ ସେଥିରୁ ୩୮୪ ଜଣଙ୍କର ଭତ୍ତା ମଞ୍ଜୁର ହୋଇଥିବା ଉତ୍ତର ମିଳିଛି ।