15-Feb-2026

ସୋନପୁର(ପ୍ରେରଣା ଖବର)-ସୋନପୁର ଜିଲ୍ଲାରେ ଲୁଟତରାଜ ବଢିଚାଲିଛି । ଥାନାମାନଙ୍କରେ ଥିବା ପୋଲିସମାନଙ୍କର ନିସ୍କ୍ରିୟତାର ସୁଯୋଗ ନେଇ ନିଶାଖୋରମାନେ ଅପରାଧିକ କାର୍ଯ୍ୟାକଳାପ ବଢାଇଚାଲିଛନ୍ତି । ପୂର୍ବରୁ ଅନେକଗୁଡିଏ ମୋଟରସାଇକେଲ ଲୁଟ ଘଟଣାରେ ପୋଲିସ ଅପରାଧିଙ୍କୁ ଧରିବାରେ ବିଫଳ ହୋଇଥିଲା । ଏବେ ଦିନଦ୍ୱିପହରରେ ଜଣେ କୋର୍ଟକର୍ମଚାରୀଙ୍କୁ ଭୁଜାଲି ଦେଖାଇ ସ୍କୁଟିଲୁଟ୍ ହୋଇଥିବା ଜଣାପଡିଛି । ସେପଟେ ଘଟଣାର ୪୮ ଘଣ୍ଟାପରେ ମଧ୍ୟ ସୋନପୁର ପୋଲିସ ଜଣେ ମଧ୍ୟ ଅଭିଯୁକ୍ତକୁ ଧରିବାରେ ସଫଳ ହୋଇନାହିଁ ।
   ଅଭିଯୋଗରୁ ଜଣାପଡିଛି ଯେ,ସୋନପୁର ଜିଲ୍ଲା କୋର୍ଟରେ କିରାଣୀଥିବା ମେଣ୍ଡା ନିକଟସ୍ଥ ରାଜପାଲି ଗ୍ରାମର ମହେଶ ପଣ୍ଡା ଶୁକ୍ରବାର ଦିନ କୋର୍ଟକାମ ସାରି ଅର୍ଜୁନପୁର-ବୁର୍ଡା ରାସ୍ତାରେ ନିଜ ଗାଁକୁ ଏକାକି ଫେରୁଥିଲେ । ସମୟ ଅପରାହ୍ନ ପ୍ରାୟ ୫.୧୫ ସମୟରେ ଅର୍ଜୁନପୁର-ବୁର୍ଡା ରାସ୍ତାର ଧଉରାଖମନ ଛକ ପାଖରେ ନିଛାଟିଆ ସ୍ଥାନରେ ତିନିଜଣ ଯୁବକ ମହେଶଙ୍କୁ ଭୁଜାଲି ଦେଖାଇ ନୀଳରଂଙ୍ଗର ଏକ୍ଟିଭା ୧୨୫ ସ୍କୁଟି (ଓଡି-୦୩ଏକ୍ସ୫୩୧୦)କୁ ଲୁଟି ନେଇ ପଳାଇଥିଲେ । ମହେଶ ଏନେଇ ପୋଲିସକୁ ଜଣାଇବା ପରେ ଏସପି ନାରାୟଣ ନାୟକଙ୍କ ନିର୍ଦ୍ଦେଶରେ ସୋନପୁର ଆଇଆଇସି ଯାଦବ ବାଗ ଘଟଣାସ୍ଥଳକୁ ପହଞ୍ଚି ପଚାରଉଚାର କରିଥିଲେ । ଅଭିଯୁକ୍ତମାନେ ସୋନପୁର ସହରର କିଛି ନିଶାଖୋର ଯୁବକ ବୋଲି ଅନୁମାନ କରାଯାଇଛି । ପୋଲିସ ଟାଉନଥାନାରେ ଏକ ଡକାୟତି ମାମଲା ରୁଜୁକରି ତଦନ୍ତ ଚଳାଇଛି । କିନ୍ତୁ ଘଟଣାର ୪୮ ଘଣ୍ଟାପରେ ମଧ୍ୟ ଅଭିଯୁକ୍ତମାନେ ଧରାନପଡିବା କିମ୍ବା ଲୁଟ ସ୍କୁଟିଉଦ୍ଧାର ନହେବାରୁ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ଏସପି ନାରାୟଣ ନାୟକଙ୍କୁ ଏନେଇ ପଚାରିବାରୁ ତଦନ୍ତ ଚାଲିଛି ଖୁବଶୀଘ୍ର ଅଭିଯୁକ୍ତମାନେ ଧରାପଡିବେ ବୋଲି କହିଛନ୍ତି । ପ୍ରକାଶ ଯେ,ସୋନପୁର ଜିଲ୍ଲାର ତରଭା ଥାନା ଅଞ୍ଚଳର ପୁଆ ଛକରେ ମଧ୍ୟ କଦଳିପାଲି ଗ୍ରାମର ଜଣେ ଯୁବକର ବାଇକ ଲୁଟ ହୋଇଥିଲା । ଏହା ସହିତ ସେହି ଅର୍ଜୁନପୁର-ବୁର୍ଡା ରାସ୍ତାରେ ବହୁସମୟରେ ଲୋକଙ୍କଠାରୁ ଲୁଟ ହେଉଥିବା ଅଞ୍ଚଳବାସୀ ଅଭିଯୋଗ ହେଉଛି । ପୋଲିସ ପେଟ୍ରୋଲିଂ ବଢାଇବାକୁ ଜନସାଧାରଣରେ ଦାବି ହେଉଛି ।